鹭水芗南-闽南语部落

——「廈門老戰士合唱團」佮「廈門老朋友藝術合唱團」將卜聯合獻唱《正月點燈紅》佮《閩南漁歌》

厦门日报報導講，第四屆世界合唱比賽將卜佇咧今年（2006）年7月，坫廈門市隆重來舉行。為著卜互世界各所在的儂客 親身來感受廈門即座城市的風采，作為比賽的主辦方——廈門市，決定卜趁即擺的機會，kā 上kài 會當代表廈門的「閩南歌謠」展（show）出來互儂客欣賞。根據瞭解，現子時 有「廈門老戰士合唱團」佮「廈門老朋友藝術合唱團」當咧 kut力 排練做準備，按算講 時遘 卜 聯合 出場 表演。

報導介紹講，「廈門老戰士合唱團」佮「廈門老朋友藝術合唱團」攏總有150外个團員，年歲攏超過50，上老的80外。兩个團組合排練，時遘按當中選拔出100个比較咔優秀的團員上臺演出。廈門老朋友藝術合唱團首席指揮楊炳維介紹講，即擺參賽曲目是in超工揀的，會使講是閩南儂真正熟似的兩條民間歌謠——《正月点灯红》佮《闽南渔歌》。楊先生講：「廈門在地的民間歌謠真讚、真滂湃，噯好好來推捒……時遘，世界各所在的儂客來遘咱廈門，in當然會想卜瞭解廈門。廈門儂作為即擺比賽的主儂，定著噯將咱厝上kài正港的閩南傳統藝術chhoân出來互儂看。」  

按牛冬hia瞭解講逐年的公曆2月21號，是「國際母語日」。世間儂安排佇即一日來紀念人類各族群的母語。我咧想，chiah-ê逐年to互儂佇咧紀念的「母語」，應該m̄-nā包括現子時猶佫「活著」的語言niā，應該嘛是有包括進前已經「過身」去啊的「語言」，呣知我即个看法，著抑是呣著？  
続きを読む

日前，廈大（廈門大學）的學生組建的閩南語協會宣告成立。這是廈門大學自來頭一擺開辦佮閩南語有代治的社團。目前，「協會」已經有90名學生會員。協會負責人——自動化系二年級的學生葉炳悅介紹講，的目的，著是beh學閩南語……噯 會曉 講 閩南語，chiah通 做 一个 正港的 廈門儂；iah 有的 同學 本然 著 按算講 畢業了後 beh 留滯 廈門 bā頭路，學 閩南語，對來講，是teh為就業做準備。

根據瞭解，協會按算每禮拜組織一擺的活動，主要的任務，著是 教 學員 學 閩南語。

  

上讚的男女歌手拢台灣儂；专家透底认为厦门在地歌手呼音無正。

日前，由厦门广电集团佮台湾八大电视股份有限公司联合举办的头一届「『两岸』闽南语歌唱大赛」总决赛在厦门广电中心落幕。进前，「海峡两岸」拢总有8位歌手进入总决赛。即摆总决赛采用循环打擂台的方式，拢总安排8 场精彩的大车拼，最后拼出悬下（koân-kē / 高低）：查甫状元、查某状元全部去互台灣儂捧转去（phâng tńg--khì），chhun--ê六名歌手oân-á有 好头彩，有的摕着（the̍h-tio̍h）“上有潛力”的奖項；有的承着（sîn-tio̍h）“优秀歌手”的獎項。

比賽煞鼓了後，一寡 做评委的台湾音乐人，对厦门赛区4位歌手的评价是：有一定的实力，不而过，上大的输面 是 chiah-ê歌手透底无经过专业训练，呼音无正，对歌曲本身beh表现出来的意涵理解无透。怹讲「台灣的语言环境咔赢唐山，闽南歌的历史加咔久长」，所以，台灣歌手对歌曲意境的理解会咔透徹。

ps. 看进前的报道—— （1）「中、台闽南语歌唱大赛」总决赛伫厦门举行 ； （2）「中、台閩南語歌唱大賽（復賽阶段，中国站）」  

２００５年８月１１号，本站有报道「中、台閩南語歌唱大賽（復賽阶段，中国站）」的消息。即摆，总算是遘kah正式决赛大车拼的坎站囉。１０月２１号暗时，即场「『两岸』闽南语歌唱大赛」总决赛安排伫厦门举行。中、台双方拢总８个脚数（kioh-siàu）上臺车拼。举办即项比赛的目的是「为双爿的少年侬伫咧歌唱艺术领域的交流搭一座平臺」。

