鹭水芗南-闽南语部落

原作：[法]圣·德克旭贝里
譯文：[闽南]LimKianhui
　　　　　　　　　
献给列翁·维尔特

我卜(beh)天下间的囡仔兄(gín-á-hiaⁿ)原谅我共(kā)即本册献互一个大侬。我有一个(ê)诚重要的理由，這着是：即个大侬是我伫世间上好的朋友。我佫有另外一个理由：即个大侬，伊啥物拢會捌(bat)，连本成(pún-chiâⁿ)卜寫互囡仔兄看的册，伊嘛拢總看會捌。我第三个理由是：即个大侬taⁿ tòa 伫法国，伊伫hia咧受枵寒(iau-kôaⁿ)、咧艰苦。伊足需要别侬的安慰。假使chiah-ê理由猶佫无够，安呢我甘愿共即本册献互囡仔时代的伊。所有的大儂拢有囡仔时代，拢捌做过囡仔。（可惜，罕咧有大侬记稠(tiâu)即層代誌。）所以，我卜共献词改做：

献互囡仔時代的列翁·维尔特

第1部

　　我拄才(chiah)六岁大 迄當阵，有看过一本專門咧寫原始森林(大山内)的册，冊名号做《真实的故事》。佇册内底，有一幅(pak)精彩的插图，是画一尾錦蛇当咧孝孤(hàu-ko·/吞食)一隻大大箍的野兽。册皮oân仔是貼（tah）迄幅图。

　　册底有写讲：“錦蛇食物件的時，拢是用吞的，呣是用哺的。猎物若吞落腹了後，伊着無嗳佫振动啊，有噹時仔，上久有法度擋咧半年呣免佫再食物件。佇即段中間，錦蛇是ná睏ná咧消化腹肚內的食物”。

迄阵仔，我真憖(giàn)濫糝（lām-sám）去想一寡仔发生树林(chhiūⁿ-nâ)内底、真正神奇的代誌。就安呢，我嘛开始用彩墨佮铅笔，家己來咧画图。我画的第一幅图，也着是我的第一号作品，是安呢的（插圖一）：

　　画了，我摕互大侬看，问in 講，看了会驚bōe ？

　　大侬soah共我应(ìn)讲：“he一顶帽仔哪有啥通好驚的？”

　　事實我呣是画帽仔，我是画一尾大锦蛇当咧消化腹肚内的一隻象。我應信佫kā蛇是安怎咧消化腹肚chiah-ê食物的情形，攏總kā畫出來，想講安呢大侬稳看會捌。Chiah-ê大侬，定定嗳侬解釋互in 听。我第二号作品是安呢的（插圖二）：

　　大侬叫我呣通佫画hiah-ê「有的無的」（在in看來，呣管我是畫好頭好尾的蛇，抑是畫刣腸破肚的蛇，橫直攏是一寡「五四三的」），in 叫我噯注心去学地理、历史、算术、佮语法等等。因为安呢，我hit陣chiah 拄拄六岁大niā，着來放弃做画家即个好的理想。第一号、第二号作品画了無算成功，互我真tàm志。Hiah-ê大侬，in 家己逐项攏bōe曉，佫見擺用安呢來做藉口，不管時噯叫汝解说(kái-soeh)互in 聽。這實在互囡仔儂感覺足無奈的。

　　後来，我只好选择另外一个职业，我去学驶飞机，世界各所在透底(thàu-tóe)拢互我飞thàng-thàng。有影啦，地理学确實对我有真大的帮赠。我若看一目，着随會當分出叨位是中国、叨位是亚里桑那。设使飞機伫暝時失去航向，地理学着开始发挥作用。

　　我的人生當中，捌掺儕儕正經又佫严肃的侬接接(chih-chiap)过。我伫大侬的世界内底度过真长的一段时间。我常在(chhiâng-chāi)详细咧观察chiah-ê 大侬，呣佫罕咧看着in 的改變。

　　有噹時仔，拄着一半个仔头壳略仔咔清楚的大侬，我定定会共(kā)细汉时画的第一号作品捎(sa)出來互in 看，想卜试看in 有啥款的反应。我想卜知影in 是呣是真正有“理解能力”。不而过，我聽着的回答定定是：“这是一顶帽仔”。安呢，我着bōe 佫掺in 讲起“锦蛇啦、深山林内啦、抑是天顶的星啦、月啦……”即寡仔代誌。我看破嗳佫吞忍(thun-lún) in 的水平，姑不而将，我著嗳佫掺in 讲“桥牌啦、政治啦、高尔夫呀、皮鞋目镜啦”即款龟挪鱉趖(ku-lô-pih-sô)的代誌。着是安呢，大侬透底会呵咾(o-ló)我是一个知道理、捌代誌的侬。

