鹭水芗南-闽南语部落

今仔是2005年3月23号，三日後，一年一擺啲"厦门国际马拉松"（Marathon）比賽着卟来共chhôan出来......听講即摆啲"马拉松"嗳比舊年佫咔闹热、佫咔chhiaⁿ-iāⁿ (风光）。

即幾工仔，厦门在地啲报纸、电台、电视台是暝日来咧报道即层代誌，街頭巷尾、田头田尾、厝邊头尾，一四界拢咧议论这。讲一个(ê)咔hàm啲，有時仔連半暝陷眠嘛犹咧讲"马拉松、马拉松"，真正"空空不倒翁"......好!来看即擺啲"马拉松"到底掺往年仔有啥物无共款——

根据了解，即届马拉松长跑比赛将卟创造幾若项"历史第一"，逐个详细听：第一擺通过海峡卫视直播（这，无算啥）；比賽啲电视信号第一擺覆khàm全亚洲（管汰伊）；台湾电视媒体第一擺同齐来转播即项比赛（插插伊）；中国国内电视媒体第一次用地方语言播报国际大型体育赛事（咱卟讲啲佮这有关系）。

担任即摆电视闽南语现场播音的主持人，是歌仔戏明星陈亚蘭小姐。现主时，亚蘭仔伫厦门海峡卫视电视台主持一档闽南语啲娱樂节目，號做"娱樂斗阵行"。

亚蘭仔上早是tòe楊麗花来咧搬歌仔戏，后来是呣是因为歌仔戏無儂看，無錢通好趁，抑是安怎，横直即诚十年来，我是罕得佫看着亚蘭来咧搬歌仔戏（kán-ná舊年楊麗花老風騷出来搬"君臣情深"啲時，原在佫有邀请亚蘭仔啲款？罕咧看电视，朆记也）。讲是咔少有機會来咧唱哭调仔啦，不而过，咱原在捷捷会当伫"台剧"内底看着伊啲儂。即个亚蘭仔有影是诚拼也，讲伊有才情，he绝对無哺舌、無hau滫！伊呣nā歌仔戏搬了讚（楊麗花若無伊，衝朆起來），流行歌嘛唱及pìn-piàng叫（施文彬若無招伊合唱，無儂會捌伊）即摆佫绁落去演电视剧兼做主持人，實在真无简单哩咧!! 顶一暂仔，亚蘭仔嫌讲台湾徛傷久，徛了僐，煞拼过来厦门，掺he拄拄开播啲"海峡卫视"签约。

即擺担任"国际马拉松比賽"闽南语现场播音啲即层代，對亚蘭仔来讲是第一擺，虽莽综艺节目主持啲经验真丰富，不而过这工课路(khang-khòe- lō·)真正完全无相共。目前，亚蘭仔是注心卟来"备战"即场啲电视解说。伊嘛表示講，卟用咱熟似又佫亲切啲闽南乡音，来为海峡两岸啲观众奉献一场掺往过拢无共款啲"厦门国际马拉松"比赛。