鹭水芗南-闽南语部落

2006年12月09日

BLOG搬厝啟事

搬岫！新住址： http://limkianhui.mocasting.com

Posted by limkianhui at 00:53 │TrackBack(0) │有ê 無ê

2006年12月09日

BLOG搬厝啟事

搬岫！新住址： http://limkianhui.mocasting.com

Posted by limkianhui at 00:48 │TrackBack(0) │有ê 無ê

2006年05月12日

闽南语：

各位亲爱的朋友、乡亲序大，逐个好。小弟我，因为某物仔原因，着嗳佮恁逐个暂时来作一个告别，hoan-se真久真久真久boe佫来上网……离开即个美丽的网路世界，实在真无彩……Ah呣佫，我會珍惜各位对我的即份关怀佮疼爱，我會共恁永遠记在心肝裡。感谢逐个，咱有緣再相會。我會佫倒转來，請恁相信我，感谢感谢。

普通话：

各位亲爱的朋友们，各位乡亲父老，大家好。由于某些原因，小弟我必须要暂时告别网际网路一段时间，并在此向各位好朋友说一声再会了。可能，许久许久，我都将无法上网。告别这个多彩的网路世界，的确让人难以释怀……不过，无论如何，我都会珍惜大家长久以来对我的鼓励和关爱，会将这份情永远藏在心里。谢谢大家，期待再相会。我想，我将会再回来的，谢谢了。

Posted by limkianhui at 20:50 │TrackBack(1) │有ê 無ê

2006年03月28日

guestbook

歡迎來遘「鷺水薌南（LŌ·-CHÚI HIONG-LÂM）」部落，留話簿仔，留落汝ê大名。

講天講地，講鱟桸、講饭籭。有話beh講趁即陣，呣免替我儉，即搭据在汝thún踏。
……

歡迎光臨「鷺水薌南BLOG，這里是留言板，謝謝留下您的足跡……

PS. 告位網友，儂講「金千買厝，萬金買邊」，儂佮儂之間，本然著應該以和為貴，人生海海，做儂hàm-hàm代，呣管是新朋友，抑是老朋友，既然有緣做夥，逐家攏著噯相惜，相忍讓。當然，人生chiah-nī長，天地chiah-nī 狹，「海水阔茫茫，船頭有时會相tōng」，只beh 逐个 nā 會當互相帶念，互相退讓，「是呣是，罵家己」，即个世間著會當減少真儕無必要的對抗佮冤仇。「人情留一線，日後好相看」，連古早儂著會捌即款淺白的道理，咱現代儂佫咔噯瞭解。

感謝逐家在來對小站——《鷺水薌南-閩南語部落》的支持、鼓勵佮疼愛！祝逐家：閤家平安大趁錢；身體健康食百二。

*****************************************************

2006年3月28號《公告》

閩南語：自頂兩日仔開始，本站佫再遭受著惡質網路歹徒的攻擊，對方利用外國IP代理，超故意對本站發出大量的comment spam，而且一工比一工咔儕，為著拼掃chiah-ê糞掃（pùn-sò），某儂每工著噯浪了儕儕的時間佮精神，實在bē堪得。因為安呢的原因，本站決定，ùi公告日開始，暫時關捒BLOG comment（回應）功能。造成無方便的所在，佇chia向各位支持佮疼愛小站的朋友說一聲「失禮啦！」這真正是無tāi-oâ，姑不而將chiah會安呢做，希望各位朋友會當諒解。感謝各位。歹勢歹勢~~

普通话：自打前几天起，本站又一再遭受到可恶网络劣徒的恶意攻击，对方利用国外IP代理，恣意向本站發出大量的comment spam，而且一天比一天严重，致使敝人每天忙于清理和打扫这些垃圾留言，并为此付出了许多无畏的时间与精力，着实让敝人难以支撑。为此，本站決定，从公告日開始，暫時关闭BLOG comment（回應）功能。给网友造成不方便的，在此向各位长期关注和支持本站的朋友道一声“对不起了！”之所以这样做，完全是自出无奈，希望各位网友能够体谅和理解。谢谢各位。