第2部

　　我着是安呢，定定家己一个孤单过日子,無半个死忠的知己。即款的日子一直遘kah六年前，我的机器伫在撒哈拉沙漠发生故障。发动机(iân-jín) 内底有一个零件歹去。迄阵是空身一侬，机械师無伫咧，嘛無旅客，我想卜家己一个侬修理，虽莽(sui-bóng)工课(khang-khè)真正复雜！对我来講，這實在是关系生死的大條代誌，我扎的水，kan-taⁿ有法度挡(tòng)咧成(chiâⁿ)禮拜久。　　　
　　我第一擺睏伫即款四界chhōe無虼蚤(ka-cháu)木虱、無看着半个侬的大沙漠顶。我感觉比侬落落(lak-lo̍h)水，mo·h竹排仔伫大海漂浪，咔佫凄凉。第二工,天拍殕光(phah-phú-kng)的時阵,我雄雄听着一个奇怪的声音，细细声咧共我叫精神。汝聽好(thèng-hó)想看我有偌呢仔興奋佮惊愕(kiaⁿ-ngia̍h)。有侬輕聲細説來咧講話：　　　
　　“請汝画一只羊仔互我，好無？”
　　“啊！”
　　“共我画一只羊仔…”
　　我bōe 输去互电电着，雄雄chôaⁿ仔peh起來，赶緊目睭jôe-jôe咧，想卜斟酌(chim-chiok)看是啥侬咧講話。我看着一个生做诚怪巧 (kòai-khá)的囡仔兄，伊真正严肃徛(khiā)伫hia，共我金金相。這是路尾我画互伊的，嘛是我即世侬画了上讚的一幅图。不而过，我画的图定著佫比實际的差kài侪。這呣是我的过错。我才六岁，大人着逼kah我失志做画家的勇气，我kan-na捌画过破腹的蛇佮無破腹的蛇，此去着呣捌佫学过画图。
　　
　　我用一种真正好玄(hó·ⁿ-hiân)眼神看着面头前即箍呣知tùi叨位暴(bok/pauh)出來的猴囡仔。逐家噯知影，迄当阵(hit-tong-chūn)我的位置是离居民區千外里远的 山頭 lo̍k-khok-bóe。不而过，我看迄箍猴囡仔真自在，完全無成 (sêng)迄款“呣知路通(thang)轉厝、pháng見的囡仔”。我真正是gông-ngia̍h kah 喙舌险险拍結，过卜規晡，我問伊第一問題：
　　“Hi，汝伫遮咧创啥？”
　　伊 soah 無插(chhap)我，佫kán-ná有真重要的代誌趕緊卜做的款，伊佫共我講一遍：
　　“请汝…共我画一羊仔…”
　　奇怪？敢 hiah 神秘？是講，即种“神秘”的感覺soah共我的思想佮行动控制去，叫我嗳乖乖仔服从差教。讲實的，伫即款無侬徛起的山頭领尾，随時拢会無命，不而过我soah無才调停止即种离經(lī-keng/荒诞)的行为——我真緊着按lap袋仔内iam出一支笔佮一张纸。雄雄又佫想着我kan-taⁿ学过“地理、历史、算术佮语法”，我小可呣情愿呣情愿，共迄个猴囡仔讲 其實我bōe 曉画图尪仔。伊soah共我应讲：
　　“無要紧啦，汝共我画一只羊仔啦！”
　　我苦！我咔實呣捌画过羊仔，kan-taⁿ会曉画破腹的、佮無破腹的蛇。我規氣chôaⁿ按照家己的想法，佫共迄幅無破腹的锦蛇画出來。
　　“無嗳，無嗳！我無嗳大蛇，汝看he大蛇腹肚内佫有一只象伫咧(tī--leh)。”
　　聽伊应即句话，我soah戇去(gāng--khì)！紲落來伊佫讲：“大蛇傷过頭狼毒(lông-to̍k)；象，傷镇位。阮兜，所在真e̍h (oe̍h)、真细，我kan-taⁿ卜嗳一只羊仔，汝画一只羊仔互我啦”。
　　我chôaⁿ仔画羊。
　　伊先注心看我咧画，尾仔佫讲：
　　“即只羊仔破病kah遮thiám！我无爱。汝嗳佫共我画一只。”
　　我chôaⁿ仔佫画。
　　即擺，我即个拄拄熟似(se̍k-sāi)的朋友，伊笑kah真正古锥，煞客气客气共我拒绝：“汝看，你画即只呣是羊仔囝 ，是羊公，佫有發角。”
　　我chôaⁿ仔佫画一张。
　　即幅，伊共款佫呣挃(ti̍h)。
　　“即隻伤老。我卜挃(ti̍h)一只会当活足久足久的羊仔。”
　　我真正無伊法。我无hiah侪美国时间，我紧狂卜修理发动机，chôaⁿ 做我乌白chu̍t，凊采佫画一张出来 凖拄煞。我确实真不耐烦，小可歹歹，共伊應讲：
　　“我画一奇(kha)箱仔啦，汝卜挃的羊仔伫内底。”
　　想bōe 遘即擺...即个小评判员soah畅(thiòng) kah 喙笑目笑。伊讲：
　　“我着是卜挃這，…汝讲即隻羊敢嗳食足儕草仔？”
　　“乜代(mih-tāi)？汝問這卜创啥？”
　　“因为阮tòa 的所在真细…”
　　“我共汝画的迄只羊仔真细隻，若的確卜飼，所在呣免偌大片啦…”。
　　伊chôaⁿ仔àⁿ落去，對著迄幅图金金相。
　　“嘛無像汝讲的hiah细啦...汝看！伊咧睏也…”
　　我着是安呢佮小王子相捌的。

