鹭水芗南-闽南语部落

常在（chhiâng-chāi）有咧上網的儂，hoān-sè攏有拄着即款的困擾：想卜登入一个真久真久無去行踏的網站，iah 呣佫 liâm-tong-sî soah bē記得 密碼是啥貨。有時仔 真正 想kah 頭殼 煏破（piak--phòa），嘛猶佫想無。即个時陣，請逐个呣免緊張，儂講「緊事寬辦」（kín-sū khoaⁿ-pān），只卜咱進前捌用Firefox登入過即个網站，安呢，咱着 有法度 順藤chhiû瓜，chhē着pháng見的密碼。  
続きを読む

閩南維基百科即暫仔有介紹一款新的字體（字型），號做「Charis SIL」，講是SIL International開發設計的一款電腦字型，是按照Bitstream Charter的「模」落去做的。目的着是beh造一套有chiâu-chn̂g 的 Unicode（通用碼／统一码） 字型。所以，in講即款字型已經包含「世間所有的『羅馬字』抑是『Cyrillic字』的字母」，thèng好 用來 配合 文字的書寫，嘛thèng好 用來kā文字注音。

維基網頁介紹講，「Charis SIL」佮「 Doulos SIL」共款，嘛用着一寡先進的字型技術，比論講Graphite、OpenType 佮 AAT。不而過，「Charis SIL」比「Doulos SIL」有咔進步。In講「Doulos SIL」即款字體（字型）kan-taⁿ 一款字形（weight）nā-niā，ah nā 「Charis SIL」有四種字形：羅馬體（roman）、粗體、趨體 佮 粗趨體。

佇SIL International官方網站 ，有 開放 免費的版本 互儂 掠（lia̍h／下載），建議朋友相招去掠。Nā beh掠，請入去：http://scripts.sil.org/cms/scripts/page.php?site_id=nrsi&item_id=CharisSIL_download#FontsDownload

這是用charis SIL顯示POJ的效果圖：


p.s. Kā恁偷講一下：「charis SIL」佮福州話羅馬字（平話字）嘛有四配哦～  
続きを読む

　　PDF，是一種電子文檔（檔案）的格式，全稱號做「Portable Document Format」，會當保存來自任何源文檔的字體、格式、色緻 佮 圖形。佇業界，有真儕電子文件，尤其是咔重要的檔案，透底是使用PDF的格式。

　　過去，beh chhē一款會當製造PDF格式的軟體（軟件），ná像呣是hiah簡單。Adobe公司會當講是PDF的鼻祖（pi̍t-chó·／開山祖），初起先，in出産的産品 Adobe Acrobat Reader ，佇業界來講，真正是孤門獨市，有夠交易（ka-ia̍h）。

　　即陣，國産的組件式辦公軟體WPS Office 2005，oân-á會當輸出PDF格式囉。真正足感心的~~　

　　古早儂講「錢呣用是銅」。所開發的電子軟體，nā是bē當為用戶提供利便，講咔歹聽的，he 佮 糞掃（pùn-sò）敢有精差？用着會利便，這條道理是軟體開發商一定噯瞭解的。金山公司開發的WPS Office 2005，會當將「.doc格式」的文檔 hām「.wps格式」的文檔，輕鬆轉換做PDF格式的。
　　操作kài簡單，只要用WPS Office 2005將按算beh轉換的文檔開開，直接chhi̍h（點擊） 【文件（F）】→ 【输出为PDF格式（F）…】，就可以囉！整個（chéng-kô）的過程，kan-taⁿ 需要5秒鐘。安怎，有緊無？  
続きを読む

        進前tòe儂咧時行，三不五時，愛佇BLOG頂懸khè一寡好聽的音樂，不但儂客有thang聽，家己nā卜聽，嘛不止仔利便。頂一暫仔，坫「T-Eye 第3只眼」hia學着一招，轉來遘，隨做一个 古錐 又佫 束結（sok-kiat）的播放器。He是用ExoBUD MP(II)即个軟體做出來的，實在不止仔合意，不但會當聽音樂，佫有歌曲清單thang揀。不而過，有一好着無兩好，伊kan-na有合IE用niā，火狐狸（Fierfox）soah bē用得。

        昨昏，又佫 牽google 出去 四界liù，按算講「鴨母喙罔lū，無田螺也有水龜」，對對 去chhiau着一寡好料的——是一个簡單、利便的「播放器程式」。比ExoBUD MP(II)佫咔簡便。不而過，功能當然是有咔輸面。但是，利便！利便着是上大的優點。儂客 nā 有興趣，無 嘛 thèng好 抄轉去 試看māi。下面是即个「播放器程式」的語法。  
続きを読む

Khá-koài--ah, Chit-chām-á Keyman_POJ_0.6 su-ji̍p-hoat soah hiông-hiông bōe-tàng tòa IE lâi sú-iōng?? Chit lāi-tiong m̄-chai sī sím-mi̍h goân-in, kàu taⁿ ti̍t-ti̍t hō· góa siūⁿ lóng bô.

