鹭水芗南-闽南语部落

一个儂姓傅,伊名叫阿露.①
熱儂五月五,擔著一擔醋.②
天頂半爿烏,土骹風飞土.③
擔醋真艰苦,緊行莫沃雨.④
三步做两步,咔慘儂擔粗.⑤
來遘雙叉路,看見一隻兔.
兔毛白濫烏,值錢两萬五.⑥
想著心頭酥,雙目激吐吐.⑦
放落一擔醋,开步去迮兔.⑧
兔惊跳落土,扁担捎來戽.⑨
無疑鑽入裤,兔爪耙破肚.⑩
褪裤來掠兔,兔仔出裤.⑾
迮兔裤無顧,挵倒一擔醋.⑿

PS1.
這是根據往过咱閩南在地共名的囡仔歌《掠兔挵倒醋》來改編的，算做是舊歌新編啦。當中，有劃痕做记號的，是在下加入去；亦若無做記號的，拢是原早的歌詩自本有的。即款囡仔歌，完全是卜互儂唸鬥句的、唸chhit-thô的。伫咧唸唱的过程當中，會當真自然著來感受著hit款“輕鬆、趣味、活潑、佮滑詼(kho̍k-khe)”的氣氛。

PS2.
①傅：漢姓，讀做"Pò·"。掠：lia̍h，捉（官話）。
②熱儂：jo̍ah--lâng，熱天/夏天。
③爿：pêng。半爿，半邊（官話）。
④行：kiâⁿ，行路。莫：bo̍h，呣通。沃雨：ak-hō·，淋雨（官話）。
⑤粗：chho·，大糞肥料（官話）。
⑥濫：lām，混合，透濫，濫掺。
⑦激吐吐：kek-thó·-thó·。
⑧迮：jiok，追。
⑨捎：sa，抓、拿（官話）。戽：hò·，拍、摃。扁担：pin-taⁿ
⑩無疑：bô-gî，嘛講做“無疑悟”，想無遘，料想無遘，意外。耙：pê，抓挠（官話）。
⑾：chông，表示“緊緊窜出來”的情形。走：cháu-chông，走闯（官話）。
⑿挵：lòng，撞（官話）。