另外，根据瞭解，目前，两爿的同行人士当咧走蹤，按算beh伫咧无偌久以後佫来举办一场「『海峡两岸』闽南语歌曲创作高峰会」，希望会当为「两岸」歌坛 加 写一寡仔优秀的闽南语（歌曲）作品。

ps: 参加即摆总决赛的歌手名单——

• 厦门：陈鹭虹（相片［1］、［２］）、何珣薰
• 漳州：潘超、刘辉翔
• 台灣：林良歡（女）、黄紫誼、朱海君、庄振凯

  

　　泉州市第一間專業的閩南語電臺佇2005年9月29號頂晡正式成立，臺號是「刺桐之聲」，電臺的頻率是調頻FM105.9（中波105.9兆赫）。這是泉州市頭一間對台宣傳的閩南語電臺。

　　根據瞭解，「刺桐之聲」廣播電臺的頂司是「泉州人民廣播電臺」，節目形式主要包括新聞、音樂、娛樂；節目特色定佇咧宣傳閩南在地文化。 目前開播的節目具體是：早起聽新聞、咱厝好歌大家聽、海峽兩岸、歡喜著好、厝邊頭尾、月娘月光光、草蜢弄雞公……  

2005年8月下旬，九届泉州市政协召开第58次主席会议期間，有政協委員透露，《闽南语词典》（泉州腔）將beh佇兩年內出版。有消息講，自頂世紀90年代以來，泉州的語言工作者佇咧研究、整理閩南語（泉州腔）方面，已經取得一定的成果。不而過，soah為著經費的問題，一寡不止仔有價值的研究成果一直遘即陣攏無法度出版。

根據瞭解，2005年7月，由泉州市政協出面，抾和「華僑大學」、「泉州師範學院」、「泉州社科聯」、「泉州學研究所」等單位的專家，共同制定出一个挽救閩南語的近、中、遠三期規劃。詳細情形啥款，請逐家做伙來看sòa落去——

　　近期規劃（兩年内）：按算佇咧現有的研究基礎上，編寫《閩南語泉台對照詞典》。即本詞典的定位是「實用工具冊」。

　　中、遠期規劃（五年～十年）：集中儂馬，重點稽考閩南語的語源，最後的目標是出版綜合性的大辭典。

　　華僑大學文學院阮長、閩南語古漢語研究學者王建設教授介紹講，現子時，上大的問題猶原是經費，只beh錢項會當得著保障，明年（2006年）年底著會通來出版即抱《閩南語泉台對照詞典》。


p.s. 參考消息——《闽南话漳州腔词典》明年底出版  

「保持共産黨員先進性教育」，現子時，即句話佇中國大陸真夠時行，差不多大儂囡仔通儂知；無瞭解啲儂，實在無幾个。若即个「保鮮」到底是「保」啥物碗糕咧？罔看māi，汝著知。

是講，我ioh像即款議題，儂客倌穩當咔無興趣。Taⁿ，beh瞭解、呣瞭解攏無要緊，橫直，講咔歹聽啲，KTS咧講話，是bē輸咧搬電影—— 一套一套。

好。來報告一條新聞。未看進前，若有儂身體確實有咧無爽快，或者是拄好胃腸糟糟 想beh吐啲，建議先去外口吐吐啲，等咔sù-sī了後，chiah佫轉來看紲落去。這是佮汝講正經啲，呣是咧滾損笑，若有得失，請多多包涵；iah若堅持呣聽我苦勸，小等啲 若真正吐kah規身軀 全全是，安呢，汝著呣通kā我訐譙兼詈罵、怪我無kā汝講代先。（講實在啲，正實是因為連我家己嘛強強beh看bē落去_..._）

