鹭水芗南-闽南语部落

Chêng-kúi-kang-á, ū khòaⁿ-tio̍h "Ē-mn̂g bóan-pò" (廈门晚報) teh pò-tō kóng tòa-tī Ē-mn̂g ê chhiⁿ-mî-lâng "A-liông" kun-kū í-chá ê Bân-lâm-gú koa 《Siang-lâng Chím-thâu》(双人枕頭) ê khiok-tiāu têng-thâu thiam-sû, liáu-āu iū-koh the̍h-khì lio̍k-im-pêng chhiáⁿ lâng ián-chhiùⁿ, lo̍k-im.

Bô-lōa-kú liáu-āu, chit-tè koa-miâ hō·-chòe "Kut-jio̍k Chêng-chhim" (骨肉情深) ê sin-koa thâu-chi̍t-pái tiàm Tiong-kok Tiong-iong Jîn-bîn Kóng-pò· Tiān-tâi pò·-sáng, tit-tio̍h chōe-chōe chāi-tōe thiaⁿ-iú ê khéng-tēng. Góa mā chin hò·ⁿ-hiân, chin siūⁿ-beh chim-chiok him-sióng chit-tè koa-khek, put-jî-kò kàu-taⁿ iau-bōe ū ki-hōe. Hiān-chú-sî, góa to̍h kā chit-tè koa ê koa-sû seng tah chhut-lâi hō· lán ta̍k-ê phīⁿ-phang--chi̍t-ē, kok-ūi lēng-ji̍t nā ū ki-hōe, mā thèng-hó ka-kī ta̍uh-ta̍uh-á khì him-sióng.

《骨肉情深》（阿龍作词）

KUT JIO̍K CHÊNG CHHIM

漢字版：

海峽兩岸兄弟姊妹,有閒來相找。手捧酒杯,祝福大家,平安日日過。汝佮我,汝佮我,共款啲血脈,也是我靈魂啲一半。呣管是盤山過海,咱嘛呣驚;呣管是千斤万斤,咱嘛敢擔。希望早日永遠作伴,等待的心,等待的心,汝敢會知影。

POJ:

Hái-kiap lióng-hōaⁿ hiaⁿ-tī chí-bē, ū-êng lâi sio-chhē, chhiú phâng chiú-poe, chiok-hok ta̍k-ke, pêng-an ji̍t-ji̍t-kè. Lí kah góa, lí kah góa, kāng-khóan ê huih-me̍h, iā-sī góa lêng-hûn ê chi̍t-pòaⁿ. M̄-kóan sī pôaⁿ-soaⁿ-kè-niá, lán mā m̄-kiaⁿ; m̄-kóan sī chhin-kin bān-kin lán mā káⁿ-taⁿ. Hi-bāng chá-ji̍t éng-góan chòe-pōaⁿ (chit-kù kán-ná ū koa-sû làu-kau khì ?) , tán-thāi ê sim, tán-thāi ê sim, lí kám-ē chai-iáⁿ.

PS. 閩南有一句俗語,號做"青盲精,啞口靈"...意思是凡若身體有缺陷啲儂(土話講號做"破相”啦），透底(thàu-té)有一兩步仔普通儂比朆着啲功夫。

 
“青盲精，啞口靈”，這其實呣是啥物歹話，不而過，因爲大多數“目睭無看見啲”佮“無法度開喙講話”啲儂，性地透底有咔暴燥(pok-sò)淡薄仔,儂講比較咔孤倔（ko·-khu̍t)啦，所以，有時仔,咱上好是嫑(mài)當面對有“破相”啲儂來講出“青盲精，啞口靈”辷句話,無,儂會講咱呣捌(m̄-bat)禮數。

儂講“歹馬嘛有一步踢”，破相啲儂，共款嘛是儂，只要肯打拼，肯骨力，怹共款嘛會當對社會有貢獻。話佫講倒轉來，有啲儂雖然“好骹好手”、“骹健手健”（kha-kiaⁿ chhiu-kiaⁿ）,不而過，卻是“活食死坐”、甘願“食飯khaⁿ中央”、七少年八少年，規日“卟食呣討趁”，坐蹛厝内底咧“櫻櫻美代子”，咧“搦虱母相咬”……汝講，辷兩款儂中間，啥款啲儂有路用，啥款啲儂無中用？