鹭水芗南-闽南语部落

"古早儂所講啲無濫糁"，即句话，呣知衆儂客倌，恁敢捌聽儂講过？唷，逐个soah靜靜！無..我先講我啲經驗分儂聽嘛好啦。嚶嚶(èⁿ)...

我細漢啲時，蹛伫庄骹(chng-kha)所在。迄阵仔，阮母仔定定來咧講起即句话——"古早儂所講啲無濫糁"(POJ:kó·-chá-lâng sé-kóng--ê bô lām-sám)。逐个犯勢有注意著，迄字“所”，我超工共(kā)伊標記成"sé"。其實，he bē使講是我超工beh安呢记啲，事實，阮遐啲儂确實是安呢講啲。在我往早(èng-chá)猶佫真無了解閩南語啲時，我定定當做講，he稳當是庄骹儂呣捌字，讀了走精去，明明“所”字是噯讀做"só·" chiah
tio̍h，哪會beh共讀做"sé"？後來，大漢了後，我所捌啲智識有比向時(hiàng-sî)加咔儕，嘛加少有teh做一寡佮閩南語有治代啲工课(khang-khòe)。慢慢我著發覺講，農村儂(lông-chhoan-lâng)咧講話，雖然真樸實(phoh-si̍t)，呣佫往往soah伫普通當中隐藏(ún-chông)著一寡大道理。朋友若是常在(chhiâng-chāi)有咧關注一寡鄉土俗語，定著有家己啲體會。

好，taⁿ佫來講正题。頭拄仔，咱講遘“所”字，因何會讀做"sé"咧？其實，即中間啲道理，oân仔诚简單，呣是吤複雜。紲落來，咱著beh沓沓仔(ta̍uh-ta̍uh-á)來拆解——

伫beh拆解進前，beh先共朋友做一交代：咱共款beh佫利用"漢語中古音"來做比對。逐个實在呣通看輕"中古音"，因為"中古音"實在真重要！若普通時有咧研究"漢語言"啲儂，透底拢了解安呢啲一个道理——"中古音"可比是一个儂啲"大脑"，各所在啲"漢語方言"可比是受大脑控制佮约束啲"肢體器官"；简單講，即个"中古音"著是漢語族啲標准規範，各所在啲漢語方言雖然無法度通話，不而过，怹拢總遵守"中古音"即抱(phō)標准規範。了解即个道理了後，咱來講紲落去chiah有意義。

我先寫幾个逐家拢有熟似啲漢字：初、疏、蔬、梳、所。初初看起來，即幾个字好親像無啥物特别啲聯係。不而过，汝犯勢呣知影，事實，即五个字，怹伫中古時代(唐、宋)卻是讀共款啲一个韻母。即个共款啲韻母，著是"魚"韻。得著即个共識了後(暂且當做第①个共識)，咱翻頭佫來看即五个字啲閩南語讀册音(文讀音)是啥。是啦，這逐个拢比我咔了解："初"是"chho·"；"疏"、"蔬"、"梳"是"so·"；"所"是"só·"。安呢，逐个定著已經發覺講，怹啲韻母有影拢共款，平平拢是"o·"。真好，這是"第②个共識"。有頭前即两个共識了後，著會當進一步得著第③个共識，這嘛是咱最後beh嗳啲結論。

朋友應該儕少有了解一寡“文白異讀”啲智識hò·？實際，這嘛是閩南語語音系統吤重要啲特點。好勢，咱來看"初"、"疏"、"蔬"、"梳"即四个字。怹啲白话音(白讀音)分别是：

• 初：泉州音"chhoe"；漳州音"chhe"。比論"初一十五"。


• 疏：泉州音"soe"；漳州音"se"。比論"頭毛真疏"（華語：頭髮稀疏）。


• 蔬：泉州音"soe"；漳州音"se"。比論"菜蔬"（華語：蔬菜）


• 梳：泉州音"soe"；漳州音"se"。比論："掃梳"（華語：大竹掃帚）、"柴梳"（漳州話，華語：頭梳）

講遘遮，朋友稳當已經得出第③个共識，也著是咱啲結論！無呣著，咱啲結論著是：“初、疏、蔬、梳、所”即五个字啲中古韻共款、讀册音(韻母)共款，所以，怹啲白話音(韻母)當然嘛會使讀共款。因此，咱講“所”啲白讀音正正著是："sé"（漳）、"sóe"（泉）。