新聞：廈門市篔簹（Oân-tong）街道辦（全稱：街道辦事處，屬於一種「行政單位」），各黨支部，結合實際情況，采取一種吤有特色啲學習撇步，來咧開展KST黨員先進性教育活動，為各黨員啲學習提供了真大啲利便，嘛取得真好啲效果。街道辦啲機關黨支部，利用內部辦公網路，將學習材料、簡報、周報、hām一寡咔有代表性啲事例傳送互每一个黨員，互黨員會當通過網路，真利便著來實現學習啲目的。（利用網路來咧學習「保鮮」，真正是「一兼二顧，摸蜊仔兼洗褲」哩~~）佫來—— 嶼後西社區黨總支部，佫咔是來咧收集著《厦门日报》佮《厦门晚报》等報紙刊登啲、佮「保鮮」有治代啲材料，並且kā剪裁落來，製作成做一个「先進性教育學習園地」啲專欄。（這算報紙啲，chhoân便便啲，由在儂搬；即回是「鰗鰡巡便空」，攏免錢啲，正經是「俗佫大碗，倯佫有力」！）慢且是，猶佫有啲—— 岳陽社區黨支部嘛考慮著一寡退休啲老黨員聽無普通話，決定用「閩南語+普通話」來做一个「雙聲道啲放送」。（哇，安呢chhiâu落去，真正連 本成 著bōe曉通聽，抑是講 無想beh聽啲儂，嘛攏聽聽入去啊。我苦！呣聽嘛bōe-ēng--tit，有影苦惱~~）  

「中、台閩南語歌唱大賽」（两岸闽南语歌唱大赛）復賽階段，佇咧北京廣電中心hit間成千 m²闊啲演播廳舉行，攏共20名參賽者參加復賽，最後選拔出4名優勝者。根據瞭解，即4名優勝者將beh代表中國大陸方面，佇咧今年8月25號即工， hām來自台灣啲4位高手同台比試、見公母。這以外，即擺復賽進入前6名啲歌手，攏總有資格直接進入明年啲「第九屆閩南語青年歌手電視大賽」。

「中、台閩南語歌唱大賽」是由厦门广电集团佮台灣八大電視股份有限公司聯手主辦，時遘，來自中國佮台灣啲參賽者共臺比試（歌藝）啲過程將beh安排佇厦门电视台佮台灣八大電視台siâng時播出。台灣八大電視股份有限公司節目部監製黃朝亮介紹講，兩爿啲電視台做夥製作綜藝節目，並且siâng時放送，會使講是開世代啲頭一層，這標志著雙方面啲交流已經步入一个全新啲坎站。往早啲資訊交流，差不多攏是民間藝術佮宗教界啲事務咔儕，並且一直攏無「大眾傳媒」來咧插骹。即擺電視台之間啲合作，不但影響力大，而且效果嘛是誠讚。

「中、台閩南語歌唱大賽」決賽，按算采用拍擂臺啲形式進行，攏共beh錄製8檔節目（每一檔算一期）。佇咧每一期啲節目當中，即8位參賽歌手，每一儂必須噯演唱兩條自選啲閩南語歌曲；比賽結果會佇最後一期節目中公佈。也著是講，每一个上臺啲參賽者上少攏噯準備16首歌曲，才有法度完成整個啲比賽過程，這對參賽者來講，嘛算是一个考驗。根據瞭解，為著beh保證節目播出會當達到一粒一啲品質，台灣方面特別邀請著上吤優秀啲燈光、攝像佮導播來配合節目製作；聽lih 講，其中著有台灣綜藝界啲首席顧問兼製作人曲威。

P.S：以上消息啲來源——《廈門晚報》 （Ē-MN̂G BOÁN-PÒ）  

頂幾日，講起「POJ / TLPA khioh-hô」啲代誌，探聽著一寡消息，已經攏有登出來互儂看啊（猶無瞭解啲，請看）。不而過，照看這應該只是一个初稿nā-niā。今仔日，又佫佇kāng一个「放送頭」，聽著佫咔詳細、佫咔具體啲結論。猶原是報互逐家進一步來瞭解，原文如下——  
続きを読む

佇〈廈門日報〉看著啲——

[趣事报料]普通闽南人

(2005-07-27 10:56:07)

女儿小允今年五岁。这是一个爱问各种问题的年龄。

一天，小允问妈妈：“妈妈，为什么奶奶讲闽南话呢？”


我爱人回答：“因为奶奶是闽南人啊。”小允又问：“我只会讲普通话，我是普通人吗？”我爱人哈哈大笑：“对，你当然是个普通人。小允，你爸和我既会讲普通话，又会讲闽南话，我们是什么人呢？”

小允说：“你们是普通闽南人。”