第3部

　　我问真久才了解小王子是按叨位仔來的。伊问我真儕问题，颠倒是我问伊的，伊soah定定當作若無听着共款。我按伊讲的话语当中，慢慢仔了解着伊的來歴 。比论讲，伊拄现看着飞机的時阵（飞机我着無想卜画出來也，he實在傷复雜），共我问讲：

　　“这是啥物碗糕？”

　　“这呣是普通的 chhit-thô 物仔。伊會飞。这號做飞机(飞凌機)啦。我的飞机。”

　　我有淡薄仔風龜風龜，共伊讲我會飞。伊听了後chhoah一下，问讲：

　　“甚物？敢讲汝是按天頂落落來(lak--lo̍h-lâi)的？”

　　“喺啊”(hēⁿ--a)，即擺我小可有咔谦虚淡薄。

　　“Hâⁿ 啊？！有影笑诙着着(to̍h-tio̍h)！”。

　　看小王子笑kah gî-sai-sai，我實在诚bōe 爽。我感覺别侬该當噯严肃來看待我的不幸。尾仔，伊佫讲：

　　“若安呢，汝oân仔是天顶落來的ho·ⁿ！汝是叨一粒星球的？”

　　伊安呢讲，我著小可ioh著伊是ùi叨位來的...我赶紧问伊讲：

　　“汝是tùi叨一粒星球来的呣？”

　　呣佫，伊并無回答我的问题。他目睭看飞机，略仔有咧tìm头，又佫开喙來讲话：

　　“着是讲呣，驶即號傢俬頭仔，汝是無可能按真远的所在來的…”

　　话讲煞，伊soah静静…家己一个呣知咧想啥货，想kài久。尾仔，看伊按裤袋内iam出迄张拄才央(iang)我画的羊仔图，戆戆(gāng-gāng)無做聲，呣知佫咧考虑啥货。
　　雄雄讲起“别的星球”，佫讲一个有頭無尾，互我对面頭前即个小王子愈來愈好玄，愈來愈想卜知影佮in 有關係的儕儕秘密。

　　“汝是tùi叨位来的？你兜伫啥物所在？汝按算卜共迄只羊仔chhōa去叨？”

　　伊考慮liam-mi仔，尾仔应我讲：

　　“佳哉，佳哉汝互我迄奇(kha)箱仔，暗時仔聽好(thèng-hó)互羊仔囝tòa 。”

　　“He当然的loh！汝若听话，我佫送汝一條索仔，日时仔聽好共伊缚起來，小等咧，我著卜顺紲佫送汝一叢柴柱(thiāu)。”

　　我安呢建议，無疑悟(bô-gî-gō·)小王子聽了若像呣是真歡喜。

　　“缚起來？有够奇怪的想法。”