Posted by limkianhui at 10:46 │Comments(13) │TrackBack(0) │有ê 無ê

2006年03月27日

粵語wikipedia起行囉~~~

今仔日，聽儂teh報馬仔，講「粵語wikipedia」（廣州話維基百科）佇昨昏正式來成立囉。先kā in講一聲「恭喜恭喜」。
続きを読む

Posted by limkianhui at 00:45 │TrackBack(1) │有ê 無ê

2006年03月20日

中國解除對Blogsome的封鎖

今仔日中晝，雄雄發現《六月無善北》peh會得去囉！敢講是中國解除對blogsome的封鎖啊呣？有即款代誌？佫試一遍看māi，精實有影neh！即擺，無信聖（sìn-siàⁿ）嘛著噯暫時bóng信。是講，ah這是tī 時的代誌咧？頂一暫仔，我會記得 oân-á 捌超工佫 kā 試咧，ah hit 陣明明著猶佫 teh 封鎖，想bōe遘無偌久了後的今仔日，封鎖 soah 解除啊。
続きを読む

Posted by limkianhui at 16:52 │Comments(0) │TrackBack(0) │有ê 無ê

2006年02月20日

「茄」佮「蟯」

Taokara的《雙倒水別莊（新）》，今仔日有出一篇《干證大理概》，當中有講著一寡lio̍h-á 咔臊（chho）、咔薟（hiam）的，我摘錄一段互儂bóng鼻芳，大概是安呢：

「Masturbate」佇閩南語裡底上蓋捷（chia̍p）講做「拍手銃」，嘛有 khah 孽--ê thiau-kang kā 號做「五个拍一个」、「chek 豆奶」佮「溜膦」--ê，……thang 用「手淫」來表示……

朋友敢捌聽過一句俗語話，號做「三條茄，呣值得一粒蟯」(saⁿ-tiâu kiô, m̄-ta̍t-tit chi̍t-lia̍p giô)？這意思是講：三个諸夫儂（cha-po·-lâng：男子），咔輸一个諸姥儂（cha-bó·-lâng：女子）。「茄」本成著是一條長長，著親像諸夫儂「下底hit 叢『第三支跤』」，所以，「茄」是代表「諸夫儂」。Ah nā 「蟯」本成是生活佇水底的軟體動物，佮「蚶仔」啦、「蜊仔」啦、「九孔」啦…平平攏是共一類的，比論講「粉蟯」（北京話：文蛤）。北京話咧講的即个「田蚌 / 蚌殼」，漳州話號做「田棓 / 蟯棓」（chhân-pe / giô-pe），這嘛有用來咧罵--儂，意思佮「膣bai」（chi-bai）共款，表示「陰戶」。因為漳泉儂自來 kā 諸姥儂「hit-ê所在」（陰戶）比論做「蟯」，所以，有噹時仔，儂咧講「蟯」，he著是代表「諸姥儂」（女性）的意思啦。
続きを読む

Posted by limkianhui at 11:02 │TrackBack(0) │有ê 無ê

2006年02月18日

華視8點檔《舊情綿綿》，有儂講「漚戲拖棚」，敢安呢？

華視8點檔電視連紲劇《舊情綿綿》搬百幾集啊，自舊年8、9月仔搬遘taⁿ，猶佫未煞，聽講已經是換第三代演員囉。會記得，頂擺的頂擺（舊年啦），我倒去廈門，注死tn̄g著即齣《舊情綿綿》拄好開始佇咧搬，hit擺，拄好我請成禮拜的假期，嘛拄好是阮牽手兮佮阮丈姆婆仔in兩个母仔囝一工遘暗咧看台灣的電視，我「局不局」趁in直直看，攏總看差不多卜5~6集。初初看即齣戲，感覺hàm-hàm niā、普通普通啦，總是，無通真好，也呣是講偌bái--安呢。這是我對即齣戲，上頭仔的印象。
続きを読む

Posted by limkianhui at 00:14 │TrackBack(0) │有ê 無ê

2006年01月11日

《闽南之声》广播错误的读音实在有够侪

《閩南之聲》廣播，是廈門人民廣播電臺佇舊年（２００５年）開通的一个新的廣播頻道，用閩南語廣播。本然，我是久久攏無咧聽廣播囉，算算咧差不多三四年啊。Ah今仔日，想講bóng來去kā聽看māi咧。這是頭一擺聽《閩南之聲》廣播，儂佇咧外省，無法度用收音機聽，我選擇在線收聽。
続きを読む

Posted by limkianhui at 13:43 │TrackBack(0) │有ê 無ê

2005年10月28日

Wikipedia, 去互Tiong-kok吊鼎……

“Wikipedia，chū-iû pek-ko choân-su....” hoān-nā khì-kòe Wikipedia ê lâng, tiāⁿ-tio̍h lóng chai-iáⁿ chit-ê soan-thoân kháu-hō. Wikipedia chú-tiuⁿ "tiong-li̍p", "chū-iû", "khai-bêng", pò-tō chin-siòng, toân-pò· kho-ha̍k, toân-pò· tì-sek, sī chi̍t-phō chin-chin-chiàⁿ-chiàⁿ iû choân-bîn kiōng-tông chhòng-chok, kiōng-tông hōng-hiàn ê pek-kho choân-su. Wikipedia sī iu-siù ê pek-kho choân-su !