文    陈一端

呵呵呵，哼哼哼……這敢是「笑詼話」？佫竟然下(hē)佇「趣事報料」即个專欄！這个社會已經無正常啊，一个「破病」社會……無話通講，煞。  

以下啲信息來自《深愛台灣xoops》

李勤岸教授的報告：
Cheng-hap chhut-lai e Tai-lo kan-tan kong si:

1. TLPA tap-eng beh su-iong POJ e tiau-ho.
2. POJ tong-i beh kai "kai-im", oa, oe > ua, ue; ek > ik, eng > ing (put-ko eng kap ek iau u po-liu cho hong-gian-im e piau-ki)
3. Siong-hong long tong-i that-chhat-im su-iong IPA e ts, tsh, iah-chiu-si POJ, ch, chh TLPA e c, ch long kai-cho ts, tsh.

I-siong po-ko.

peng-an,
khinhoann　

  
続きを読む

《厦门日报》（2005-07-04）啲消息——

根據中新社啲报道，由台盟福建省委、福建省政府台辦、漳州市政協協助中國出版科學研究所卟來編寫啲《闽南话漳州腔词典》（下底簡稱"《词典》"），目前已經被列入2005年度中國國家出版總署啲一項重點科研課題。現子時，《词典》已經開始編寫，按算卟佇2006年啲年底，由國家出版社正式來出版。

《閩南話漳州腔詞典》啲主要編寫人、廈門大學啲周長楫教授介紹講，閩南語是古代中原語言啲“活化石”。目前，整個閩南語系（筆者添注：包括漳泉語、潮州話、浙南閩語、閩西龍巖話、海南話等等）啲總人口超過八千萬儂，其中包括中國大陸、香港、澳門佮台灣在内，拢總有五千外萬儂；這以外，佇東南亞佮其它番邦所在，嘛佔三千外萬儂。

根據資料啲記載，現子時台灣啲漢族，量其約有三分之二啲儂，祖家佇閩南，其中漳州府啲著佔了一半咔加（筆者添注：偆另外一半算泉州府啲）。周长楫教授長期咧調查佮研究台灣閩南語，伊講，即陣台灣咧講啲閩南語，大多數啲語詞，根頭是漳州腔。  
続きを読む

共款是即條“漚古调”，咔唱嘛即條。台湾闽南语三大拼音车拼幾若冬，到底啥侬是老大，今年新暦八月尾，见公母。

消息源头：http://www.libertytimes.com.tw/2005/new/jun/15/today-life6.htm。

基本上，这是一層真无聊啲代誌。无聊kah親像“乞食相爭巷仔”。

啥物碗糕“教育部”？宣布政令，若像hit号"pûn螺賣猪肉"，行遘叨，喝遘叨，賣遘叨。膦神“教育部长”，根本也呣捌一箍芋仔蕃薯，瘟痀咧假徛泅；bōe仙假仙，牛膦咧假鹿鞭！互即款侬做教育界啲头侬，莫怪怹台湾社会會遮乱。

台灣鱘——無膏!

两光！  

根據有關方面佇咧報道講，即抱法規將會考慮閩南語啲特殊情形，beh來發揮閩南語佇對臺工作中啲跳梆效應。根據了解，立法啲工課(khang-khòe)實際已經佇2005年年頭來啟動。

為著beh順利來進行即項工作，昨昏(6月2號)，由全國人大教科文衛委員會佮中國教育部聯合佇廈門召開會議，邀請著全國人大常委會委員、教科衛委員會副主任委員邢世忠，福建省人大常委會副主任黃賢模，廈門市領導林明鑫、郭振家，hām-kah教育部有關部門啲頭家等等啲人物共同來參加。

根據了解，中國已經佇2000年頒布《国家通用语言文字法》。遘kah現此時，嘛已經有12个省市根據《国家通用语言文字法》制定了符合地方實際情況啲"地方語言文字法"。不而過，福建並無佇chit12个省市內底。福建省即陣當咧加緊制定《福建省貫徹〈國家通用語言文字法〉啲實施辦法》。有關官員表示講，佇咧制定即抱法規啲時，將beh考慮閩南語啲特殊性質，beh來發揮閩南語佇對臺工作中啲“親情效應、跳梆效應”。  

