鹭水芗南-闽南语部落

【說明】 《廈門話文》（作者：李熙泰／許長安，《廈門文化叢書》系列，鷺江出版社）有一段文字，專題介紹「閩南白話字的正詞法」，是根據中國淩远征先生的作品——《闽南白话字的分词连写》即篇文編寫的。今仔日，咱按算用閩南文，佇chia來kā伊做一个簡單的介紹。

正詞法的規則

閩南白話字講究「分詞連寫」，連寫的時，采用短橫（" - "）連接多音節的語詞。白話字分詞連寫的規則如下：

1、名詞

（1）單純名詞
單音節的單純名詞，分寫。比論講：儂、馬、天、樹。→（lâng, bé, thiⁿ, chhiū.）
多音節的單純名詞，連寫。比論講：葡萄、和尚、哥倫布、西班牙、彌賽亞→（phû-tô, hê-siūⁿ, Ko-lûn-pò·, Se-pan-gâ, Bí-sài-a）

（2）合成名詞，連寫。比論講：聲音、朋友、天地、父母；烏雲、懸山（高山）、頭毛、禮拜堂、天光、年老

→（siaⁿ-im, pêng-iú, thiⁿ-tōe, pē-bú; o·-hûn, koâiⁿ-soaⁿ, thâu-mn̂g, lé-pài-tn̂g, thiⁿ-kng, nî-lāu）

（3）名詞+附加成分，連寫。比論講：鳥仔、金鏈仔、日頭、老母 →（chiáu-á, kim-liān-á, ji̍t-thâu, lāu-bú）

（4）名詞重疊（têng-tha̍h），連寫。比論講：時時、日日、年年、儂儂（人人）。→（sî-sî, ji̍t-ji̍t, nî-nî, lâng-lâng）

（5）專用（專有）名詞。
①　姓佮名，分寫。比論：劉／邦、洪／秀全。→（Lâu Pang, Âng Siù-choân）
②　稱呼，nā單音節的，連寫；nā多音節的，分寫。比論：孔子、秦／始皇。→（Khóng-chú, Chîn Sí-hông）
③　地名。單音節的專名+通名，連寫；多音節的專名+通名，分寫。比論講：中國、黃河、大清／國、台灣／海峽。→（Tiong-kok, N̂g-hô, Tāi-chheng kok, Tâi-oân hái-kiap）

（6）方位詞。
單純方位詞，頭前有名詞，連寫。比論講：天頂、火中、水底、門口、頭殼頂。
→ （thiⁿ-téng, hé-tiong, chúi-tóe, mn̂g-kháu, thâu-khak-téng）
合成方位詞，佮其它的語詞配搭，分寫。比論講：土地／裡面、百姓／中間、降生／了後、亞非利加／以外。
→ （Thó·-tōe lāi-bīn, peh-sìⁿ tiong-kan, kàng-siⁿ liáu-āu, A-hui-lī-ka í-gōa）  
続きを読む

【說明】 本文內容，是按《廈門話文》（作者：李熙泰／許長安，《廈門文化叢書》系列，鷺江出版社）摘錄落來的。自底是華文，咱將伊改編做閩南文。

（一）翻譯中國古書（古籍）的目的

早期（量其約仔 是十九世紀尾，二十世紀初），白話字（POJ）猶佫佇福建南部流傳的時陣，主要是互儂用teh翻譯聖經、聖詩chiah-ê佮教會有治代的冊，用來編印一寡天文、地理、數學、生理學等等的科學讀物。這以外，佫捌用來翻譯中國的古冊、名作，比論講《四書》、《三字經注解》、《通鑒要略》等等。