Chin put-hēng, chit-phō iu-siù ê pek-kho choân-su, tī kong-goân 2005 nî 10 ge̍h 21 hō· chit ji̍t, koh chi̍t-pái cho-siū Tiong-kok tong-kio̍h GFW lâi hong-tó·. Che sī Wikipedia le̍k-sú siōng, tē-saⁿ pái hō· Tiong-kok "kiông-kan". (Chìn-chêng nn̄g-pái hong-só hoat-seng tī 2004 nî 6--ge̍h kah 9--ge̍h). Lán bô hoat-tō· ū-kè chit-pái hong-só sī chiām-sî--ê a̍h-sī tn̂g-oán--ê.

Ē-bīn ê pò-tō, choân-pō· hām Tiong-kok ū tī-tāi, hām pa̍t-ê kok-ka kah tē-khu bô koan-hē.....
続きを読む

Posted by limkianhui at 20:09 │TrackBack(0) │有ê 無ê

2005年09月26日

婊囝無情，契兄無義

有一句俗語話——「拄著痟人——拍著驚」。意思是講，「去驚著」（華語：受到驚嚇）。不而過，我即陣卜理解做：拄著一陣頭殼無好勢的痟狗，烏白吠，烏白咬人，為著自保，孤不而將，噯攑銃出來拍，若無，性命休去。
続きを読む

Posted by limkianhui at 10:27 │TrackBack(0) │有ê 無ê

2005年09月24日

食鱘——興管（興講）

（寫即篇呣成文，著親像「鴨仔咧過溪——無蹽（無聊）」。各位台灣的朋友，小弟我beh先向逐家講一聲「歹勢」，sòa落來，若有得失著的所在，請諒解，感謝）

因為安呢（[1]、[2]），所以安呢——
続きを読む

Posted by limkianhui at 23:19 │TrackBack(0) │有ê 無ê

2005年09月23日

風颱,風颱...

根据氣像站上新啲觀測研究報告，预計今年登陆抑是影响福建省啲風颱（包括輕度風颱）上少有5擺，部分县市有可能伫热儂啲时出现洘旱啲情形。觀测研究報告显示，今年度咱福建来講，雨季降雨量會咔集中，閩西北部分县市有可能會做大水；閩江啲水位透底會比往年仔咔悬。

这風颱有影真夭寿，卟来无通知，卟去无相辞。......

雄雄煞来想着一條古早古早啲閩南语歌《恨世生》，歌词有来咧寫讲"......汝哪亲像采花蜂，花蕊采了换别欉......一生怨恨汝一儂，汝啲罪恶是真重，可恨女性啲毒虫......恨汝一世儂"。《恨世生》是本然是咧描寫"去互儂放捒迄个查某儂满腹啲怨恨"，我用这来比喻風颱啲無情。咱講查某儂，尤其是往过啲查某侬，上吤看重啲是贞节，这一旦若受着傷害，無无法度重新佫开始，着亲像花蕊落土不再回共款。自然灾害着可比是迄个可恨薄情郎，是咱百姓啲"毒蟲"，总是无講无呾(tàⁿ)，共咱糟蹋蹋啲，爽荡荡啲（爽荡:sńg-tn̄g)，chôaⁿ做伊去，走kah无身尸；第一凄惨啲是咱老百姓，无采辛苦粒积，现现着卟收成也，一目nih，倒kah离离离(lī-lī-lī) ——

逐个敢佫會记咧，旧年上吤hàm, 遘kah寒天也，天公伯仔犹佫咧起風颱，阮社里啲老大儂讲he號做"天地尾"也！我讲，敢會是咱儂做啥物歹失德，恶业傷重，去得失着天公，天公才會起性地，决定卟来惩罚(chêng-ho̍at)咱世間儂......

