鹭水芗南-闽南语部落

今仔日，又佫踅(se̍h)去遘taokara hit座「雙倒水別莊」，看著主儂PO一篇《講詩》佇面頂。我詳細讀煞了後，soah產生一寡仔真無字眼啲想法，順紲khêng-khêng啲，共tah出來——

講著chit-ê “詩”，我實在真見笑~~雖然講現代诗若像無固定啲格式，若無拄著hit款真正“蹛巷仔内啲”啲高人，有時小可偷食步一下，犯勢嘛無儂知。（呣知安呢講tio̍h呣tio̍h？外行儂講外行話.XD)若有法度偷食步當然是好，是講，我soah連beh安怎偷食步嘛bōe曉，起手咔慘咧學跳舞（學幾若冬仔，遘taⁿ bōe曉跳舞）。所以，有時定定會怨嘆家己：哪會chiah無路驶。讲真啲啦，有時明明拄著一寡咔有意義、或者是咱家己認為講“咔抒情啲”代誌，著真想beh寫一半條仔诗文來安呢小可爽一下、佫展一下，iah准講是烏白哀一半句仔、會曉凊采chu̍t一下嘛好。不而过，串串著是寫無路，攑筆锄頭重！He是啥物情形？是一个儂神神坐tiàm hia，明明有：满腹啲诗情画意可比三碧愛英台（本然想beh寫“豬八戒咧憖(giàn)嫦娥”）；規身啲豪情壯志若像海水咧滾絞，卻是任吐也吐bōe出來；想規晡，想kah頭壳強beh煏破，遘尾仔嘛是寫無一隻木蝨、虼蠽(ba̍k-sat, ka-cho̍ah)……想著實在好氣也好笑~~這號做：一暝全頭路，天光無半步。

是講，這“寫诗”應該是佮各儂啲才情有治代，特别是佮咱儂在來啲潜能（：内才）真有關係。咱講“做儂無十全”，世間啲天才毕竟無儕（爱因斯坦上吤巧，5000年嘛chiah出一个niā)。所以，有啲儂興唱曲，有啲儂興pûn吹（：鼓吹），總是無十全。若beh想安呢，犯勢著呣免hiah鬰悴，嘛咔bōe hiah怨嘆。不而过，應該呣好逐擺拢tu即條出來作藉口，呣好見擺若拄著困難或者歹剃頭啲代誌，著先認路輸，本然是“有志”，遘尾仔改名叫“失志”。

不而过，嘛有儂講，即擺啲社會已經花kô-kô，變kah掺往早拢無共款，亦做儂有時仔嘛呣通傷chhio-tiô，講“出頭會损角”。所以，甘願beh做一个濫爛“阿Q”，呣拍phún、呣寸進，一日二四點，食飽閒閒siàu厝瓦角。這嘛一種儂。平平咧做儂，骨力拍拼啲，愠忳呣討趁啲，完全两个世界。

江湖無行bōe出名！少年bōe曉想，食老呣成様。我是咔贊成趁少年加少噯拍拚，呣是講想beh映望日後有好報應，上無嘛會使共當做是人生啲一種磨練。有拖磨chiah有收成，煅練不但會當考驗意志，有時嘛會感覺趣味！

一枝草一點露，像我bōe曉寫詩，無規氣來换寫别物(mi̍h)，即溪無魚别溪钓，運氣總無定定hiah-nī bái。傾實，我真早著用“甘願做牛，呣驚無犁拖”即句在地啲漳泉俗語話來當做人生啲書句。只是，有時仔確實是嗳怪家己意志無够堅定，所以，定定會虎頭鳥鼠尾。逐个拢知影一个道理：下決心儂儂拢會曉；beh做遘頂真，呣是hiah簡單。Beh佫拚，抑是beh放？無共款啲儂，犯勢有無共款啲選擇。