用閩南白話字翻譯中國古代的名作，目的主要有兩个：第一，為著幫贈（pang-chān）教徒（食教／落教的儂）學習漢字佮中國文化（漢文化）。第二，嘛是為著beh用基督教的教義來「糾正」儒家學說。過去，白話字雖然佇教會裡中真普遍，不而過，行出教會，外口猶原是漢字的世界，教徒准講會曉白話字，嘛是kan-na有法度讀hiah-ê用白話字寫的冊niā，nā拄著漢字，猶原是呣捌，猶原是青盲牛。對大多數的教徒來講，總是噯適應中國社會即个大環境，噯去學習漢字、瞭解中國古代的文化。不而過，中國的古冊，伊的內容（主要是儒家思想）透底佮基督教的教義有對kê，甚至相違背。所以講，也beh翻譯中國古冊，也beh用基督教教義「批判」儒家學說，這是當時教會必須噯去做的一項任務。《三字經注解》的作者維饒里，佇咧《論三字經本文的體統和三字經新撰白話注解》即篇文裡中（lāi-tiong）講kah真明，伊講：「中國冊，所議論的代誌有真儕攏無合（ha̍h）上帝的真理，所以設使教會nā是無用心剔除（thak-tû）hiah-ê 無正確的教示，著會互儂感覺錯亂，又佫迷茫。坫學堂，假使 硬硬 著用孔子的冊，就應該噯來改正冊底hiah-ê『無合』的所在。即本《三字經注解》著是beh互儂知影上帝的真理佮聖賢的教示有啥物無共款的所在。」  
続きを読む

按咱閩南的風俗，正月初二是「囝婿日」，泉州所在，嘛有叫做「查某仔日」。嫁出去的查某囝攏噯（chhōa）著尪婿佮囝兒，倒轉去外家，共（kā）父母拜年，hām兄弟姊妹相見面，一家伙仔團圓，鬧熱滾滾。儂講 查某仔伴門戶——鬧熱，精實有影；嘛有講，「惜花連枝愛，丈姆婆仔疼囝婿」，做儂的囝婿，也著去互丈姆婆仔挲頭殼，互汝（bōe）免得。
　　
呣知是啥物朝代，叨一个時陣，有一家伙仔儂，厝裡三个查某囝攏嫁出去囉，阿大的嫁一个讀冊儂；第二的嫁著賣魚的；煞尾仔第一歹字運，去嫁著一个扛棺材的悾戇囝（khong-gōng-kiáⁿ）。大囝婿有學問，看起第二囝婿佮第三囝婿，嫌呣捌字、土公氣（khùi）。第二囝婿有錢，嫌大囝婿窮赤（kêng-chhiah）兼凍霜，嫌 細漢囝婿 戇 佫 倯（gōng koh sông）。第三囝婿虽然是半（khám），做儂也忠直、古意，呣敢嫌東嫌西，咔認戇。  
続きを読む

——照泉州閩南（語）文——《查嫫仔賊（Cha-bó·-á Chha̍t）》改寫

咱做父母的儂，對囝兒，逐个攏真心致意，十囝十惜，疼命命。現時政府kan-na允准生一个，父母疼，阿公阿嬤疼，外家公外家嬤嘛疼……真正是「六个大儂扛一个囡仔，疼kah呣捌寶」。即陣的囡仔嬰，自細漢著安呢誠kā寵恿（théng-sēng），nā生著cha-bó·--ê，是可比小公主；iah-nā生著 cha-po·--ê是可比小皇帝。事實，囡仔呣好傷寵恿，儂講「恿囝不孝，恿豬攑灶」，真儕囡仔攏是自細漢無ka-tiuⁿ，無雕啄，大漢了後往往著變款變相，對父母不孝，忤逆（ngó·-ge̍k） 序大儂，事事顧家己，自私佫gâu激行。嘛有hit-lō做儂查某囝的，未嫁存私心，「食父穿母」，趁錢家己用；嫁了後，後頭厝nā 窮赤（kêng-chhiah），一骹tah（kha-tah）著無行骹遘；反倒轉，後頭nā 古意、好額，著品嫁妝，張（tiuⁿ）呣嫁，「一哭二鬧三吊脰」，橫直「無糖（kô）kah 有 秫米」，舞kah伊歡喜甘願，chiah beh上花轎。所以，儂定定咧講「嫁查某囝，咔慘著賊偷」。呣nā安呢niā，嫁了猶佫煞得，三日兩日 轉來挖（iah）外家，錢也好，物也好，苦得將規厝裡的家伙攏總搬搬、款款轉去。儂講「查某囝賊」，著是咧講即款的。當然，即陣時代無（siâng）囉，男女平等，平平攏有繼承權，嘛咔有以早hit款的見笑代來咧發生。不而過，雖然講即陣的社會有比往早咔文明，總是，囡仔nā無自細漢教示，實在來講，是害呣是愛。  
続きを読む