Posted by limkianhui at 20:35 │TrackBack(0) │有ê 無ê

2005年09月05日

古早話，呣通放

最近，有一位號做 ke-bi-so· 啲老主顧，佇本站「新留話簿」hit-pêng發表一寡見解，雖然只是個人啲看法佮想法，所講啲嘛攏一寡算講咔粗淺啲道理，不而過，對當今儕儕儂來講，應該hám-hám有幫贈(pang-chān)。我是感覺講，即mái啲儂，透底看koâiⁿ無看kē，年久月深，soah 連一寡本然是誠淺白啲道理，嘛攏總放互 bōe記去。即款錯亂啲現象，講咔歹聽啲，oân仔算是一款「症頭」，叫做「群體失憶症」。
続きを読む

Posted by limkianhui at 15:04 │TrackBack(0) │有ê 無ê

2005年07月06日

MSN spaces

Téng go̍eh-ji̍t tòa MSN spaces sin-chhéng chi̍t-ê blog, chit-chūn siūⁿ-beh chhì-iōng khòaⁿ-māi, bô-gî-gō· soah tú-tio̍h chi̍t-kóa-á chōng-hōng:

Bōe-tàng sú-iōng "HTML" piau-chhiam, kóng sī ūi-tio̍h an-chôan khí-kiàn.
Chhōe-bô jī-hêng siat-tēng tī tá-ūi.
Siūⁿ-beh ka-kī siu-kái pang-bô·, chhōe bô lō·, kài-sêng bōe-tàng?
M̄-chai sī-m̄-sī tá-ūi chhau-chok sit-gō·, ti̍t-thàu kā góa that--chhut-lâi.Kàu bóe--á, soah liân teng-ji̍p to̍h bōe-giàn hō· góa teng-ji̍p, kóng bi̍t-bé chhò-gō·.
Hiō·! Hiám-hiám bōe-kì kóng, chit-ê MSN spaces kan-na IE chiah ē-tàng chèng-siông liû-lám, ká-sú nā iōng kî-thaⁿ ê liû-lám-khì, pò-chèng hō· lí "sa lóng bô", si̍t-chāi ū-kàu m̄-chiâⁿ...

Chin-chiàⁿ bô-la̍t! Lēng-ji̍t chiah lâi koh chhì-khòaⁿ-māi--leh.

Siu-soah.