　　“汝若呣共伊缚起來，伊会四界(sì-kòe)走，走無去。”

　　我這个朋友又佫咧笑也：

　　“汝想讲伊会走去叨位？”

　　“呣管啥物所在。横直伊会一直走、一直走……”

　　即个时阵，小王子雄雄soah转(tńg)正經起來，共我应讲：

　　“這汝呣免驚，阮迄搭，所在真细真细。”

　　绁落去，伊soah略仔郁悴郁悴，家己咧唸講：

　　“直透走，嘛是走bōe 偌远…”

第4部

　　过無偌久，我佫了解着另外一層重要的代誌，小王子讲in tòa 的迄粒星球,kan-taⁿ比咱地球顶的一間厝仔咔大无偌儕。

　　若這我颠倒bōe 感覺驚惶(kiaⁿ-hiâⁿ)。我知影地球、木星、火星、金星即寡仔有名號的大行星lia̍h外，猶佫有成百粒無名的星球存在，不而过chiah-ê無名星透底kài细，凖講千里鏡嘛而不然(jî-put-jiân)看會着。天文学者見若(kiàn-nā)新发现着一粒星，着共伊编一个号，比论讲號做“325小行星”。

　　我有重要的证据会当说明小王子是按“小行星b612”來的。即粒小行星遘taⁿ kan-taⁿ捌互人类觀测过一擺，he是1909年一个土耳其的天文学家用千里镜看着的。

　　当时，即个土耳其的天文学家捌伫一擺国际天文学家代表大会顶，对伊的发现作过重要的论证。不而过，迄阵仔因为伊個人穿插(chhēng-chhah)的关系，無侬卜相信伊。hiah-ê 大侬見擺着是安呢。

　　好佳哉，土耳其有出一个独裁者，为着“小行星b612”的名望，强迫伊的国民拢嗳改穿欧式的服装，若無着卜判死刑。1920年，即位天文学家穿kah水噹噹，佫一擺为伊的發現作论证。即擺所有的侬拢chiâu同意伊的看法。

　　我讲chiah-ê掺“小行星b612”有tī-tāi的故事互恁听，佫讲伊的编号互恁知，这完全是因为大侬的缘故。chiah-ê大侬透底合意讲一寡仔数字。有時仔汝对大侬讲起一个拄拄相捌朋友，大侬往往bōe 共汝问一寡仔咔有实际意义的问题。可比讲，大侬从來(chêng-lâi) bōe 去问：“新交的朋友讲话声音啥款啊？嗳sńg啥款的游戏啊？有咧收集蝴蝶标本抑無啦？”……in 透底會汝：“朋友幾岁也？兄弟姊妹幾个啦？肥抑 sán？家境好抑是歹？”……in lia̍h-chòe安呢才有算了解朋友。假使汝共in 讲：“我看着一thōng起kah水噹噹佫新点点的楼仔厝，碰窗金 sihⁿ-sihⁿ，外墙又佫白晳皙(pe̍h-siak-siak)……”安呢，in 稳当想無即款厝仔到底有偌好。汝一定嗳共in 讲：“我看着一thōng 价值成百萬人民币的番仔楼。”安呢，in 一定会哀kah真大聲：“哇！有够súi的厝！”

　　汝若是共大侬讲：“小王子存在的证据是伊生做真súi，真好鬥阵，伊想卜挃一只羊仔囝。卜挃一只羊仔囝，這证明伊的存在。”听汝安呢讲,in 一定会hàiⁿ 頭，讲“汝即个三岁囡仔”！呣佫，汝若是共in 讲：“小王子是tùi小行星b612來的”，安呢in 一定听kah信信，嘛bōe 佫共汝問kah有一支柄通攑。in 一贯着是安呢。咱囡仔侬腹肠一定嗳放咔阔的，呣好佮in hiah-ê大侬咧计较。