日前，廈大（廈門大學）的學生組建的閩南語協會宣告成立。這是廈門大學自來頭一擺開辦佮閩南語有代治的社團。目前，「協會」已經有90名學生會員。協會負責人——自動化系二年級的學生葉炳悅介紹講，的目的，著是beh學閩南語……噯 會曉 講 閩南語，chiah通 做 一个 正港的 廈門儂；iah 有的 同學 本然 著 按算講 畢業了後 beh 留滯 廈門 bā頭路，學 閩南語，對來講，是teh為就業做準備。

根據瞭解，協會按算每禮拜組織一擺的活動，主要的任務，著是 教 學員 學 閩南語。

  

（ 提供：全文語音檔案下載；看全文，線頂聽录音～）

---

內在的價值， bē 為著外部環境的變換 soah 來消蝕（ siau-si̍h ）去。金仔著是金仔，永遠嘛 bē 變臭鐵仔。

---

有一个出名的講演者。有一擺，伊佇咧做講演。伊 ùi lak 袋仔裡 iam 出 一張 二十箍銀 的 紙字，問在場的聽眾講：「即張是啥物紙？伊有價值無？」

臺骹有一个儂攑手回答講：「我知影， he 是一張二十箍銀的美鈔，這著是伊的價值。咱會當用即張紙字，佇國裡外的市場頂面換著等值的貨幣。」  
続きを読む

朋友 nā 是 常在（ chhiâng-chāi ）有 teh 線頂（網路）踅 chhit-thô ，儕少穩當有聽著「播客」即个講法。實實講，我嘛是最近 chiah 有聽儂 teh 講起啦。 Ah 照我看， hōan-sè 猶佫 hàm-hàm 儕儂呣知「播客」是啥物仔碗糕。雖然我 ôan-á 無 kài 清楚，所知影的實在真有限，不而過，咱共款是 beh 將家己所瞭解的，來 kā 朋友小報告一下（一支破雨傘，興展興展啦）。

Podcast ，伊的中文譯名猶未定型，目前，上儕儂 kā 翻譯做「播客」。伊算是一種「數字廣播」技術，初初出世的時陣，是倚靠（oá-khò ）一款號做「 iPodder 」的軟體（软件），結合 一寡 輕便型 的 播放器來咧操作。 Podcasting 所錄製的是一寡線頂廣播或者網路聲訊節目，網友會當將線頂的廣播節目掠落來，存滯家己的 iPod 、MP3播放器或者其它輕便型的數碼播放器裡中，隨時聽好（ thèng-hó ）欣賞。不而過，這算講 kài 普通，應該呣是 Podcast 上主要的特色。對 Podcast 來講，上 kài 有意義，或者講上 kài 有趣味的代誌是，網友（播客）會當將 in 家己的錄音檔案， hē 坫網頁頂面，分儂聽。安呢，每一「播客」攏會當將 in 的心聲， in 想 beh 講的話，或者 in 經過的代誌用錄音的形式，放送出來，佮眾儂做夥來分享。有儂講， Podcast 是一種有聲的 blog 。  
続きを読む

（提供：看全文，會通聽錄音，線頂現聽哦～）

---

顧名聲，咔好顧性命。為著名聲，歹儂有時也會覺悟變好儂。互儂一个好的名聲，等於賜互儂另外一个奮鬥的機會。

---

吳太太滯佇鼓浪嶼，三工前，伊倩一个女傭，按算beh倩來鬭拼掃，鬭洗蕩，鬭顧厝裡底。吳太太吩咐（hoan-hù）對方，佫過--兩工仔（讀輕聲）chiah來上班。

吳太太做代誌，在來攏誠細膩、誠慎重。為beh瞭解即个傭人（iong-jîn）的性素佮底系，吳太太專工撽電話去互即个女傭以前的主儂。不料對方soah 嫌kah無一塊著（bô chi̍t-tè tio̍h），攏講伊實在是 「pīn-toāⁿ 又佫 lām-nōa」。  
続きを読む

　　德化，是福建泉州的一个縣，坫佇福建中部戴雲山的山骹，算是泉州市轄區裡 上kài 倚(oá) 西北勢的縣分。德化腔算做是泉州音的一種腔口。今仔日，咱著beh來記錄一寡仔 德化在地的「五色話」。（泉州儂咧講的「五色話」，著是普通話的「歇後語」。台灣儂講號做「孽khiat仔話」。這算是地方俗語，因為真正kho̍k-khe、激骨，所以，又佫號做「激骨話」）　  
続きを読む

