鹭水芗南-闽南语部落

一、
咱儂话,"拢","拢是","拢总","拢共"....泉州所在假若咔罕得听着,泉州儂透底说"kè",比论:"kè是","kè总 ","kè共"。這存年（chûn-nî/chûn--nî：前年）有讨论过，迄阵繒季犹未离开论壇。迄阵，缯季讲“kè”啲正字犯势着是“皆”，不而过，伊呣敢挂保证，因为“皆”声调無合。我即暂仔，雄雄想着一个字“介”，我认为“介”着是“kè”啲正字。

二、
中國大陸普通话所讲啲“地铁”（着是“地下铁”啦，“地下铁”即个语词敢讲是日本儂发明啲？），伫台湾，儂讲“捷運”。伫台湾，若提起“捷運”，儂透底會用華语念，罕得聽着直接用闽南语讲“捷運”。各位，犯势呣知影。其实，“捷”即个字，闽南语定定有咧讲。下底举例说明一下：

1.表示“经常”、“定定”啲意思，讲做“捷”（chia̍p）、 “捷捷”（chia̍p-chia̍p）。比论讲：

（1）“阿娟捷捷去北京”（阿娟经常去北京）；
（2）俗语讲“捷罵bōe听，捷拍bōe疼”（chiap mē bōe thiaⁿ,chia̍p phah bōe thiàⁿ:被教训惯了也就麻木了）

2.表示“骹手紧、骹手mé-lia̍h（liú-lia̍h）、凛俐（léng-lī)”，共款有幾若种腔口：

（1）“lia̍p捷”（lia̍p-chia̍p:动作麻利）
（2）“连捷”（liâm-chia̍p）：我咧僥疑頭前啲“连”，母音韵尾變“-m”，是去互后壁啲“捷”（-p）过着。
（3）“敏捷”（bín-chia̍t）：這定着是互華语过着。

3.单纯表示“紧、快”：

（1）漳州成语：紧捷猛快(kín-chia̍h-mé-khòai)。四个字拢共款意思，意思拢是“紧”。即个成语，意思是“做代誌傷狂、欠考虑”。

按頂面分析來看，“捷”即个漢字，伫闽南语内底，拢总有三个读音：chia̍p-->chia̍t-->chia̍h

所以，咱講“捷運”即个词完全符合闽南语啲语法，台湾儂呣免佫再頓蹬(tùn-teⁿ/tùn-tiⁿ:迟疑),聽好（thèng-hó）大聲用閩南語來講“捷運（chia̍t-ūn）”

三、
紲落来，卟讲啲"字"，掺頂面有淡薄牵连（khian-liân:牽涉）。卟來讲啲即个字，读册音是“lia̍p”、白話音“lia̍h”。意思有两个，一个是“抓、捉、握”（華语）；另外一个是“紧、快”。

1. 先来讲第二意思，是表示“紧、快”。共款举例说明。

（1）漳州腔：“猛lia̍h”、"liú-lia̍h"；
（2）同安腔（泉州腔）：“lia̍p捷”。

2. 佫來，卟讲另一个意思，是表示“抓、捉、握”（华语）。

（1）"lia̍h":厦漳泉各所在平平拢是讲"lia̍h"，比论：lia̍h儂、lia̍h着。辷个字，有啲学者讲是“搦”；有啲讲是“掠”。某儂我認為“搦”佮“掠”拢呣是！
（2）"lia̍p":同安腔（泉州腔）。意思是“握紧、捏”（華語），也着是漳州腔啲" tēⁿ "。

好，咱即阵宽宽仔（khoaⁿ-khoaⁿ-á:慢慢仔）來辨。
這“ lia̍h ” ←→ “lia̍p” ，文、白音中间啲对应关系，拄好佮“捷”字、“頁”字共款（“捷”字是：“chia̍p”←→“chia̍h”；“頁”字是：“ia̍p”←→ “ia̍h”）。“捷”啲中古音是属“葉”母。這以外，中古音啲“帖”母字，比論講“蝶”，共款嘛有"tia̍p"←→"tia̍h"對應。

佫來看拆解“搦”、“掠”啲讀音。

1. “搦”啲反切音是“女白切”佮“女角切”，会使读"l̍e̍k"、"le̍h"、"la̍k", bōe使读" lia̍h / lia̍p" 。“搦”应该是闽南语所讲啲“la̍k一把沙”（华语：抓一把沙）或者“jio̍k土沙”（华语：用手掌反复研碎土顆粒）啲正字。

2. “掠”啲反切音是“離灼切”（“藥”母），会使读"lio̍k"、"lio̍h", bōe使读" lia̍h / lia̍p" 。

總講一句，我認為，咱应该ùi“葉”母、“帖”母去chhiau-chhōe "lia̍p/ lia̍h"啲正字。