鹭水芗南-闽南语部落

一般來講，閩南語的聲調包括本調佮變調两部分。

1. 本調。漳州、厦门、同安，實際kan-taⁿ chhun七聲niā（也著是講「第六聲」已經濫落去「第七聲」）；不而過，泉州腔佇咧讀變調的過程當中，猶原會當感覺著「第六聲」的存在。第一聲～第八聲，按傳統聲韻學的「調類」來分，會當安呢來表示(先用廈門腔做代表)：
   

   調類	隂平	隂上	隂去	隂入	陽平	陽上	陽去	陽入
   调值	44	53	21	32	24	—	22	4
   代號	1	2	3	4	5	6	7	8



2. 變調。變調加真複雜、加真活，呣是三两句話會當講清楚，不而過，咱主要是來beh瞭解即个「第九聲」，所以一寡咔無牽連的，咱著無beh加講。逐个噯注意，咱佇chia所講的「第九聲」呣是「輕聲」，魚還魚、蝦還蝦，呣通濫濫做一下。「第九聲」往往出現佇白話音裡底，有噹時仔會當kā看做是一款特殊的變調，可比講（有食色(chia̍h-sek)的字，著是「第九聲」）：

• 光光光/金金金/新新新/冰冰冰/清清清；
  
• 红红红/平平平/油油油/綿綿綿/長長長
  
• 静静静/遠遠遠/直直直/熟熟熟/活活活
• 儕儕儂咧看電視.
• 魚仔大大尾.
• 汝會用去.(lí ē-ēng khì)
  

……
這以外，口語當中有一寡仔虛詞，oân-á讀「第九聲」，汝像講：

• 有够趣味的哦!(ū-kàu chhù-bī--ê ŏ·)
  
• 哇啊！物件有够儕的neh !(Oă--a ! Mi̍h-kiāⁿ ū-kàu chōe--ê neh ! )
• 喂，汝好，請講話……(Oĕ,lí hó, chiáⁿ kóng-oē....接電話的情形)
• Hăⁿ...是汝咧叫我呣?（應話的情形）

講遘chia，逐个khiàm-chhái已經知影啥物是「第九聲」囉。實際上，即个「第九聲」該當是一个「高升調」，伊的讀音佮「泉州腔」（廈門腔嘛是）單字調的「第五聲」（陽平）差無真儕，嘛真倚近普通話的「第二聲」，不而過，「第九聲」的音值佫咔懸(koân/kûiⁿ/koâiⁿ)淡薄。



有的儂穩當心肝裡teh臭堯疑：he嘛奇怪ah ！明明著是第五聲的音值咯，哪會講是啥物「第九聲」的啦？有即款想法的，透底是一寡講廈門腔或者泉州腔的儂。是安怎講咧？我舉一个例來講互逐个聽，聽了汝著加真清楚ah——

[例1]：短句「新新新」，頭一字「新」的讀法（變調），無論佇廈門抑是漳州攏共款，攏是「高升調」，調值差不多是「35」，聽起來真靠近廈門腔單字調的第五聲（陽平調，調值「24」，有的講「25」）。因為安呢，所以廈門儂可能一時無法度分別，不而過，漳州儂soah 分kah真清楚。漳州腔（長泰、龍海）的陽平，伊的本調的調值佮廈門、泉州無共款，顛倒是hām普通話「第三聲」實際的音值真靠近，咱暫時先共伊記做「214」。咱具體佫用「長泰腔」（Tiô-thòa-khiuⁿ，屬漳州音）來做比論，佇「長泰腔」裡底，傳統的「七聲」，呣管是本調抑是普通規律的變調，攏無「24」／「25」、「35」即款的「調值」。所以，短句「新新新」頭一字「新」（讀高升調），呣是漳州腔的「第五聲」，正港是一个屬佇「傳統八聲」（無算「輕聲」）以外的「新調類」。頂面講的hiah-ê例，攏總是即款的情形。

佫來講sòa落去。閩南語當中有寡仔「合音字」，oân-á 讀「第九聲」。比論講：

• 「自安呢」／（POJ：chū án-ne / chū án-ni，華語：於是），合音了後，變做「第九聲」，泉州腔／廈門腔讀做“choăn”；漳州腔讀做“choăⁿ”。有噹時仔，為著讀寫利便，會kā記做「第五聲」的 “chôan” 佮 “chôaⁿ ”。
• 「昨昏」（POJ：cha-hng，華語：昨天），合音了後，為著方便，記做“châng”。實際，這oân-á是「第九聲」——“chăng”。
• 「下昏」（POJ：e-hng，華語：今晚），有的所在讀合音的“ĕng”，共款是「第九聲」。
• 「今仔日」（kin-á-ji̍t），有的所在，比論廈門，講「今仔」（省去一字「日」）。佇泉州德化、永春即搭，講做 " kiăⁿ "或者「kiăⁿ日」。當中即个 " kiăⁿ "，事實著是「今仔」的合音，是「第九聲」。

在咱瞭解，有臺灣的學者已經佇的作品裡底，專題對閩南語的「第九聲」作了相關的議論。

佇電子軟體即方面，台灣抛荒臺語文工作室出版的「白話字輸入法（Taiwanese Package2.0）」、台灣陳柏中先生設計的「KeymanPOJ1.00」（新版本）、小弟我家己設計的「MSKLC POJ0.2」攏有將「第九聲」考慮在内，用“ˇ” 即个聲調符來kā表示（有關輸入法的說明佮使用，請看本站文章「《吹銷幾个閩南語的輸入法》」）。虽然講白話字是“寫本调、無寫變调”，呣過，nā按照「正字法」的角度來看，實在有必要認真來看待即个「第九聲」。Ah實際上，TLPA（臺灣語言音標）已經是正式kā「第九聲」收編入去囉。