下底chiah-ê泉州在地的俗語話，有的是按《福建之聲》線頂中文論壇盤過來的（原初是記錄佇泉州庄秋贵先生的《庄秋贵俱乐馆》）；猶佫 有的 是 按《深滬教育信息網》盤過來的。雖罔是号做「泉州在地俗語」，不而過，大多數佇廈門、漳州、台灣chiah-ê所在攏有通用。總是，nā 形式相親像，或者是講意思咔倚近的，在下我oân-á會憑著家己的印象儘量kā補添入去。不而過，實實講，有個別的俗語，我oân-á算講頭一擺「聽著」，實在小可仔sa無……敬請各方的賢達鬭指示。

1. 水盘过瓯会消蚀 / chúi poâⁿ-kè au, ē siau-si̍h.
1-1. 水盤會蝕，話盤會儕 / chúi poâⁿ ē si̍h, oē poâⁿ ē chōe.（人们在传话的过程中总喜欢添油加醋）
2. 跋折骹骨食倒勇 / poa̍h-chi̍h kha-kut chia̍h tò-ióng。（跋：跌倒。倒勇：比原来更健。意喻因祸得福。）
2-1. 跋折骹骨，倒勇 / poa̍h-chi̍h kha-kut, tò-ióng
2-2. 跋折手骨，倒勇
3. 近香烧无芳 / kūn hiuⁿ sio bô-phang。（意喻不相信本地人才。）
3-1. 本地香， ( bōe ) 芳
4. 人若有本事，不在大细；山若有景致，不在悬下（高低 ）/ lâng nā ū pún-sū, put-chāi tōa-sòe, soaⁿ nā ū kéng-tì, put-chāi kûiⁿ-kē。
5. 水清鱼就现 / chúi chheng hû chiū hiàn。（水落石出）
5-1. 水清魚現
6. 精神狗，吠五更 / cheng-sî-kàu, pūi gō·-kiⁿ。（讥讽，意喻人们早知道的事你再重提，或不该你管的事你管过头了。）
7. 有一好，无两好 / ū chi̍t-hó, to̍h bô nn̄g-hó。（意喻不能各种利益兼得。）
8. 盆花无香，香花无盆 / phûn-hoe bô phang, phang-hoe bô phûn。
9. 好竹出好笋 / hó-tek chhut hó-sún。
9-1. 歹竹出好筍
10. 河水五路流，也会有尽头 / hô-chúi gō·-lō· lâu, iā-ē ū chīn-thâu。
11. 好酒沉瓮底 / hó-chiú tîm àng-tóe。（意喻好的事物出现在最后，或最后总会出现好的事物。）
12. 好花免惊无侬（人）摘 / hó-hoe bián-kiaⁿ bô lâng tiah。（免惊：别怕，不必担忧。）
13. 水chhē-chhē，泻落下（低）/ chúi chhē-chhē, sià lo̍h kē。（意喻事情全往一个人身上推。）
14. 船过水无痕 / chûn kè, chùi bô hûn。（意喻事情过后仍恢复原样。）
15. 倒剃, 咔痛 / tò-thì, khah thiàⁿ。（意喻事情乖张损失更大。）
16. 路头灯芯，路尾铁锤 / lō·-thâu teng-sim, lō·-bé thih-thûi。（意喻事情开头容易、轻松，坚持到底就艰难、沉重。）
17. 水着一路出 / chúi to̍h chi̍t-lō· chhut。（意喻任何事情终要有一个解决的办法。）
17-1.錢有一步（tháu）/ chîⁿ ū chi̍t-pō· tháu.
18. 一枝摇，百枝动 / chi̍t-ki iô, pah-ki tāng。（意喻事情连带关系。）
19. 神仙难救无命侬 / sîn-sian lân kiù bô-miā-lâng。（意喻犯了严重错误的人，无人可救他，或指病入膏肓者再有本领的医生也救不了。）
19-1. 神仙難救無命囝
20. 龙一尾, 咔好猴蚓一畚箕 / lêng chi̍t-bé, khah hó kâu-ún chi̍t pùn-ki。（猴蚓：蚯蚓。意喻只要一个有本领的人，较好一大堆无用的人。
20-1. 龍一尾，咔贏杜蚓一畚箕
20-2. 狗母蛇仔一畚箕 / káu-bó-chôa-á chi̍t pùn-ki。（比喻多而无用。狗母蛇仔：一种小型蜥蜴，比“杜定”还小。）
21. 有偌大的骹，穿偌大的鞋 / ū lōa-tōa ê kha, chhēng lōa-tōa ê oê。（意喻事物要从实际出发，量力而行。）
22. 四两破千斤 / sì-niú phòa chhian-kun。（意喻用简单的方法解决重大的问题。）
23. 船遘（到）江心補漏迟 / chûn kàu kang-sim pó·-lāu tî。（江心：江中。）
24. 舌仔是软的，事实是硬的 / chi̍h-á sī nńg--ê, sū-si̍t sī ngī--ê。
25. 恶侬（人）歪理侪 / ok-lâng oai-lí chōe。（济：多。）
26. 牛无力换横耙，侬（人）无理说横话 / gû bô-la̍t oāⁿ hûiⁿ-pē, lâng bô-lí seh hûiⁿ-oē。
27. 菜无盐无味，话无理无力 / chhài bô iâm bô-bī, oē bô-lí bô-la̍t。
28. 爸母生身，家己生心 / pē-bú siⁿ sin, ka-kī siⁿ sim。
28-1. 會生得囝兒身, ( bōe ) 生得囝兒心 / ē siⁿ-tit kiáⁿ-jî sin, bōe siⁿ-tit kiáⁿ-jî sim.
29. 一时想无遘（到），少年苦遘（到）老 / chi̍t-sî siūⁿ-bô-kàu, siàu-liân khó· kàu lāu。  
続きを読む