　　話講倒转來，若会曉过日子的侬，是無咧管汰伊啥物编号呣编号！我實在足ǹg-bāng会当亲像咧“讲神古”安呢來开始即个故事。我真想卜安呢讲：

　　“古早古早，有一个小王子，伊tòa 伫一个佮伊的身軀平大仔平大的星球顶面，伊真ǹg-bāng有一个朋友……”对会曉过日子的侬來講，安呢讲会咔真。

　　我是無嗳侬凊凊采采讀我的册，卜讀汝着注心讀。我咧讲过去的時，心肝頭總是艰苦艰苦。我的朋友chhōa著伊的羊仔囝离开我已经六年也。我会坫遮骨力寫，是因为我驚我会共伊放bōe 记。共朋友放bōe 记，這實在是一層悲哀的代誌。呣是所有的侬拢有朋友。Ah我嘛無可能佮hiah-ê大侬共款，kan-taⁿ对数字感兴趣。着是安呢，我才会去買彩墨佮铅笔。我食遘即款岁頭，一世侬，kan-taⁿ六岁迄年捌画过破腹佮無破腹的锦蛇，此去着呣捌佫试过，即阵，食老才佫來學pûn鼓吹，硬liau哦！呣佫，我定着嗳尽量画互会成 (sêng)，虽然無啥把握。一幅画了hàm-hàm，另外一幅着真正害。上害的是伊（小王子）的体格寸尺hâ 拢bōe 准，有寡仔所在画了伤奒(hai)，有寡仔所在画了伤细；衫裤的色緻oân仔lia̍h bōe 啥会凖。姑不将，噯即爿改改咧、迄爿 chhiâu-chhiâu 咧，画出一个大概。hoān-sè有寡仔重要的部分画了走精(cháu- cheng/cháu-cho̍ah)去，请恁逐个嗳体諒，因为我即个朋友，伊家己着拢罕咧共我讲kah真明。伊认为我oân仔佮伊共款。呣佫，實在诚遗憾，我无法度看着kheh仔内迄只羊仔囝。我kán-ná 那來那亲像hiah-ê大侬，我看我是老也。

第5部

　　我差不多逐工拢会当了解着一寡仔佮小王子有tī-tāi的信息,可比讲in 迄粒星球啦，伊是安怎卜出外啦，伊的行程啦……chiah-ê信息拢是伫無意中ta̍uh-ta̍uh仔了解着的。第三工，我着了解着一層互侬伤心代誌，he是一齣掺一种號做“猴面包树”有牽连的悲剧。

　　即擺共款佮羊仔有tī-tāi。

迄阵，小王子呣知咧操烦啥物代誌，雄雄问我讲：

　　“羊仔敢正實会食细欉树仔？有影無影？”

　　“有影啦，正實的。”

　　“啊，我足歡喜的。”

　　我想無“羊食树仔栽”即款代誌有啥通歡喜的。小王子佫讲：

　　“着是讲，羊仔共款会去食猴面包树呣？”

　　我共伊讲，猴面包树呣是细欉树仔，是一款大kah若像天柱(thiⁿ-thiāu)的树仔；凖讲有一群象做伙來跋(pe̍h/pu̍ih)一欉猴面包树，嘛無法度共伊跋振动。

　　小王子伊soah起嗳笑：
“呵呵~~若安呢，chiah-ê象，呣着嗳一隻一隻叠叠(thia̍p)起來？！”

　　看起來伊佫是不止仔内行，伊共我讲：

　　“猴面包树oân仔有暴芛(puh-íⁿ)的时阵...”

　　“嗯。是讲，汝乜代(mih-tāi)卜放羊仔去食猴面包树栽咧？”

　　伊应我讲：“唉！這也(ā)使讲！”聽伊的意思是讲即个道理通侬知，无需要佫解说(kái-soeh)。不而过我是真正無瞭解，我定定嗳了真儕工、了真儕心神才有法度瞭解伊講的代誌。

　　我尾仔才瞭解小王子in 迄粒星球oân仔佮别个星球共款，涂骹兜的草仔嘛是有好bái草的差别。好草会结好籽，当然歹草伊着会结歹草籽；呣佫草仔籽無 tè看，透底互汝分bōe 清是好抑是歹。草仔籽tâi伫涂骹底，时阵若遘，伊自然会生根暴芛(puh-íⁿ)。设使暴出來的新芛是菜頭、玫瑰，若安呢咱着由在伊生湠、由在伊大欉。设使是暴出來的是一欉歹草種，咱著嗳冗早(liōng-chá)共伊抠献捒(khau hìⁿ-sak)，咔bōe日後起敗害。聽讲伫小王子in 星球hia，有一种kài恐怖的种籽仔——着是猴面包树的种籽仔啦。伫in 迄搭，即种呣成(m̄- chiâⁿ)种籽仔湠(thòaⁿ) kah規四界(sì-kè)，并且成做一种災難。這猴面包树的树仔栽，原在真奇怪，细欉的時若無赶紧共伊抠捒，聽候(thèng-hāu)互伊略仔咔大欉的，有時连神仙也抠伊bōe 振动。時间一下久，伊会愈湠愈厉害，树仔根会钻按地心去，那钻那深，遘尾規粒星球著拢總互伊钻thàng-thàng。若是星球本身着有够细粒，ah猴面包树又佫真儕，安呢遘尾仔規粒星球着會必了了、崩了了、散了了。

