鹭水芗南-闽南语部落

即暂仔(Chit-chām-á)，伫(tī)厦门，三不五时有侬出来讲话，烦恼闽南语伫(tī)厦门无法度传湠(thn̂g-thòa)落去......厦门日报有一篇文章，题目号做"厦门话的危机"。文章内底讲遘：


1、真侪在地囡仔朆晓讲闽南话；
2、有啲虽然侪减会晓讲，不而过透底讲朆轮转(lìn-tńg)，讲话亲像"北贡"(pak-kòng,北仔)。
3、大多数啲厦门侬，真无了解闽南语啲文读音，朆晓用文读音来念中国古代啲旧体诗文；嘛朆晓用闽南语读册、看报纸。
4、真侪侬无法度对头遘尾 全部用闽南语来表达一项代誌，必须嗳借用"普通话"啲语词来鬥。
5、踮街仔路、商店，抑是其它公共所在，生份侬见面透底用普通话交陪。

即篇文章啲作者烦恼"厦门话不但无法度同化外来语言，颠倒有可能互外来语言同化" 。即种乞食赶庙公啲情形，原因之一是厦门啲在地侬伤少，尤其岛内（厦门岛）佫咔少。文章啲作者苦劝厦门侬着嗳赶紧来重视即个严重啲问题；伊呼吁(ho·-iok)"教育佮语言文字部门"嗳提出有效啲措施佮行动，来保护佮挽救厦门话。这以外，伊又佫点醒社会各界，嗳客观、公平来看待"推广普通话"佮"保护在地话"即两层代誌，意思是叫侬嗳会记得"食果籽拜树头、食米饭敬锄头"，呣通"破柴含柴砧soah破去"。