（全文語音檔案下載；看全文，着有通聽錄音，是線頂現聽的哦～）

---

「做牛著拖，做儂著磨」。咱佇咧社會上佮儂 盤nóa，目的 著是 beh 走（cháu-chhōe）一項適合咱家己的穡路。現子時的社會，第一欠的，是 hiah-ê 敢 挵破 時代佮歷史約束的英才。

---

敢衝敢拼、敢輸敢贏，敢做別儂呣敢做的代誌，即款的氣魄，實在是當今社會進步不可欠缺的動力。  
続きを読む

拿破侖少年的時陣，有一擺，伊去郊外拍獵。伊雄雄聽著河仔 hit 爿有儂咧喝「救儂」。伊趕緊走過去，一下看，河中央有一个少年的查甫囝當咧滾踜（ kún-liòng ）。其實河仔是無算闊，佫看 hit 个落水的少年儂佇 hia 骹踜手踜、浮咧沉咧，說明講河水 oân-á 呣是真深。拿破侖看安呢，心裡一時有主意。伊緊緊獵铳攑懸（koân），瞄准河中央 hit 个落水的儂，大聲 kā 喝：「汝 nā 佫呣 peh 起來，恁父一銃隨 kā 汝解決 tàn 掉！」 Hit 个落水的少年儂驚一下半小死，伊心裡一定咧想：慘囉，即sia 准講無互水 kek 死，嘛會去互拍獵的拍死…… Bōe 用的，我 bōe 用死，我一定 噯 peh 起去。自安呢，伊拼命按岸邊爬過去，真緊著 peh 上岸囉。

拿破侖用獵銃逼落水者爬上岸，是想 beh kā 伊講，家己的性命本然著噯家己來負責。連家己的性命著無才調負責的儂，不但無法度自救，別儂嘛無法度救伊。天公伯仔 kan-na 會當救助自力更生的儂。

做儂難免會拄著困難，不而過，嘛呣是逐擺攏行遘「進無步、退無路」，不可挽回的地步。有噹時仔，是咱咧面對困難的時陣，家己傷過頭青驚，未曾未（ bōe-chêng-bōe ）先落軟；抑無 著是將希望寄托佇別儂的身上， ǹg 望別儂來解救。咱從來攏無去想看咱家己是呣是有能力自救？戰鬥著猶未開始，咱家己 soah 先認輸，安呢永遠嘛 bōe 贏。