　　“这算纪律问题。”尾仔，小王子有解说(kái-soeh)互我听。“透早睏精神，頭面洗洗咧，嗳赶紧去门去拔(pu̍ih/pe̍h)猴面包树栽。即种树仔栽细欉的時陣掺玫瑰相亲像，看清楚了後，嗳赶紧來共拔献捒(pu̍ih hìⁿ-sak)。做即项工课(khang-khòe)實在诚無義量(bô-gī-niū)，呣佫诚简單。”

　　有一工，伊共我苦劝，叫我着嗳注心画一幅真súi真súi的图，伊讲安呢阮厝迄搭的囡仔着永远会记咧即層代誌。伊讲：“假使有一工，囡仔兄出外去旅行，这对in 來讲原在真有路用。有时，咱会chhōe借口，超工無嗳做工课(khang-khòe)，若像嘛無啥物败害；不而过，猴面包树栽若一工無抠，尾仔一定会造成大灾难！我捌去过一粒星球，一个贫憚(pîn-tōaⁿ)侬tòa 伫hia，有三欉树仔栽伊抠無离，结果……”

　　自安呢，小王子伫邊頭那介绍，我那画，尾仔規粒星球拢画起來。我从来(chêng-lâi)呣爱學大人物的口氣讲话，實在是因為猴面包树伤过危险，逐个佫拢無啥了解，对hiah-ê 來小行星的侬來讲，佫咔是危險，所以即擺，我卜用一款佮以早拢無共款的聲嗽(siaⁿ-sàu)來共逐个儂

交代。我讲：“囡仔兄啊，嗳致意(tì-ì) hiah-ê猴面包树哦！”我卜叫我chiah-ê朋友做伙來张弛(tiuⁿ-tî)即个危险——in 掺我共款，长期以來危险着存在伫咱的身軀邊，呣佫逐个soah拢激放放、若像無要無紧。我诚認真咧画，画诚久才共即幅图画出來。我共逐个讲的即个教训真正重要，所以我家己加做一寡仔，我感覺有價值。hoān-sè 恁會僥疑僥疑，是安怎册底其它的图拢無像即幅hiah-ni̍h lè斗？真简單：我嘛真想卜画咔súi的，呣佫soah画拢bōe 出來。颠倒是即幅猴面包树，我咧画即幅的時，kán-ná有一种意志一直咧共我鼓励。

第6部

　　啊！小王子……佮汝斗阵，我才通ta̍uh-ta̍uh仔了解着汝的生活、汝的苦衷。汝總是恬恬仔(tiām-tiām)坐坫hia，看日頭咧落山，這是汝唯一興做的代誌，我遘第四工才发现。迄阵仔，汝安呢共我講：

　　“我爱看日頭落山，行，咱斗阵來去看！”

　　“是讲，這嗳聽候(thèng-hāu)……”

　　“聽候啥？”

　　“聽候日頭落山啊。”

　　代先，我看汝gông-ngia̍h一下。尾仔，連汝家己嘛爱笑......汝讲：

　　“我雄雄 bōe 記咧，想讲(siūⁿ-kóng / lia̍h-chún)是伫阮hia！”

　　有影啦，逐个拢嘛知，美国若中昼(tiong-tàu)，法国拄好日頭卜落山，tòa 伫美国的侬若有法度随赶去法国，安呢拄好会当看着黄昏的日頭！是讲，法国是hiah-ni̍h仔远。不而过，伫恁迄粒小行星，骹步小可仔徙动(sóa-tāng)一下，汝随时著会得看着想卜看的夕阳佮红霞……

　　“我一日，上儕捌看过四十三擺日頭落山。”

　　佫过有liâm-mi-á，汝又佫讲：

　　“汝敢知影，有時仔汝若感覺bōe 快活，汝着想卜去看日頭落山。”

　　“一工看四十三擺，汝哪會chiah-ni̍h鬰悴？”

