鹭水芗南-闽南语部落

俗语讲"石狮嘛驚告"，意思是讲"官司"双面利，惹着上厉害，连he无生命啲石狮嘛会惊！普通时仔，若有侬拍官司，he是姑不而将，呣管是"beh共侬告啲"，抑是"去hông告啲"，共款真歹食睏。

现代社会进步，生活比往过咔好过，事事项项拢嗳讲究，讲啥物"人权"啦，"智慧财产权"啦，横直若是别侬啲物件，着呣好乌白共侬"摕去"(the̍h--khì)用，若一定卟用，嗳代先经过主侬啲同意，ah 若无，无张驰会去侵犯着别侬啲权利。即个时阵，汝着嗳咔细二(sòe-jī)，犯势有侬已经chhôan好势，专工tiàm衙门等汝去报到。今仔日，看新闻，有看着安呢啲一条消息，大概是讲厦门有7个闽南音乐人，做伙共"福建电视台、福建省文学艺术界联合会、中国音乐家协会、福建省文艺音像出版社等7家单位告上法庭"，告怹侵犯"智慧财产权"(详细情形看遮)。即层啲官司佮闽南语有tī-tāi。

[煞尾話]：

真悲哀！是啥侬真悲哀？

呣是迄7家被告单位，讲咔歹听啲，he拢嘛大间单位，有钱有势，赔汝淡薄仔钱是会安怎呣？小可仔代誌啦，着无输“去互蠓仔骹踏着”，无hìⁿ-haiⁿ,无碍着。

当然，即层官司，原告算讲告赢，有钱通好领，哪会悲哀？爽着朆赴也，哪有可能悲哀？

若安呢，是啥侬咧悲，啥侬咧哀？古井水鸡讲是“闽南语”咧悲哀。本然，伫中国大陆，闽南语着已经当咧落衰也，会使讲是“着重伤，当咧住院”。即摆好佳哉 (hó-ka-chài)有“福建电视台”遮7间公家单位出面咧斗相幐(sio-thīn)，替咱斗宣传，煞因为即种啲代誌来拍歹感情，实在真了然。

古井水鸡认为，其实即层代誌根本着无应该告按法庭去，逐家会使私底下chhiâu-chhiâu--ê着好也，敢呣是？何必着一定嗳歹面相看、佫舞kah 浪家散宅才甘愿？实在讲，现主时啲侬，有啲着是安呢，若有出淡薄仔成绩，着开始展伊大拽(tāi-ia̍t)、展hiau-pai、展排祉(pâi- chí),朆输真惊侬呣知影伊啲功夫。即款侬，若略仔(lio̍h-á)互侬偏着(phiⁿ--tio̍h)，害也！朆直也！动着卟共侬使性地、siak -siau二五转（siak-siau jī-gō·-tńg)....