Pa̍t tâi tiān-náu bêng-bêng ē-sái--tit, in-hô chit-tâi soah bōe-tàng ? Kám-kóng sī Windows Update àm-chīⁿ teh chok-lōng? (Kiàn-pái chhut chiōng-hóng, to̍h lóng khan-thoa tùi MS hia khì... XD~~~) Ah-sī lán ka-kī ê tiān-náu tó-ūi chhiâu-liáu m̄-tio̍h--khì? (pí-lūn kóng IE ê "sio̍k-sèng" tiâu cháu-choa̍h--khì..) Kiám-cha kui-po· kú, iû-goân chhâ bōe-tio̍h kin. Khoàⁿ pān-sè, ài chhiàⁿ hit-lō “choan-kho ê tiāu-náu sian-siⁿ ” lâi hoāⁿ-me̍h, nā bô, chi̍t-sî soah bô hoat-tō· i-tī .

  
続きを読む

（【說明】即招是按線頂kā儂「偷賺食」來的，實在真好用，驚記，只好kā抄起來囥佇chia……）

三不五時，有看著一寡趣味的網頁，會當佇咧網頁當中佫再插入一个外部網頁。有的儂想講he定著是用著框架的語法，呣佫，事實呣是安呢，這是用著<IFRAME>的技術。講是講kan-na IE（瀏覽器）會用得，不而過，我有試過啊，Firefox（瀏覽器）oân-á會合（ha̍h），iah nā是其它的瀏覽器，我著呣知影囉。下底有完整的語法（是按別位照搬來的）：  
続きを読む

朋友 nā 是 常在（ chhiâng-chāi ）有 teh 線頂（網路）踅 chhit-thô ，儕少穩當有聽著「播客」即个講法。實實講，我嘛是最近 chiah 有聽儂 teh 講起啦。 Ah 照我看， hōan-sè 猶佫 hàm-hàm 儕儂呣知「播客」是啥物仔碗糕。雖然我 ôan-á 無 kài 清楚，所知影的實在真有限，不而過，咱共款是 beh 將家己所瞭解的，來 kā 朋友小報告一下（一支破雨傘，興展興展啦）。

Podcast ，伊的中文譯名猶未定型，目前，上儕儂 kā 翻譯做「播客」。伊算是一種「數字廣播」技術，初初出世的時陣，是倚靠（oá-khò ）一款號做「 iPodder 」的軟體（软件），結合 一寡 輕便型 的 播放器來咧操作。 Podcasting 所錄製的是一寡線頂廣播或者網路聲訊節目，網友會當將線頂的廣播節目掠落來，存滯家己的 iPod 、MP3播放器或者其它輕便型的數碼播放器裡中，隨時聽好（ thèng-hó ）欣賞。不而過，這算講 kài 普通，應該呣是 Podcast 上主要的特色。對 Podcast 來講，上 kài 有意義，或者講上 kài 有趣味的代誌是，網友（播客）會當將 in 家己的錄音檔案， hē 坫網頁頂面，分儂聽。安呢，每一「播客」攏會當將 in 的心聲， in 想 beh 講的話，或者 in 經過的代誌用錄音的形式，放送出來，佮眾儂做夥來分享。有儂講， Podcast 是一種有聲的 blog 。  
続きを読む

闽南语虽罔是汉语系的一种语言，不而过，呣是每一个音节拢有汉字通写。这是因为：

• 閩南語內底有足儕古漢語的成分。千百年來，中國歷代的教育部門攏無共閩南語當作正規語文，學校攏無咧教閩南語。致使會捌閩南語字的儂愈來愈少，有的音節已經拍交落（phah ka-la̍uh），遘今無法度稽考，無「本字」通寫，或者是無法度確定「本字」是啥。根據瞭解，佇現代閩南語當中，有咔加５％的音節，屬於「上古漢語」的成分。
• 現代閩南語猶原保留一部分古早時代「閩越」語言的成分。即部分音節oân-á無法度用漢字來寫（噯佫造字）。
• 千百年來，咱儂（漳泉儂）佇咧勞動、種作、生産的過程中，家己發明的「土話」、「土音」。
• 番仔話借音、借詞。