　　小王子伊無应(ìn)。

第7部

　　第五工，猶原是羊仔的代誌，互我通全部了解着小王子的秘密。佮前幾工相亲像，我無閒我的工课(khang-khòe)，伊想伊的代誌。伊恬恬(tiām-tiām)思考真久，若像是想着啥物道理，雄雄無頭無尾着共我問：

　　“羊仔若卜食树仔栽，安呢伊敢呣是共款会食花？”

　　“伊看着啥食啥。”

　　“连有刺的花嘛食落去呣？”

　　“有刺的嘛食去！”

　　“安呢刺有啥路用？”

　　我呣知卜安怎应伊。迄時我拄好咧扒一粒撰(sōan) kah 真ân 的螺丝。機器的故障kán-ná真严重，水嘛啉卜了也，我真烦恼遘尾無法度行出即片沙漠，心肝頭真正食急。

　　“若安呢刺有啥路用咧？”

　　小王子若有问题，無問kah清楚透白，伊是bōe 准煞(bōe-chún-soah)。Hit粒夭寿螺丝害我氣kah phut-phut-tiô，我凊采共伊应一句：

　　“刺哦，無路用啦，he根本着是伊的出頭。”

　　“噢！”

　　伊考虑tak久仔，我感觉伊即擺共我应话略仔歹歹：

　　“我呣信！花hiah-ni̍h 软chiàⁿ，hiah-ni̍h 温纯，in 千方百计保护家己，in lia̍h准講有刺伫咧，侬才会当感覺着in 的súi…”
　　我恬恬無做聲。我迄阵kan-taⁿ想讲卜赶紧共迄粒螺丝搤(iah)起來，若無着卜攑铁锤共(kā)啄献捒(tok hìⁿ-sak)。無疑悟，小王子又佫来共我tâⁿ：

　　“你soah讲是花咧…”

　　“好也，好也！我啥物拢無讲！我是凊采共汝应应的niā。拜托的，我有正经的工课(khang-khòe)卜做。”

　　伊感覺真驚惶(kiaⁿ-hiâⁿ)，伊想bōe遘我會安呢共伊喝。

　　“正经工课？”

　　他看我雙手ba̍k油ba̍k kah烏臭臭，一手攑鐵锤仔，一手hōaⁿ tòa 一个生做三角六耳的機件顶頭。

　　“汝讲话佮hiah-ê大侬共款！”

　　伊讲安呢，我soah感覺真狼狈(liông-pōe)。了後，伊變kah愈野赤:

　　“汝是非無分…逐项滥滥做一下！”

　　伊氣kah phi̍h-phi̍h-chhoah，頭壳hàiⁿ來hàiⁿ去、红頭毛弄起弄落。

　　“我捌去过一个星球，hiatòa 一个红面仙。伊根本呣捌闻过花的芳味；嘛呣捌看过天顶的星生做圓抑扁。伊無交半个朋友，伊kan-taⁿ知影算数(sǹg-siàu)，偆的逐项呣捌做过。伊規工拢佮汝共款，定定讲有正经代誌卜做。即款侬實在真假仙，伊根本着呣是侬，伊是蘑菇。”

　　“是啥货？”

　　“是蘑菇！”

　　小王子正實氣kah一支面白苍苍。

　　“千百年來，花生成着是会發刺，羊仔生成着是会食花。汝噯知影花是安怎直透咧制造hiah-ê無路用的刺仔，这敢讲着呣是正经代誌？敢讲羊仔佮花的矛盾着無重要呣？这敢無比迄箍阿肥仔红面仙的数目(siàu-ba̍k)咔要紧？假使即个世间kan-taⁿ偆一蕊花，即蕊花kan-taⁿ開伫阮迄粒星球，不而过soah去互一只羊仔無講無呾(tàⁿ)共拆食落腹，安呢敢讲無重要？”

　　伊那讲那受氣：

　　“假使規个宇宙kan-taⁿ偆一支花，假使有侬真合意即支花，安呢，即个侬逐擺眈(taⁿ)頭看天星的時，伊一定会定定感覺真福氣。他聽好(thèng- hó)大聲共侬讲：‘我迄蕊花伫叨一粒星球顶面…’，呣佫，若是不幸花去互羊仔食去，安呢对伊來讲，着若像天顶所有的星一目匿(chi̍t-ba̍k- nih)拢總變暗淡去！敢讲這oân仔無重要呣？！”

