鹭水芗南-闽南语部落

今仔日，是好日子，新厝裝潢好勢，來入厝。（舊厝佇遮)

(無儂來贺禮，家己咧趁暢...)

*網站简介(Language: Amoy):

各位敬愛ê好朋友、鄉親序大，歡迎汝來“鷺水薌南”BLOG奉茶！遮是一个閩南語ê CLUB，頇颟頇颟ê我，著是即个CLUBêAdministrator啦。有緣佮汝來交陪，是小弟我ê福氣......小站，大概著是分做幾个專欄，比論講：“學閩南語”、“廈语文音”、“母語消息”、“講經説道”（母語研究）、“古册古典”、“在地歌詩”、“翻譯文學”，佮一寡“有ê無ê”....橫直，遮伫頭頁拢看會著。阮建議儂客，beh參觀本CLUB ê網頁，上好用Firefox ê瀏覽器（→[正體中文版，抑是简体中文版），這以外，建議汝tàu "Doulos SIL"即套字型（支持Unicode）。

*小歷史:

本CLUB前世是“古井水鷄”，西元2005年3月9號，佇博客中國起家。Siâng年4月9號，“古井水鷄”搬去臺灣“樂多BLOG”（2005年10月22號，「古井水雞」改名叫做「鷺水薌南」）。設立本站ê目的，主要是做備用咧考慮。

*站長简介：


總是噯小可仔自我介紹一下。小弟我是漳州儂，徛家伫廈門，親情(chhin-chiâⁿ)朋友拢叫我“阿輝”。Nā我ê嵗聲....這，儂講“三十往後，才知天懸地厚”，論實在ê，我 猶佫 呣知天地幾斤重。

*閩南語：

有ê所在叫做福建話，有ê所在叫做Holo話，iah nā beh論真講，著是漳泉語。閩南語是咱ê母語，是咱ê根本。不而过，真不幸，即陣伫咱福建南部，伫對岸臺灣，愈來愈儕ê儂共母語放捒。見擺講起即層代，小弟我是感覺真正艱苦心！Beh來共逐家報告一下，小弟我起即个網站是中國大陸第一个完全用閩南文寫ê網站。咱向望此去會當看著佫咔儕ê閩南語網站，特别是福建儂家己ê網站。

*腔口：

語言平等，無分好歹。廈門話、台灣話是標凖語；漳州話、泉州話是根本；廈門、台灣、同安，拢是漳泉濫。凴良心講，閩南、台灣是一个整體。小弟我是龍海儂，自細漢講漳州腔，大漢了後學會曉廈門腔、台灣腔，嘛加少了解一寡同安、泉州所在ê腔口。

*寫網頁:

我用漳泉濫(chiang-Chôan-lām)；網頁文字：漢字、白話字(POJ)。設使汝無了解"白話字"是啥，請參看中文維基百科全書相關ê介紹；設使汝有想beh瞭解白話字（POJ）ê書寫規則，請看小站ê介紹。Nā beh佮阮交陪ê，勞煩來去→[留話簿]。

*母語文聯播網：

佇遮，beh來kā儂客吹銷即个母語文聯播網。這是一个集合各所在（BLOG）閩南語文ê聯播網，互汝呣免去四界kho̍k-kho̍k趖，著通瞭解著每一工線頂上新、上讚ê閩南語文文章。

*阿輝ê地盤：

講實在話，nā電腦技能，我是無半撇。當初時，本然是想beh來去請一个“個人空間”來罔變弄，不而過，電腦智識、網路智識實在有咔欠，想罔想，正經nā beh做 是“有心無膽”。路尾，聽儂講寫網誌咔簡單一屑仔，自安呢趁儂時行起來……

~·~[六月無善北]~·~[快樂ê火車頭]~·~[=白水營=...]~·~[杜蚓仔ê春天]~·~[鹭水芗南（yamroodo)]~·~

感謝汝，祝願汝平安四序、歡喜趁大錢！