鹭水芗南-闽南语部落

Tī "Chhim-ài Tâi-ôan" chit-ê bāng-chām lāi-té, khòaⁿ-tio̍h chi̍t-phiⁿ Bûn-chiuⁿ, tê-thâu hō·-chòe "談台語漢字的費氣", chok-chiá sī 巫義淵, chāi-hā khòaⁿ liáu-āu, soah sán-seng chi̍t-kóa-á siūⁿ-hoat, sùn-sòa kóng chhut-lâi hō· ta̍k-ê lâng thiaⁿ khòaⁿ-māi leh...Ta̍k-ê nā-ū siáⁿ-khóan ê ì-kiàn, mā ē-tàng siá chhut-lâi saⁿ-kap (chò-hóe) hun-hiáng....

一、《談台語漢字的費氣》／巫義淵

這段時日教育部為欲推行台語文字漢羅政策，真濟學者專家攏跳出來發表家己的看法，對這個政策的推動，批評的比 o-ló(呵咾＝讚美)較濟。民主社會甚麼人攏會使得有意見，總是，台灣語文以及羅馬字，百幾冬來受盡外來政權的踐踏、壓制佮查禁，一直攏無法度有家己的主張抑是得着官方的幫贊，自從李登輝解放台灣以來，台灣語文問題已經爭論十數冬，敢會使得繼續爭論落去？向望大家三思。

本人研習台語常用漢字三十外冬，目前逐日猶用八點鐘以上的時間繼續咧研習，雖然到今仔日猶是一知半覺無所成就，總是論台語漢字讀音方面，本人的了解應該是一般水準以上，相信漢字讀音的問題，不是一般社會人士無了解但定[nā-tiāⁿ]，連多數學者專家亦佮我共款「一知半覺」，這亦是台灣社會普遍存在的嚴重問題，教育當局有需要用羅馬字來做適度的調和佮補救。

有人講ABC 是外國的文字，提來台語使用無合軀(ha̍h-su)，若按呢講漢字敢是臺語文字？台灣人有偌濟純漢人，台灣的話(包含客話原住民語)敢是純漢語，它佮漢語有偌大的淵源？用這幾點來思考就會當了解漢字嘛是借來的。敢有人曾想着：自動車、飛行機，電話、電火、電風、冷氣、電視、電腦等等千百項，無一項不是對外國搬過來的，為甚麼大家攏用到彼呢歡喜，甚至無時不刻攏無法度離開這寡國外提來的文明！敢講華語不是外來語？大家攏嘛是咧講咧用；英語嘛是外國來的，為甚麼大家攏欲學，這寡專家攏咧使用嘛無人敢反對，凡種種言行就會當看出真濟人的無正常心態。
漢字使用上確實有真濟費氣(麻煩)的所在，除了真濟在地話佮外來語，無法度用漢字書寫以外，就算是漢語的漢字亦共款真歹分別清楚，下面舉幾個讀音例來請教各位漢學專家。

追繳，矰繳，袞繳，品質，人質，樹林，樹人，肯定，肯綮，畫圖、畫分，繆種、繆然、繆絰，實施、布施、施然，奧妙、奧神、奧熱，殄瘁、殄滅、暴殄、自首，借錢、借機、借故，推薦、推辭、推掠。

頂面這三十句讀音，台灣兩千三百萬人，有幾個人分別會清楚？若用羅馬字來寫，相信每一個人攏會曉分到足清楚。漢字有數萬字，類似這款的字詞數量算不清，筆者手邊的常用字，亦有上千句。據專家研究報告，一個人若欲精通漢字，大約愛費心三四十冬，這是一個不爭的事實，莫怪中國會將漢字簡化，相信有伊的道理存在。個人的感覺，使用羅馬字就親像人的目chiu 無好，就配一枝目鏡來掛，耳孔若重，就買一個助聽器來用，共款，漢字無夠用抑是過頭深奧be-hiau寫，就用羅馬字來補助，漢字若攏不識，就攏總用羅馬字來寫，按呢有甚麼不好？為甚麼有彼呢濟人欲反對？個人真僥疑這寡人究竟是愛台灣好抑是愛台灣倒？

羅馬字發音基礎是拉丁文的變化，發音具國際性的，目前的國際學術名稱，包括醫學、化學、動植物學等，多數猶是使用拉丁文(羅馬字)，所以使用羅馬字欲國際接軌抑是學英語、日語、西班牙語等國際語言非常容易，用其他的物件發音就無法度正確清楚。比喻有人講：b ＝ㄅ，d ＝ㄉ，g ＝ㄍ，是無正確的，除了中國佮台灣以外，無論是英語、西班牙語、意大利語等攏無這款的讀音。本人一向的主張，外國的語言無標準無要緊，家己的語言一定愛標準，但是真濟人卻本末倒置，in 主張中國話愛正確、英語愛標準，台語聽有就好，哀哉！這是甚麼款台灣人的社會？

這幾冬來有人咧講，伊若去菜市仔，看着雞販仔的籠\仔底，內面的雞有的咧啼、有的咧相扑，就想着台灣語文的問題，死在臨頭猶咧自我陶醉抑是製造問題來互相鬥爭，敢講人佮雞的智慧是無差別的？台灣猶一的怪現象，就是真濟人足愛發明字，發明一寡 kusopitlo (龜唆必羅＝不倫不類)佮社會脫節的文字來擾亂台文，有人將沿用百外冬的羅馬字提來改幾字，另立門派，亦有人將中國的漢語拼音抄襲來改個幾字，利用政治手段來縱橫全台，這寡人家己不認真來了解台語，卻發明真濟台語漢字來宣揚 in 的權威性，若遇着門派無共的人，就大肆來反擊批評，這款的情況絕對不是台灣之福，而是會禍害台灣的族群文化。向望大家關愛別人，疼惜台灣，尊重目前教育部的專家。2004.06.17------