Posted by limkianhui at 13:04 │TrackBack(0) │有ê 無ê

2005年07月06日

E-àm我會lia̍h-kông!!- -

Lín-niâ khah hó! Bōe-sóng! ....Siūⁿ beh chhōe chi̍t-ê bô lâng ê só·-chāi, tōa siaⁿ chhò-chhò--eh, kàn-kàn--eh.
"Bô lí sī tú-tio̍h kúi m̄?"
"Tio̍h sī tú-tio̍h kúi koh! "
Ū-kàu soe--ê lah, e-àm "樂多" bô hoat-tō·--ji̍p-khì, tàu-té sī cháiⁿ-iūⁿ lah? Tiān-náu bô būn-tôe, bāng-sok bô būn-tôe, bô kám ē tú-tio̍h kúi?
M̄-chiâⁿ!! It-tēng sī "樂多" hit-pêng ka-kī chhut chōng-hóng.
Chêng téng-pái "樂多" hām "Han-chî-tîn" ha̍p-pèng liáu-āu, góa to̍h lio̍h-á kám-kak pi-kio̍k teh-beh hoat-seng--a. In-ūi kúi-nā-nî lâi, "Han-chî-tîn" ê thâu-ia̍h góa to̍h m̄-pat phah-khui--kòe. Tiong-kok chit-pêng tiāⁿ-tiāⁿ chhut chi̍t-kóa-á àu lâng, chin-chiàⁿ khám-lān, kā hiah-ê gōa-kok ê bāng-chām lóng hong-só--khí-lâi, bōe-giàn hông khòaⁿ, tek-khak sī chin khám, khiàm lâng kiāu...Tòng-bōe-tiâu--a...
"Lō·-piⁿ jiō-tháng:....."
"Be̍h-lê-ko kòan: ......"
.....
Iá-koh leh tu̍h-lān...Kui-pak hóe bô tè sià...
Gōa ē lia̍h-kông
====================
Tē-jī kang chá-khí:
Bô-hoat-tō·, "樂多" kàu-taⁿ koh iá-bōe oa̍h--kè-lâi, beh án-chóaⁿ?
Cha-mî khí-gīn-sîn koh kā 水雞仔咯咯叫俱樂部 têng-sin chong-hông chi̍t-piàn. Chìn-chêng kám-kah [水噹噹部落格] hong-keh chin chán, chôan koat-tēng beh lâi hóng--i. Iōng khì 2 tiám gōa cheng ê sî-kan, kā sek-tī lóng-chóng chhiâu hó-sè, chho·-chho· khòan--khí-lâi, koh chiâⁿ-si̍t bōe bái, chhiⁿ-sek ê té-sek, pe̍h-sek ê jī-thé (chhiⁿ té pe̍h-jī), lú khòaⁿ lú sóng-sîn, lú khòaⁿ lú kah-ì.
Kî-si̍t chit-pái Blogchina kái-pán hiám-hiám tiāⁿ--khì, liàng-liâu ê lâng mā sī bōe-chió, hó-lí-kai-chài, bé--á, 方興東(Blogchina ê thâu-ke) chóng-sǹg ē-tàng the̍h-chhut i ê phek-le̍k, nā bô Blogchina hōan-sè ài tó-tàⁿ koaiⁿ-mn̂g. Put-jî-kò, pêng liông-sim kóng, nā beh pí-kàu Tiong-kok Tāi-lio̍k kah Tâi-oân ê Blog thok-kóan, góa iû-gôan ē khah khòaⁿ-hó Tiong-kok chāi-tē ê, gôan-in sī Tiong-kok ê blog thok-kóan khéng-tēng ē khah kú-tn̂g, khah ún; iah Tâi-ôan hit-pêng--ê, sui-jiân ki-su̍t siōng khah sian-chìn, bok-chiân ê ho̍k-bū oân-á sǹg bōe-pháiⁿ, m̄-koh, chóng-sī hō· lâng kám-kak chi̍t-chióng "bōe ún" ê kám-kak, kū-thé lâi kóng, èng-kai sī "siong-gia̍p-sèng siuⁿ tāng", chhut būn-tôe ê ki-hōe ke khah tōa. Koh-lâi, Tâi-oân ê bāng-chām tiāⁿ-tiāⁿ bô-kóng-bô-tàⁿ to̍h khì hō· Tiong-kok lâi kā hong-sak, che mā sī chi̍t-hāng tiōng-tāi ê hong-hiám.
Chóng--sī, bo̍k-chiân nā bô tiàm Tiong-kok chit-pêng chhōe-tio̍h koh-khah hó--ê blog thok-kóan, góa èng-kai ē koh kè-sio̍k tiàm 樂多. Taⁿ koh koan-chhat khòaⁿ-māi, khòaⁿ koh kòe--chi̍t-pòaⁿ-kang-á, 樂多 ē khoe-ho̍k chèng-siông--bōe? Nā bô, khiàm-chái ài koh poāⁿ chi̍t-pái.
Khó·-náu~~~

Posted by limkianhui at 13:01 │TrackBack(0) │有ê 無ê

2005年07月06日

觀前無頋後

安娘喂，今仔日(2005年5月29號)有够衰啦！規日若食呣着藥仔,大细项代誌,十做九朆成，真正拄著鬼...嚉昨暝开始,著略仔感覺呣著呣著...代先,是伫線頂看著一位咧 hông登記MT-blog啲所在,想講既然有即啰好空啲,赶緊來去登記一个...了後,隨寫一张电子批去交定(ka-tiāⁿ),前後用咔無两字久啲時間,批著寄出去也。今仔日透早,我早早着peh起來也,糜食食咧,着狂卟來看对方有回批抑無。呣成"網易",普通時仔着罕得看著伊出問题,哪会今仔日一透早著共我黜箠 (thut-chhôe)?迄(Hit)奇(kha)批桶,我開規晡,硬死開朆開! Kah hiah 奇,昨暝明明猶佫好好...真正是"急驚風去拄著慢病先生",咱卟緊,伊卟慢。好哩佳哉,總算開開也。無侬回批。白贼、哺舌，佫再去hông su̍t去。 Ah好也。。。应信(ìn-sìn)關關捒(koaiⁿ-koaiⁿ-sak)，無看著咔朆靳神(gīn-sîn)。

即阵soah有淡薄仔数念Pektiong兄晉前互我啲hit个bolg。講起來，hit个blog實在佮我真無缘，用無三工著随出代誌也，呣是真大條，干凋歹去爾，昑猶倒咧"加护病房"歇睏。