2005年5月1號，中國國民黨主席連戰踙(chhōa)伊啲某囝序细，來遘西安清凉寺迄搭(hit-tah)培墓(pôe-bōng)，這是怹阿嬷啲墓地。聽講，從(chêng)阿嬷过身了後，連家六十外年來無侬來过。連戰趁著即擺訪问大陸，专工來遘西安，有一个真重要啲原因，着是卟來拜墓。這應该嘛是"呣去漳州，卟去西安"啲主要原因。

假使讲，親情需要用语言來寄托，若安呢，即种语言定著是母语。時間经过一甲子咔加，做囝孙啲，頭一擺倒轉來拜祖，心肝頭迄种講朆出來啲艰苦佮遺憾，干凋母语，干凋祖公传(thn̂g)落來啲话，才有法度表达。

5月1號早起，连战踙伊啲某囝，徛踮阿嬷墓庭(bōng-tiâⁿ)啲面頭前，選擇用阿嬷教伊啲閩南語，嚉阿嬷说出"序细内心啲感恩"。伫即个离故乡千万里远、四界听無乡音啲所在，虽然只是简单啲三两句话，卻是深深來感动着随行啲闽南记者。

连战对逐个讲起，阿嬷一世侬干凋会曉讲閩南話。

伫阿嬷啲墓前，伫“祖德遗芳”啲下骹，連戰用阿嬷聽有啲鄉音來讲起：

“今仔日，我踙牽手啲，佮囡仔序细，来西安，来祭拜我啲阿嬷，这是60外年头一擺，对我来讲，即个意义重大。60外年，实在会使讲是真久长啲时间，不而过因为过去，中国啲即种情形，互阮遮个序细做朆遘，拢无法度來祭拜我啲阿嬷。今仔日有即款啲機會，真正足感动啲，足感恩啲，我想卟讲，阿嬷伫遮，咱做囝孫序细啲，有责任好好仔來看顾即垛(chit-tè)阿嬷歇睏啲所在，长期歇睏啲所在。所以，今仔日，有遮呢仔儕啲好朋友，來参加即个简单啲祭拜仪式，我卟真心來感谢逐个，感谢。”

(注:即段話呣是連戰啲原話，只不过意思共款爾。站長我無咧看电視，無聽著連先生啲原话录音，我是按報纸頂面啲華文直接翻做閩南文啲.)

卟离開“阿嬷”啲時，連戰表示講，此去，若有機會會佫來。  

閩南俗語話、囡仔歌（華语：童謡）是咱鄉土文化啲一粒珍珠。不而過，晉前伫咱福建却是真少有儂共即粒珍珠看作是寶，珍珠嘛安呢直透咧褪色……

廈門晚報啲消息：現此時，伫廈門，開始有民間組織來咧關心即寡仔强卟互儂放朆记啲鄉土文化。伫集美區啲灌口鎭，有一陣熱心鄉土文化啲儂，當咧即搭“抾秞屑”(khioh-tiū-seh)，按算卟伫今年啲熱儂、學生囡仔夏令營啲時陣，將所粒積、編录啲鄉土教材搬上課桌仔。詳細啲情形，請看新聞啲報道。

即條新聞報道，有講遘：儕儕閩南語無法度用漢字寫出來，互儂加真困扰。這…講起來oân仔實在話啦。即篷(phâng)熱心"補破網"啲儂，雖莽有心，不而過，普通時仔犯勢咔無咧研究閩南語，所捌啲原在真有限。

若是怹即寡儂有卟來學白話字，用白話字來添補漢字啲欠點，安呢來講，應該朆佫有困扰。不而過，事實佮咱映望啲完全顚倒反。

有時仔，我實在足怨嘆。哪會攏無儂卟來學？哪會遐儕儂攏看懸無看下(kē)？哪會逐个攏有福呣知通受？哪會安呢超工目睭激覷覷(chhuh-chhuh)，豬頭呣頋卟頋鴨母卵？

實在有够討債啦！珍珠當作鳥鼠仔屎……

用白話字配合漢字來記录"囡仔歌"、記录“俗語話”，實在輕鬆又佫利便。是安怎近路呣行,行彎路、有路呣行,行山坪(soaⁿ-phiâⁿ)？

我聯络朆著即陣儂，無法度共怹鬥相共，無法度牽怹行入來白話字啲地頭。

有力駛無路，我嘛咧捶胸坎……  

《厦门晚报》今仔日有一篇消息——《厦发现闽南语字典手抄本：出自10多岁孩童之手》。最近即暂仔，三五不五時会听着讲叨位又佫发现“古早闽南语字典”。看看听听啲，透底拢是清朝尾啲古董。透底用类似“反切音”啲撇步來咧记录漢字啲（闽南语）读音。