  
続きを読む

【功能】

漳泉語（廈門音）白話字（ＰＯＪ）輸入法。ＰＯＪ編碼采用國際標準——萬國碼（统一码／Unicode）。

【使用環境】

1、中文版Windows XP ，支持Firefox（瀏覽器）；Word、Excel、寫字板等等有支援Unicode 的軟體。
2、！！注意：（1）一定噯先安「Taigi Unicode」即套字型（若無，會出亂碼）；（2）網頁瀏覽器，請用Firefox 。

【安裝】

1. Download「MSKLC POJ0.3」檔案(.rar)。
2. 先tháu縛（解壓縮），了後安裝。
3. 安好了後，拍開「輸入法設置」，選擇「添加(D)」，佇「鍵盤布局/輸入法(K)」即欄，選擇「MSKLCPOJ0.3」，chhi̍h「確定」。
4. 電腦重佫啟動。  
続きを読む

POJ ＆UTF-16 對照表（白話字 ＆萬國碼-十六進制對照表）…  
続きを読む

呣知別儂敢有拄著即款啲代誌，收著一張E-mail(電子批)了後，拆開一下看，攏總是亂碼。即款啲代誌，我是捷捷咧拄著。Kán-ná按臺灣寄來啲電子批，特別佫咔會安呢。尤其對方若寫漢字，直接用BIG5編碼，安呢ùi臺灣寄出來啲電子批，差不多若寄十張，有十一張會變做亂碼。反倒轉，咱佇中國大陸，若直接使用GB編碼，安呢寄去臺灣啲電子批，出亂碼啲機會嘛加真懸。

會記得進前若收著即款變亂碼啲批，逐擺著噯去chhiâu瀏覽器啲“語系字元編碼”，安呢加真費氣。因為家己收著啲批變亂碼，所以咧kā對方回批啲時，手頭soah會khî、會忍忍(lún-lún)，驚講對方若收著咱啲批了後，oân仔會走精變亂碼。會出現即款無正常啲情形，我約這是因為兩爿使用無共啲編碼，互相認bōe出來。其實beh解決即个問题應該吤簡單，只是進前攏無詳細去考慮，lia̍h無著根。現Taⁿ想起來，只beh雙爿攏使用共一个系統啲編碼(內碼)，安呢應該著無問題嘍。上好啲撇步是，雙方攏采用“UTF-8”。不而過，因為佇“UTF-8”內底，每一个符號攏是用一排代碼(字元串) 來表示，比論講，“臺”啲代碼是“&＃33274;”；“閩”啲代碼是“&＃38313;”。所以，咱代先著噯將批信啲內容轉換做“UTF-8”編碼，了後kā寄出去著好a。


遮有一个轉換器（感謝“暗光鳥” 提供），會當將符號（包括漢字佮標點符號）轉換做“UTF-8”編碼，使用真利便。咱會當先tiàm別位寫好勢，chiah佫將內容拈(ni)來轉換，轉換了後，將chiah-ê“UTF-8”編码hô· (copy)起來，拈去tah tiàm電子批啲編輯欄，寄出去。萬事OK。

頭頂講啲是“漢字”轉換“UTF-8”啲情形。事實，咱若用白話字（POJ）寫电子批啲時，犯勢嘛會拄著亂碼。這是因為帶調符啲POJ，普通啲字型猶無完全來kā支持啲因端(in-toaⁿ)。Beh解決即个問題，佫咔簡單，根本無需要用頂頭講啲hit个轉換傢俬（當然beh代先去轉換一下嘛是會使）。咱只beh佇咧寫E-mail啲時，選擇“使用HTML進行編輯”即个功能（現此時啲E-mial透底有即款功能），了後運用“html”啲語法來指定“字型”。具體操作吤普通，會當安呢來chhiâu：

〈font face="Lucida Sans Unicode"〉批信ê內容〈/font〉  

頂幾工仔，用“Microsoft Keyboard Layout Creator (MSKLC／微軟鍵盤輸入法生成工具)”來咧編寫POJ佮國際音標輸入法啲時，chiah發現著一个問題。講“發現”，不如講是“遘taⁿ chiah知影”。