無議量，soah佫想著顶擺听侬讲“WordPress" oân仔朆bái。無，規去佫來去chhōe一个仔"WordPress"罔變弄看嘪。

想遘做遘。

即擺……唉，這"侬若咧衰，種匏仔伊著會生菜瓜"！昑也呣是咧陷眠睏無精神，注死呣死，偏偏仔去请(chhéng)著一垛(tè)"番仔地"，拢全寫番仔字，看拢無，卟變嘛變無路。

侬讲"緊纺無好紗、緊嫁無好大家"。我是"目睭花花，匏仔看做菜瓜"、蕃薯互我當作是芋仔。常在(chhiâng-chhāi)咧"lia̍h龟走鱉"，實在讲，這拢是朆晓"觀前頋後"啲代价。

Posted by limkianhui at 01:52 │TrackBack(0) │有ê 無ê

2005年07月06日

欠一張個人啲“頭頁”？

Chêng kin-nî 3 go̍eh chho· khí thâu-chi̍t-keng Blog kàu taⁿ, sio-liân-sòa iū-koh chhiâⁿ 4~5 keng--khí-lâi, chhan-chhiūⁿ “古井水鷄” lah, “六月無善北” lah, “快樂ê火車頭”lah, “杜蚓仔ê春天”...Si̍t-chāi put-chí-á giâ-kê. Súi-bóng thàu-tóe lóng bô iōng-sim leh chéng-choh (bô hit-ê sin-miā, chò bōe--kòe-lâi), m̄-koh chóng-sǹg sī chi̍t-chióng jîn-seng ê thé-giām. Góa chiah-ê blog, thàu-té sī iōng Bân-lâm-gú lâi siá--ê, tī Tiong-kok Tāi-lio̍k beh chhōe bô tē-jī ê neh! (Bóng chhàu-tōaⁿ--chi̍t-ē...

)

Taⁿ, ta̍k-kang án-ne chia sô-sô, hia se̍h-se̍h--ê, chóng--sī kám-kah chiâⁿ bô lī-piān. Ū-sî ē siūⁿ beh lâi hak chi̍t-tiuⁿ kò-jîn "thâu-ia̍h", chiong ka-kī chhiú-thâu hiah-ê blog lóng-chóng kā sa-sa lâi hē chò-hóe, chhiâⁿ-kek ka-kī ê phín-pâi.

Sī-kóng m̄-chai tá-ūi ū leh hō·-lâng chéng hit-lō "kò-jîn thâu-ia̍h"? Siūⁿ-beh lâi thàm-thiaⁿ, koh ā m̄-chai beh khì tá-ūi mn̄g...

Posted by limkianhui at 01:48 │TrackBack(0) │有ê 無ê

2005年07月06日

潮州侬走來minnan.wikipedia

Kin-á-ji̍t chá-khí, êng-êng bô chhòng-sáⁿ, chiâⁿ bô gī-niū, tiàm sòaⁿ-téng leh khô-lâi khô-khì, bóe--á koh se̍h tùi zh-min-nan.wikipedia hit-pêng khì. Bóng kiâⁿ bóng khòaⁿ, hiông-hiông khì bāi-tio̍h lâng tú-chiah siá--ê 1-phiⁿ bûn-chiuⁿ, tôe-bo̍k hō·-chòe "Tiô-chiu-oē". Chit phiⁿ bûn-chiuⁿ taⁿ tú khai-sí leh chhì-siá, lāi-tóe kan-ta 1-kù oē niā: "Tiô-chiu-oē sī Bân-lâm-oē gâi dôa gēh tēng gâi oē. Tâ Diô-jiǔ-oē gâi nâng sī kía Tiong-kok gâi Guāng-dōng sēng gâi nâng...". Āu--lâi, góa chiah chai-iáⁿ che sī 1-ê khiā tī Sin-ka-pho ê Tiô-chiu-lâng siá--ê,chok-chiá chhiam-miâ hō·-chòe Mr.Tan.
続きを読む

Posted by limkianhui at 00:25 │TrackBack(0) │有ê 無ê

2005年07月05日

網站簡介

今仔日，是好日子，新厝裝潢好勢，來入厝。（舊厝佇遮)

(無儂來贺禮，家己咧趁暢...)
続きを読む

Posted by limkianhui at 21:13 │TrackBack(0) │有ê 無ê

このページの上へ▲