2005年07月06日

汝敢“跋过”siūⁿ-poe？

相信讲，若厝内底序大侬(sī-tōa-lâng)有咧拜拜啲朋友，稳当拢知影"siūⁿ-poe"是啥。

今仔日，蹛伫(tòa-tī)彰化二林镇啲朋友（杨境韬先生）来批，讲遘"siūⁿ-poe"（华语是"杯筊"，一种佛教器具）辷个语词。杨先生讲 "siūⁿ-poe"啲"poe"，汉字是"棓"抑是"片咅"。杨先生是一个注心来咧研究闽南语啲少年侬，伊啲本事诚悬，不但有才情，又佫真性格，台湾著名啲闽南语专家洪惟仁先生呵咾(o-ló)杨先生"比普通啲学者了解佫咔侪"。

杨先生啲批，引起我啲兴趣，为着卟稽考(khe-khó)即个"poe"，我有去查"台華線頂辭典"，辞典写做"siūⁿ 杯"。在我了解，"siūⁿ-poe"即个词，呣管是漳州、厦门、同安，抑是台湾优势腔，透底无增差，拢总读做"poe"，所以设使是"杯"字，我oân-á会接受。因为"杯"字，伫漳、厦、台、同（安）遮四个所在拢读"poe"，声母韵母拢共款(kāng-khóan)。不而过，有一点无法度解说(kái- soeh)及清楚，着是he"杯"本意是一种容器，贮( tóe / té )物件用啲，这掺"siūⁿ-poe"无sio-siâng，因为"siūⁿ-poe"若亲像是一款"柴仔爿"(chhâ-á-pêng，片状物)，无法度 贮物件。

这以外，厦门话有一寡语词，拢带有"poe"，比论讲：球poe，船poe，鸭喙poe，lā-poe/乌面lā-poe，大poe（华语是"球拍"、"船桨"、"鸭喙巴"、"黑面琵鷺"、"板子"）......遮个语词当中啲"poe"，漳州话拢总读"pe"。即寡语词共款有一个特点：拢是"规片仔规片、一爿仔一爿"啲物件。另外，华语所讲啲"河蚌"，漳州话叫做"田pe"，抑是"蟯pe"。"田pe"（抑是"蟯pe"）外形是两爿形状完全相共啲貝壳，论真讲，这嘛是"片状物"。



Posted by limkianhui at 09:34│TrackBack(0) │閩南語考
このBlogのトップへ│前の記事│次の記事

この記事へのトラックバックURL

http://limkianhui.ti-da.net/t441111
この記事へのコメント
頂幾工仔,二林啲楊先生又佫發消息互我, 即擺伊是安呢講啲：
華語“聖珓”(有人誤寫作“勝珓”)，我（楊）是講“sìng3/siàⁿ- poe”，意思是“将珓往空掷下以後呈現一俯一仰”（着是講出现‘正倒面’啲情形啦）；華語“陰珓”=“立珓”，閩南語講號做“陗棓tshiò- poe”;華語“陽珓”,閩南語叫做“khap-poe(盍棓)”……
楊先，伊佫解釋講：陗tshiò = 仰(taⁿ頭/gia̍h頭)，比如thán-tshiò-sin(坦陗身，嘛有講"坦攲身/thán-khi-sin")。伊講“俯为阳珓，仰为阴珓”。
頂面啲信息，經過楊先同意了後，昑(taⁿ)提供互各位朋友做夥来分享。
Posted by limkianhui at 2005年07月07日 15:45
今仔，楊先講，"pe"（比論講：漳州话的“球pe、船pe、鸭喙pe、lā-pe/乌面lā-pe、大poe、田pe、蟯pe”）啲正字有可能是“碑”。“碑”是“彼為切”（反切），楊先解説講：

……「為」是“匣母支韻合口呼”，「皮糜知」是“支韻開口呼”，「為」解使(ē-sái)念作「hue5/her5」(注明：TLPA，也着是POJ啲"hôe")。反切音里底常在有hit4款開合口be7拄好合其例……

各位意下如何？觀迎做夥来開講紲落去。
Posted by limkianhui at 2005年07月07日 15:45
唐代诗人韓愈啲诗文《谒衡岳庙遂宿岳寺题门楼
》有写讲“手持杯珓导我掷，云此最吉馀难同”。這句诗文当中啲“杯珓”，应该着是闽南语的“siūⁿ-poe”，因此，咱讲“poe”着是“杯”。
Posted by limkianhui at 2005年07月07日 15:46
このページの上へ▲