二、Sòa--lo̍h-lâi sī gōa ê koan-tiám:

"巫義淵"先生tī 顶面ê chit篇文当中,讲遘伊"本人研習台語常用漢字三十外冬...總是論台語漢字讀音方面，本人的了解應該是一般水準以上...."，真正无简单,巫先生用三十几年ê时间来teh研究Bân-lâm-gú汉字,侬ê一生真短暂,加加嘛是六七十年ê岁寿niâ, chit位巫先生soah花费人生ê一半时间来teh做chit项tāi-chì,而且"目前逐日猶用八點鐘以上的時間繼續咧研習..."，安呢,用指头仔拗拗算算leh, 遘尾仔chit位巫先生一世侬起码有五十年以上ê时间是teh研究chit途....哇,有影使侬敬偑!chit种食遘老学遘老ê精神实在无侬比会着,知影ê侬稳当会透底感动kah目屎双港流....

既然用"三十外冬"ê时间teh研究,并且遘taⁿ犹原犹未放弃,犹teh打拼,所以,咱嘛甘愿相信讲"論台語漢字讀音方面，本人(巫先生)的了解應該是一般水準以上"。不而过，chit位巫先生又佫真谦虚，讲"到今仔日猶是一知半覺無所成就..." 是讲，巫先生为安怎beh chiah-nī谦虚？汝讲汝研究三十几冬，遘chit阵soah犹原只是"一知半觉"（半桶屎仔）？汝安呢讲，侬会hō·汝驚著，侬会堯疑：有侬用三四十冬ê时间teh研究閩南语，结果咧，嘛不过是半桶屎仔niâ,闽南语hiah 歹学，学这beh创啥？不如汰学。所以，巫先生，我苦劝汝mài佫hiah谦虚。

巫先生研究汉字hiah-nī久，嘛真了解汉字ê"缺点"，简单讲，汉字对闽南语来讲，无够用，嘛诚真歹用;beh用也呣得，呣用也呣得，总是tēⁿ驚死，放驚飞。所以，巫先生chiah会感觉汉字真正"费气"。巫先生为着beh说明汉字ê无耐，举例讲"除了真濟在地話佮外來語，無法度用漢字書寫以外，就算是漢語的漢字亦共款真歹分別清楚...."。既然汉字chiah-nī-á两光，不如先kā伊放一边，hō·伊小可仔歇睏一下，mài hō·伊伤过头thiám. 所以,巫先生讲"漢字無夠用抑是過頭深bē-hiáu寫，就用羅馬字來補助，漢字若攏不識，就攏總用羅馬字來写..."巫先生ê观点，应该看做是当今台湾母语界侪侪侬ê心声，敢呣是咧？不而过，嘛呣是所有ê侬拢佮巫先生想ê共款，"有彼呢濟人欲反對，真僥疑這寡人究竟是愛台灣好抑是愛台灣倒？"chit句话，巫先生讲kah真透白。

Tī巫先生ê眼内，"羅馬字發音基礎是拉丁文的變化，發音具國際性的，目前的國際學術名稱，包括醫學、化學、動植物學等，多數猶是使用拉丁文(羅馬字)，所以使用羅馬字欲國際接軌抑是學英語、日語、西班牙語等國際語言非常容易，用其他的物件發音就無法度正確清楚..."，也着是讲罗马字有ê优点，汉字无一定有。不而过，讲实ê,罗马字ôan-á有bē少欠缺，巫先生并无说明，安呢有噹时仔反对者会讲汝罗马字"家己看bē着耳仔"、"有喙讲别侬，无喙讲家己"，是呣是安呢讲咧？

"台灣猶一的怪現象，就是真濟人足愛發明字，發明一寡 kusopitlo (龜唆必羅＝不倫不類)佮社會脫節的文字來擾亂台文，有人將沿用百外冬的羅馬字提來改幾字，另立門派，亦有人將中國的漢語拼音抄襲來改個幾字，利用政治手段來縱橫全台"....讲天讲地，讲鱟桸，讲饭篱，讲遘尾仔，巫先生ôan-á佫再讲倒转来，继续佫来讲汉字。呣过，chit摆无共款，巫先生是不满有侬乌白生字，造字，无根据乱发明！伊讲"這寡人家己不認真來了解台語，卻發明真濟台語漢字來宣揚 in 的權威性，若遇着門派無共的人，就大肆來反擊批評，這款的情況絕對不是台灣之福，而是會禍害台灣的族群文化...." 咱讲，巫先生会chiah-nī棘心，这实在bōe歹理解，有影，若无统一ê梆模来约束，各侬做各侬ê,结果只会当是四散五路，相抢食无份，随ê仔hō· 侬拆食落腹！chit点，我挺伊巫先生。

不而过，巫先生ê文，我看愈後壁，soah愈看愈无。照讲，巫先生是主张用"汉字+罗马字"来写闽南语文，呣过，伊无讲"汉字"佮"罗马字"具体 beh安怎来分工？因为各侬捌字ê程度无共，理解程度嘛无共，到底用汉字写，beh用遘啥物款ê深度？犹佫有，伊反对造字，敢bē反了伤过头？ (Lim)