"MSKLC"應該算是bōe歹用啲輸入法生成工具，操作簡單，准講是像我即款完全呣捌英文啲儂（我是正港"鸚哥二四"啲青盲牛!!），嘛共款chhit -thô kah有來有去。我定咧講，萬物(mi̍h)有一好著無兩好；有時仔，明明是優點，不而過，若用佇無共啲時陣，抑是無共啲所在，優點嘛會變成欠點。 MSKLC正正著是安呢。

假使一个Unicode編碼代表一个字元（字符），安呢來講，在我啲了解，"MSKLC"一擺啲操作kan-na有法度輸出一个Unicode編碼，也著是講伊無法度輸出"組合字符"(兩个或者兩个以上啲Unicode編碼組合做夥)。所以，hit陣我咧編寫輸入法啲時，即个"無法度"啲代誌，一時成做一項真歹剃頭啲問題。

"m̍, a̍, m̄, n̄, n̍, m̂, n̂, m̆......"親像即款啲符號，其實Unicode內底已經有怹啲編碼，比論講"a̍"啲編碼是"U+e001"、"m̆"啲編碼是"U＋e087" 。所以，做輸入法啲時，只beh將"U+e001"設計入去，尾仔輸出啲結果一定是"a̍"，並且百分百bōe走閃。照安呢講，代誌的確是真簡單，只 beh chhē出白話字內底帶調符啲字元（像"m̍, a̍, m̄, n̄, n̍, m̂, n̂, m̆......"）啲Unicode編碼，了後，將即寡編碼全部錄入去"MSKLC"，安呢著會使得。事實上，即款做法(暫時叫做"方法1")應該是上利便啲、嘛是上科學啲方法。不而過，目前來看，按"方法1"做啲輸入法，佇實際運用啲時，犯勢會產生真大啲副作用，比論講出亂碼。在我了解，現階段beh 解決即个亂碼啲問題，無除非是叫用戶另外安裝特定啲字型。

這是因為現主時，大多數啲字型（字體）並無完全支援Unicode，猶佫無法度正常顯示"m̍, a̍, m̄, n̄, n̍, m̂, n̂, m̆......"即款啲特殊字元，所以，亂碼出現啲機會嘛加真大。

因為"大多數啲字型tòe bē著Unicode"，害儂加真困擾。為著beh防止出現亂碼，孤不而將，只好"近路呣行，行山坪"，放棄"方法1"。

"方法2"啲做法，著是利用"字元組合"啲概念。比論講，"̍ m̆ "會當看做是由"m" 佮 " ˇ "兩个單獨啲字元組合做夥；"ô·"會當看做是由"o"、" ^ "、" · "三个單獨啲字元組合做夥。安呢做啲優點是：(1)拆散了後，chiah-ê單獨啲字元，大多數啲字型（字體）攏有支持，bōe出亂碼；(2)所有啲字元會當自由、靈活進行組合；(3)呣免安裝特殊字型（對Windows XP用戶來講）。當然伊啲欠點是，拍字啲時陣，會咔厚工。  

我用Microsoft Keyboard Layout Creator (微軟鍵盤輸入法生成工具，縮寫“MSKLC”)做啲“閩南語白話字(POJ)輸入法”。有兩套，“MSKLC POJ0.1”只會當輸入POJ，“MSKLC POJ0.2”是佇0.1啲基礎上加一寡輸入國際音標(IPA)啲功能。

功能：
1. MSKLC POJ0.1版本有法度輸入閩南語白話字(POJ)；
2. MSKLC POJ0.2版本會當輸入閩南語白話字(POJ)、國際音標(限制佇"廈漳泉"語音系統范圍內)；
3. 攏采用Unicode編碼，無法度輸入客語羅馬字。

使用環境：
中文版Windows XP （SP2 佫咔好），支持Internet Explorer 6、Firefox；Word 2003、Excel 2003、寫字板等等有支援Unicode 啲軟體。

安裝：
1. Download"MSKLC POJ0.1"或者"MSKLC POJ0.2(推薦)"檔案(14kb)，解壓縮(.rar)了後直接執行安裝。檔案誠細(14kb)，呣免3秒鍾著會當安裝好勢。
2. 安好勢了後，拍開"輸入法設置"，選擇"添加(D)"，了後佇"鍵盤布局/輸入法(K)"即欄，選擇"MSKLCPOJ0.2(設使是beh鬥"0.2版")"，chhi̍h"確定"。
3. 佇語言欄，會當看著"MSKLCPOJ0.2"(無圖標)，若是暫時無看著，請重開機。(注意：雖然無圖標，呣佫看有名稱"MSKLCPOJ"，使用無問題)  
続きを読む

