鹭水芗南-闽南语部落

儂問我一个問題：卟安怎用漢字寫閩南語（文）?
……
著是即个短短啲問題，害我戇戇(gāng-gāng)，一時呣知卟如何來回答。
……
卟議論晉前，代先噯共儂交代我對漢字的看法。
1.漢字真水。我一貫攏是即个觀點。
2.《香港增補字元集》(HKSCS)所收啲漢字，意義重大。
3.若有法度創作一套《閩字增補字集》（類似《香港增補字集》），我甘願呣佫寫羅馬字。
……
目前啲漢字，無夠用。即个問題逐个攏瞭解，無需要佫解說。
平平攏是漢語。我是講“福建話”佮“廣東話”。若是連即點著攏呣承認（無法度認同），佫講落去嘛無意義。
廣東省內有儕儕種屬於漢語系啲語言，廣州話上沖(chhèng)。普通時所講啲“廣東話”，干凋代表“廣州話”。香港主要啲漢語，是廣東話（粵語）。
福建比廣東佫咔複雜。閩南語上儕儂講。東南亞啲華人族群，透底共“閩南語”叫做“福建話”。有啲儂朆憖(bōe-giàn)“接受”、或者無法度“吞忍” (thun-lún)“閩南語”即三个字，既然安呢，暫時先用“福建話”來代表“閩南語”，希望會咔無聲嗽(siaⁿ-sàu)。

即篇主要卟來講廣東話成功啲經驗。

若呣知影《香港增補字元集(HKSCS)》是啥物碗糕，he到底是咧創啥貨？安呢，汝通先去瞭解瞭解咧，探聲好勢了後，才佫斡(oat)倒轉來即搭。

咱看會著啲，抑是聽儂講了解著啲，是：
1.《香港增補字元集》（主要收“粵語漢字”），基本上是一套廣東話啲漢字使用標準。
2.《香港增補字元集》是由香港政府央(iang)中諮會（全稱“中文介面諮詢委員會”）做夥編製出來啲。
3. 過去，香港政府將《香港增補字元集》內底啲字元，提交互國際標準化組織 (ISO)，並且得著ISO啲支持佮落實。目前，《香港增補字元集－2001》（上新啲版本）4,818 个啲字元當中，已經有4,783个正式納入“ISO 10646 國際編碼標準現行版本”內底。
4.香港政府長期來咧收集市民提供啲新字，不斷咧補充《香港增補字元集》啲字元數目。這以外，怹（政府）會定期將新採集啲文字提交互“ISO表意文字小組”，做為ISO日後按算卟擴充（字元）啲材料。新啲文字，透底是市民代先發現並且提供互政府審查，通過了後才補充入去《增補字元集》內底，最後才送去互ISO編錄。
5.微軟（Microsoft）共款為《香港增補字元集》提供儕儕啲幫贈（pang-chān），超工為伊起一个“Windows支援平臺”。
基本情況著是安呢。
……
天時、地利、人和……
廣東話呣沖(chhèng)才有奇怪——
頂懸有政府、下基層有百姓、中央(tiong-ng)有民間技術結構；外部佫有ISO佮Microsoft咧鬥相幐(thīn)、鬥扎氣。
當然，廣東話會遮呢沖，呣是一工、兩工啲代誌，嘛呣是今仔日才咧沖爾(niâ)。
有即本《香港增補字元集》，逐个攏自覺來遵守，寫字才有法度“統一”；嘛因為ISO有承認，才會當成做“標準”；ah“微軟”咧鬥相幐(thīn)，互伊(粤語字)加真有氣力。
……
儂咧飛，咱咧趖。

“福建話”，汝佇叨位？我該當替汝艱苦……