即寡字典相连紲去互现代侬“发现”着，说明讲清朝、民国啲时代，伫闽南民间，确實有影定定采用在地语言來咧教学。迄阵仔，会捌官话啲侬定着真少，先生教册、学生捌字，透底用在地语言。

不而过，即暂仔互侬“发现着”啲即寡仔“字典”，實际朆使算是真真正正啲字典。是安怎卟安呢讲咧？汝看，遮个“字典”，平平用“反切”来记录讀音，呣佫怹所收啲字、所记录啲音，根本無法度掺晉前迄三本名声thàng北京啲权威相比并(pí-phēng)。我讲啲迄三本权威，一本是记录泉州音（南安？）啲《彙音妙悟》（LŪI-IM BIĀU-NGŌ·,黄谦）；另一本是记载漳州在地音啲《汇集雅俗通十五音》（HŌE-CHI̍P NGÁ-SIO̍K-THONG SI̍P-NGÓ·-IM,谢秀岚）；佫一本是记载漳厦雜濫腔啲，号做《渡江书十五音》（TŌ·-KANG-SU SI̍P-NGÓ·-IM,无名氏）。卟讲即暂仔发现着啲即几本古册是“字典”，不如讲是“工具册”咔有道理。字典oân仔是一种工具册，不而过工具册不一定拢有法度达到字典啲深度。即种啲工具册相连紲來发现着，说明當當時(tng-tong-sî)伫民间，原在是不止仔時行，而且又佫hàm-hàm有實用價值；嘛聽好(thèng-hó)说明安呢啲一个道理：伫北仔话猶未传來咱厝晉前，咱侬(闽南侬）着是安呢一直透咧使用即款闽南语工具册來咧捌字、记字、讀册。伫民间，即款工具册该當算是一种真普遍啲傢俬頭仔才着。只不过，後來北仔话时行起來(其實是一种语言同化!實在讲，有够拗蠻！)，闽南语那來那(ná-lâi-ná)“無價值”、那來那“無路驶”，即款工具册才來退出着历史啲戏台，佫來着chôaⁿ匀匀仔老去(lāu--khì，死去/無去)。  

一个拄拄掛牌啲民間組織，主要宗旨是：推廣佮宣傳閩南文化；創作佮演唱閩南語歌曲。

閩南音樂藝術交流協會佇廈門起家，面向閩南語地區，一切熱愛閩南文化啲儂，無論嚉叨位來啲，攏會當申請加入協會。現主時，已經吸收30外个成員。

此去，協會將卟籌備、安排一寡咔大型啲閩南語歌曲交流比賽，推廣閩南語歌曲，選拔優秀啲閩南語歌曲演唱人，共怹包裝、宣傳出去，目的是卟互閩南語歌行入少年家啲世界。

即个協會咧卟成立啲時陣，得著臺灣高雄市閩南歌謠戲曲交流協會佮滾石文化傳播（廈門）有限公司啲幫贈，將大陸閩南語歌曲《同唱一首歌》成功牽去臺灣全聲音樂網廣播電臺放送，互臺灣儂嘛會當聽著福建在地啲閩南語歌曲。

消息啲源頭—>廈門晚報.  

暗光鳥ê厝，今仔日有介绍册，這是一本個人回憶录。册名號做《细漢ê時陣》，原作者是“尤榮坤”。即本册上早是出版伫1996年，不而过听讲迄當時真少侬來轉去看。现主时，有热心啲社会人士，已经共即本册啲电子版处理好勢也。昑伫線頂有提供互侬閱讀（伫遮：http://iug.csie.dahan.edu.tw/TG/chu/soehan/soehan.asp）。册啲语言寫了吤朴實、吤實在。卟看，绝对会值咧！

册是用闽南语寫啲，若朆曉讀闽南语文啲，伊看無是正常啲代誌，he着假若(kán-ná)我朆曉讲日本话、看無日文。我是日本语啲青盲牛。凖講有儂看無闽南文，伊着是闽南文啲青盲牛，這道理共款。