即陣，來比較“Doulos SIL”佮“Taigi Unicode”即两套字型，配合無共啲輸入法，伫咧顯示POJ（白话字）啲時，有啥物無共款啲所在。
我選擇“Office word”做比較啲平臺。我啲“Office”是2003版本；作業系統是“Windows XP SP2”。即mái着來看——

第一，選擇用“Keyman_POJ_v6.0”白話字輸入法拍字：

1. 用“Doulos SIL”來看，效果像下底安呢：
   [图1]


2. 用“Taigi Unicode”來看，效果像安呢：
   [图2]

按即两幅图当中，咱通知影：用“Keyman_POJ_v6.0”拍出來啲POJ，“葫蘆點”無啥會正，特别是伫“Taigi Unicode”即套字型環境當中（見[图2]），葫蘆點加真下(kē)。
第二，選擇用“Taiwanese Package2.0”來拍字。

1. 用“Doulos SIL”來看顯示啲效果，像安呢：
   [图3]


2. 用“Taigi Unicode”來看，效果像安呢：
   [图4]

“[图
3]”啲效果應該是上吤無理想啲，嘛是咱上無願意看著啲。“[图3]”内底啲“葫蘆點”拢變成乱碼，這是因為“Taiwanese Package2.0”輸入法使用新符號來表示葫蘆點，即个新符号，“Doulos SIL”即套字型無收，不而过“Taigi Unicode”有。所以，“[图4]”著會當正常顯示。我咧想，“[图4]”啲效果應該是上讚啲！
看看咧，現主時，犯勢干凋“Taigi Unicode”啲符号上吤chiâu全。不而过，對普通網路用户來講，親像"Doulos SIL"、"“Taigi Unicode”即款字型拢需要另外安装，若無，瀏覽器着無法度正确來顯示，這有咔费氣。咱映望日後，會當出一寡仔咔"大衆型"啲字型，互網路用户免安装特殊字型着會當看着POJ啲符号。即陣，咱只好共即个美好啲願望寄托互天公伯仔.........  
続きを読む

設使汝常在(chhêng-chāi)有咧寫閩南文，汝定著需要一套好用啲“漢字輸入法”，佮一套好用啲“POJ”輸入法（假使汝有咧寫POJ）。這是上起碼啲傢俬，若汝無這套傢俬，我實在想無汝卟用啥來做工課(khang-khòe)。
閒閒無代誌，我想卟共逐家報告一寡仔普通時仔咔有咧用啲“閩南語輸入法”，若是叨位講呣著去，請知影啲前輩來指教。  
続きを読む

"個人主頁"？對我來講，這有咔oh，若無二步七仔，“個人主頁”永遠是一场空笑夢。不而过BLOG着加真利便，呣免捌偌儕编程智识，嘛聽好(thèng -hó)趁儂來時行。論眞講，BLOG已經時行幾落年也，儂chhit-thô kah呣噯chhit-thô也，我咔sông，即陣才來搭着尾班車。食老學pûn鼓吹。Bōe gâu ké gâu,頭先kā別儂偸學一招，順紲摕出來“展”一下，漏氣死也:)。

按照下底啲方法操作，着有法度tiàm家己啲BLOG頭頁显示天氣預報。猶原是迄句話“江湖一點訣，講破呣值錢”！方法吤简單，只卟伫適當啲所在（比論會當编輯“HTML”語法啲所在）加入下骹啲代碼，着OK也。


<h3>News</h3>

<b>今天天气</b>

<iframe width=157 height=240 frameborder=0 scrolling=NO
src='http://appnews.qq.com/cgi-bin/news_qq_search?city=%CF%C3%C3%C5&cl'></iframe>



PS:其中“%CF%C3%C3%C5&cl”是厦门啲“城市编码”。假使汝卟換做别啲城市來講，只卟改變“城市编碼”着會使。是講,“城市编碼”卟哪會知影？當然著噯去查，呣过這呣是真费氣,颠倒吤利便，昑順紲報儂知。卟查“城市編碼”，有一个方法是：