設使咱的雙骹是踏佇一个真不利的位置，安呢咱著呣通佫去數想（ siàu-siūⁿ ）別儂鬭幫贈（ tàu-pang-chān ），咱噯將一切的戇想（ gōng-siūⁿ ） tàn 掉，萬事靠家己。無米拄著儂 hēng 粿，世間親像即款的代誌，實在是真少。咱 nā 堅強，別儂 hoān-sè 愛來鬭相 thiāⁿ ；反倒轉，咱 nā lām 爛兼軟，儂著愈無愛插（ chhap ）。性命的戰場無同志，只有觀眾。 Hiah-ê 按困境行出來，最後出頭天的儂，的本事實在無比普通儂咔贏偌儕，不而過，比普通儂咔相信家己，靠家己的雙手去拍拼，最後得著成功。

議論：《國際歌》有唱講：「自來著無 hit-lō 救世主，也免靠神仙佮皇帝， beh 創造人類的幸福，全靠咱家己。」有影，咱只有對家己負責，別儂 chiah 會對咱負責，相信家己的儂 chiah 會通得著別儂的信任。佇茫茫的人世間，每一个儂攏有家己的性素，只 beh 骹踏實地、照起工做代誌，總有一工，會得展出家己的本領， show 出家己的風采。

  

---

咱 nā 想 beh 得著別儂的肯定，上好的辦法著是贏過對方，靠咱的實力來講話，呣通tok-tok 想beh ǹg望 別儂來牽成，真正會當 kā 咱鬬牽成的，呣是別儂，正正是咱家己。

有一个儂，伊真怨歎家己的穡路，對頭家的安排真無滿意。伊對朋友講：「阮頭家自來攏看我真無目地，另日，等恁父 nā 出頭天，絕對會坫伊的面頭前 kā tah 桌頂，大聲 kā 伊講『汝免佫hia-pai，恁父 bōe-giàn 做啊啦』！」

伊的朋友聽聽咧，soah kā 倒問講：「即間貿易公司汝敢完全瞭解清楚啊？ In 咧做 hit 款國際貿易的秘決佮一寡步數，汝瞭解偌儕咧？」  
続きを読む

LimKianhui/作

（口白）可怜代，互侬放捒的诸姥囡仔婴（cha-bó· gín-á-eⁿ）,伫咧苦苦等待心中迄个薄情郞,等遘腹肚渐渐大,犹原等无侬。孤不而将，姑娘那流着目屎，那来寄出着即张绝情批......

為汝寄出即张批,望汝斟酌看详细
Ūi lí kià-chhut chit-tiuⁿ phoe, bāng lí chim-chiok khoàⁿ siông-sè

呣是妾身无礼体,是汝梟雄太超过
M̄ sī chiap-sin bô lé-thé, sī lí hiau-hiông thài chhiau-kòe

當初愛汝少年家,郎才女貌有賜配
Tong-chho· ài lí siàu-liân-ke, lông-châi lú-māu ū sù-phòe

九龍江邊咱咒誓,生生世世行相倚
Kiú-liông-kang-piⁿ lán chiù-chōa, seng-seng-sè-sè kiâⁿ sio oá

汝今共阮睏年外,害儂腹肚渐渐大
Lí taⁿ kā gún khùn nî-gōa, hāi lâng pak-tó· chiām-chiām tōa

無面見儂厝裡蹛,日來相思暝牽挂
Bô bīn kìⁿ lâng chhù-lāi tòa, ji̍t lâi siuⁿ-si mê khian-kòa

不見我君阮厝來,音信全無為乜代
Put-kiàn góa-kun gún-chhù lâi, im-sìn choân-bô ūi-mih-tāi

月圓月缺月落西,呣知我君今何在
Goe̍h-nî goe̍h-khih goe̍h lo̍h sai, m̄-chai góa-kun kim hô-chāi

敢是梟心來相害,一片真情沉落海
Kám-sī hiau-sim lâi sio-hāi, it-phiàn chin-chêng tîm-lo̍h hái.

（口白）唉...讲着迄个碰肚短命的，阮著规腹火，怪阮懵懂，少年bōe晓想，互迄个碰肚夭寿骨骗去，佫共阮讲kah糖甘密甜.....遘即mái, 着亲像是做了一场的凶梦,醒来chiah知拢是咧空喙嚼舌...Hiau幸 哦....  
続きを読む