1. 用瀏览器拍開“百度”（http://www.baidu.com）啲頭頁。
   
2. 伫“chhiau-chhōe格仔"内底添落“按算卟查啲城市名” （比論添“厦门”），chhi̍h“百度搜索”了後，电脑開始自動chhiau-chhōe。
   
   
3. Chhōe着啥物碗糕，咱mài chhap伊。咱干凋卟知影“網址欄”显示啥物件。设使汝頭先是chhiau-chhōe“厦门”，安呢“網址栏”啲顯示結果應該著是：http://www.baidu.com/s?wd=%CF%C3%C3%C5&cl=3。
   
   
4. 所以，咱著有法度知影，頂悬hit个"網址"，上后壁啲hit pha字符“%CF%C3%C3%C5&cl”著是厦门啲“城市編碼”。
ol>  

今仔日上大啲收成,著是學會曉安怎來強迫BLOG網頁執行“Unicode”標準啲字型（字體）。

頂一暫仔，不管時，攏嘛為著網頁無法度認出“Unicode”標準啲字型即個問題，踮遐家己咧鬱悴。本然，電腦技術著真害，啥物碗糕“html”，我透底呣捌，遘昑猶佫呣捌。


原底，我是踮咧中國大陸啲“博客中國”咧做網誌。做一暫仔，後來，發覺“博客中國”啲伺服器真害，網站不時著咧出狀況，有幾若擺，實在互我氣及攏無力。

後來，注死有一擺，我閑閑無代誌，又佫蹛咧線頂四界趖，探聽著即間起佇臺灣啲“樂多”（網站）。Bē-bái,佫有提供BLOG啲服務，空問嘛是不止大（30MB），速度吤緊……總是，比晉前迄間“博客中國”（BLOG.CHINA）咔有出脫。“新屎礐好放屎”，經過短暫啲思考了後，我決定卟來搬厝（嚉“博客中國”搬來去“樂多”）——
……
若無即擺啲搬徙(sóa),我猶原佫呣知影到底卟安怎來修改BLOG啲樣式（stylesheet）。即個問題，對別儂來講，犯勢吤簡單，簡單及親像桌頂拈柑；不而過對我來講，實在真正費氣及複雜，這著若像俗語來咧講“攑筆比攑鋤頭咔重”（攑筆咔重過鋤頭）共款。


我決定卟來試看有法度修改網頁啲設計字型無？即擺，猶原是Google鬥相共，chhiau-chhōe著啲資訊共我講，卟修改抑是佈置網頁啲字型，必須著去chhiâu“樣式（stylesheet）”啲設定。


我興刜刜(hèng-phut-phut)……


江湖一點決，講破呣值錢！


拍開“樣式（stylesheet）設定”了後，佇“編輯區” 語法迄欄(hit nôa)，將內底所有啲“Font-Family”語法攏總chhōe出來，紲落來，共咱想卟強迫網頁採用啲字型代號添落去，有偌儕“Font-Family”，咱著噯添偌儕擺。保存檔案、變更（重建）了後，一切著攏總OK也！！


因為白話字（Pe̍h-oē-jī）用會著啲符號（調符來講），儕儕攏屬於“特殊啲組合字型”，所以咱照講是著揀“國際音標2000”（Lucida San Unicode）、抑是“Doulos SIL”即兩套字型來配合電腦（網頁）正確顯示POJ(犯勢犹佫有其它好用啲字型,這我着呣知影)。目前，有啲用POJ寫啲網頁（網站）著是採取“強迫網頁使用特選字型”啲做法來正常顯示白話字，比論講：暗光鳥ê厝、閩南語維基百科全書（http:zh-min-nan.wikipedia.org/）。  

A-giâu hiaⁿ thê-kiong "Movable Type ê pang-bô·, kek-sek, chó·-kiāⁿ" hō· sú-iōng "Movable Type" ê iōng-chiá lâi-teh chhì-iōng, nā ū teh sú-iōng "Movable Type" chit-thò hē-thóng ê pêng-iú, iû-kî sī siá Bân-lâm-gú-bûn bāng-chì ê lâng, taⁿ thèng-hó piàⁿ khì A-giâu ê blog hia, kā tòng-àn lia̍h tǹg-khì chhì-iōng khòaⁿ-māi.

Pún-jiân góa téng chi̍t-chām-á sī oân-á ū tiàm Tâi-gí-bûn Bāng-chì Tiong-sim hit-tah
sin-chhéng tio̍h chi̍t-ê blog, put-jî-kò, si̍t-chāi chiâⁿ put-hēng, iōng bô kúi kang sûi chhut būn-tôe--a. Che tiān-náu ki-su̍t, thiah-pe̍h kóng, góa sī bô-pòaⁿ-phiat lah, siáng chai-iáⁿ bô bí kiam lūn-go̍eh(無
米兼闰月), hó-sí-m̄-sí, góa án-ne sió-kóa-á chhiâu liáu bô tùi-têng niâ,
hē-thóng to̍h kā góa kéng-kò, kóng chhut-hiān chit-khóan ê chhò-gō·:"Can't use an undefined value as a SCALAR reference at lib/MT/ObjectDriver/DBM.pm line 373"...Taⁿ
che mā m̄-chai siáⁿ-mi̍h óaⁿ-ko? Hôaiⁿ-ti̍t góa to̍h khòaⁿ-bô. Góa
chit-ê lâng ū 1-pō· bái, he bêng-bêng bōe-hiáng sńg, a̍h-sī kóng m̄-bat
sńg--kòe ê tong-tong, góa to̍h ngē-beh khì kā pìⁿ-lāng. He kah
kòai--a...Bóe--a soah koh bú kah o·-ian phēng-phōng, sòa-lo̍h-lâi "thái-ko i kah pìⁿ si-lô"(癩膏醫及變尸癆), taⁿ chit-mái kui ê Blog í-keng m̄-sī "lû-chháng-chháng" ū hoat-tō· pí-lūn niâ, he ē-sái kóng sī bē-tín-bē-tāng, beh sí á m̄ chiâⁿ sí, tàm hia leh hioh-chhóan. Chin-chiàⁿ khó-liân-tāi !!  

Hiān-chú-sî, koan-hē "Bân-lâm-gú" ê su-ji̍p-hoat, sǹg-sǹg--leh mā í-keng ū kúi-nā thò ah, khòaⁿ--khì-lâi kán-ná 1-thò pí 1-thò khah chìn-pō· (góa ê kám-kak lah, m̄-chai to̍h-m̄-to̍h ? ). Ū-ê sī choan-tê teh phah Pe̍h-oē-jī (POJ), ū-ê sī Hán-Lô lām-chham. Si̍t-chāi kóng, che sī Bân-lâm-gú ê hok-khì, lán beh koh chi̍t-pái hiòng sò·-ū ê siat-kè-jîn kah chhut-la̍t ū-tio̍h ê sian-chìn soeh chi̍t-siaⁿ: ló·-la̍t !

Góa teh siūⁿ, nā ū-hoat-tō· siat-kè 1-thò "iōng bûn-tho̍k-im phah Hàn-jī " ê su-ji̍p-hoat, bô-tek-khah ē koh-khah chán! Bân-lâm-gú ê tha̍k-chheh-im hām Hàn-jī ê tiong-kó·-im thàu-té tùi-chiàu kah chin chê-cháⁿ, tōa-to-sò· ê Hàn-jī kan-ta 1-ê Bân-lâm-gú ê bûn-tho̍k-im niā-niā. Che í-gōa, nā kéng Bân-lâm-gú ê bûn-tho̍k-im lâi phah Hàn-jī, koh ē-tàng pâi-tû "phīⁿ-hòa-im" ê kan-jiáu, chhau-chok ke-chiâⁿ tan-sûn kah kán-tan. Kó-pí-kóng, "成" --jī, pe̍h-oē-im ū "siâⁿ", "chiâⁿ", "chhiâⁿ" saⁿ-sì chióng kóng-hoat, put-jī-kò i ê bûn-tho̍k-im khiok-sī kan-na "sêng" niā-niā.

Góa khòaⁿ, Bân-lâm-gú beh chhèng, kiám-chhái ài koh khiàm-iōng tio̍h Hàn-jī, sò·-í oân-á m̄-mó· oân-chôan kā Hàn-jī hiù teh piⁿ--á la̍h-liâng, siāng-bô, bo̍k-chiân Hàn-jī iu-gôan koh ū chiâⁿ chē chok-iōng tī--leh.  

(翻译/Limkianhui)



有啲blog伺侯器(伺服器/服务器)有提供程式,比论讲亲像"CGI"程式,安呢,伊啲blog用者着会当真利便來享受着计数器啲功能。呣佫，若准汝 (设使汝是一个blogger)啲blog伺侯器無提供"CGI"程式，即个時阵，汝共款会当tiàm線頂选择其它網站提供啲服务，比论sitemeter這家啲服務。Sitemeter不但有法度計數，佫会当看着每日、每禮拜、每月日、每年上站啲儂數、佮瀏覽啲次數，甚至連讀者按叨位來啲，嘛拢記录及一清二楚。推薦汝来使用。


1. 進入Sitemeter啲頭頁，chhi̍h "sign up"註冊；

2. 代先，汝會一寡仔說明，犯势有幾若頁，嫑管伊，chhi̍h "next"，一直遘kah开始註冊hit頁。

"url": 這是叫汝填汝啲blog啲網址；

"your stie's name": 這意思是"網頁名稱"，chhìn-chhái填，上好填罗马字母（比论讲英文字母）；

"codename": 這是"計數器名稱"，一定嗳填英文，上少嗳填5个字母，beh號做啥物名，隨在汝爱。

3. 來遘"填寫个人聯絡資料"即頁。当中啲E-mail，着是即間公司每禮拜按算beh向汝报告"上站人數统计"啲時，beh寄付用啲。

4. 设使汝願意接收怹啲廣告，汝通選择批信啲類别。若無愿意接收，直接chhi̍h "next".


5. 了後，會出现汝填寫啲資料信息，汝嗳详细巡一遍仔，若拢正确来讲，着佫再chhi̍h "next"。安呢，注册算完成也。

6. 佫紲落來即頁，应该是"選擇計數選項"。先嫑chhap伊，继續chhi̍h "next".

7. 佫來，汝嗳拨工斡去看汝啲email批桶是呣是已经有收着有一张按sitemeter寄來啲批信（应该是有）。当然，汝通按照即张批所提供啲codename佮密碼，佫再拼转來sitemeter即爿，登入sitemeter。

8. 為着安全，嘛為着日後管理起来会咔利便，咱代先嗳修改密碼。login（登入）了後，先chhi̍h靠頂悬啲"manager"，佫来chhi̍h倒手爿啲"password"，安呢，汝着有法度來改密碼。新密碼嗳记互tiâu,呣好放bōe记。

9. 密碼改好了後，佫來，共款嗳chhi̍h倒手爿啲"HTML CODE"。

10. 紲落来，chhi̍h即个"Using a text editor (like NotePad)"。

11. 伫即頁内底，拢总有兩款網頁碼提供互儂揀：

"Site Meter JavaScript HTML"：這有javascript啲"碼"，若beh駛即隻"马"（碼），日後汝着会当伫blog網页内底看着访问者是按叨位連过来啲（比論讲，有啲是通过"chhiau-chhōe"(搜索)chhiau着啲；有啲是按别儂啲網頁link（連結）巡过來啲）


"Site Meter Regular HTML":即款無javascript啲"碼"，無法度跟蹤访问者，干凋會得計數niâ.

12. 看汝beh ti̍h叨一种"網頁碼"，共伊copy起來，粘tòa汝blog啲梆模内。假使汝用"Movable Type"
啲blog，安呢，汝會将"網頁碼"tah落去 "Main Index"（主索引模板）内底，抑是"Individual Entry Archive"（單篇索引）内底。当然汝猶佫會當摕去tah tiàm其他梆模，亲像"分月彙整"抑是"分類彙整"等等，横直随在汝嗳。

13. 执行"保存-->重建"，共汝啲修改保存落来。了後，汝着會當看着一粒水噹噹、又佫新点点啲"计數器"嚕！

14. 假使汝呣是真合意即粒計數器啲外殻，無要緊，汝隨時着會當登陆sitemeter去kā舊啲换掉（去修改啦）：共款是tiàm "maganer"即頁，chhi̍h倒手爿啲"meter style"，揀着汝上合意啲款式了後，通落去下底hit頁，進一步详细來揀"字體、大细、色緻"等等......揀煞了後，嗳会记得chhi̍h
"save"(保存)。安呢，算讲交定(ka-tiāⁿ)好势也，工课(khang-khòe)嘛做煞也，计数器嘛开始咧行嚕！

15. 其他猶佫有誠侪好爽(hó-sńg)啲出頭，若有興趣，汝才家己ta̍uh-ta̍uh仔去變弄。


16. 若beh了解汝啲BLOG到底有偌侪儂來行踏，只beh tī汝啲BLOG網頁顶悬，chhi̍h一下"sitemeter"啲標志着会使咧。



除了"sitemeter.com"以外，聽讲"extremetracking.com［１］"啲功能oân仔bōe歹，各位另工會當去试看嘪。



设使汝干凋是卟得着一粒普通kah無法度佫普通啲计数表niâ,安呢,對汝來講,即粒着有够也。