　　他已经讲bōe 落去也，坫hia咧目屎四湳涶，哭kah呣知今仔日拜幾。

天卜暗也，我手头的工课做bōe完，只好佫放咧。啥物"锤子、螺钉、枵寒(iau-kôaⁿ)、死亡…"，我已经拢總bōe 記去也。伫即个宇宙内底，伫一粒星球顶，伫一粒行星顶，伫我tòa 的行星顶，伫咱的地球顶，有一个小王子真需要我的安慰！我共伊揽伫身軀邊，揽稠稠(tiâu -tiâu)。我摇伊的身軀，共伊讲：“汝合意的迄蕊花無危险啦…我画一間 羊 tiâu 共迄只羊仔關起來…我画一领戰甲共汝的花幔(moa) 起來…我…”我實在呣知影嗳佮伊讲啥。我感觉得家己變kah真頇颟(han-bān)。我呣知卜安怎去共伊安搭…唉，目屎，目屎永远是赫呢仔奇妙啊！

第8部

　　真紧，我对迄蕊花有进一步的了解。往过，伫小王子in hia，花开的時，花瓣透底kan-taⁿ结一重(têng) niā。花拢诚细蕊，bōe 镇位，嘛bōe 互侬感覺cha̍k-chô，往往是透早开，暗時随敛去(lian--khì)。一时阵仔，嘛呣知tùi叨位吹來一粒草仔籽，尾仔即粒草仔籽又佫暴芛(puh -íⁿ)。迄阵，小王子特别注意即欉新芛，代先伊oân仔咧僥疑(giâu-gî)，想講敢會是别种猴面包树。呣佫，过無偌久，即欉新芛着無佫直直大欉起來，并且开始有咧结苞，看勢是卜开花也。不而过，尽管小王子逐工守伫伊的边頭，伊偏偏着是呣开花。小王子咧想：即蕊花稳当是覕(bih)伫花苞内底直透咧梳妆打扮，伊一定足爱súi的，若無装kahsúi噹噹、抹kah芳貢贡，伊是bōe hia紧出來的。对对(tùi-tùi/果然)是安呢，遘kah有一工透早，日出的時，花嘛开也。

　　花卜出世進前，虽然注心准备kài久，呣佫现出來，伊着假空咧哈耳(hah-hī)：

　　“失禮啦，我拄睏精神niā，汝看我的頭毛佫sàm-sàm…”

　　迄時小王子已经激动kah无法度控制：

　　“哇！súi súi súi！實在有够súi……”

　　花蕊宽宽仔(khoaⁿ-khoaⁿ-á)共伊应讲：

　　“喺啊(hēⁿ--a)，我是hām日頭同齊出世的咯(koh)…”

　　小王子感覺花蕊有淡薄仔咧展風龟，不而过，论真讲，伊确實是súi kah會驚死侬。

　　伊对小王子讲：“即mái应该是食早頓的时阵ho·ⁿ，请汝顺紲共我攢(chhôan)一份來…”

　　小王子soah歹勢歹勢，赶紧去攑喷桶(phùn-thàng)喷槍，舀水來沃花。

　　即蕊略仔爱風龟、又佫厚疑心的花，自安呢逐工咧拖磨、咧差教小王子。可比讲，有一工，伊对小王子讲起伊身軀顶迄四支刺：

　　“虎豹仔hiō·，汝共in 讲，叫in 做汝來！我無咧驚in ！”

　　小王子共应讲：“阮遮無虎豹仔，虎豹仔嘛無咧食草仔”。

　　花蕊细聲应讲：“我呣是草仔。”

　　“失禮啦。”

　　“我是無咧驚虎豹仔啦，不而过我讨厌即港(káng)生凊风(chhiⁿ-chhìn-hong)。汝有風堵(hong-tó·)通閘風(cha̍h hong)無？”

　　小王子咧想：“讨ià生凊風…這对植物來讲，运氣實在有咔害淡薄...即蕊花佫是诚歹伺候哩…”

　　“我看暗時汝嗳共我顧互好。恁即个所在有够寒、有够gàn (gân)。我坫恁遮tòa bōe 惯勢，侬我往过tòa 伫…”

　　伊讲遘遮，家己soah恬去(tiām--khì)。伊拄來的时阵不过是一粒草籽仔。伊根本無捌見过外口的世界。伊知影家己讲白贼讲kah煏空 (piak-khang)去，soah見笑转受氣，超工khām嗽两三声。伊使(sái)即招，其實是咧提醒小王子，頭先吩咐的代誌猶未做，伊催小王子：

　　“風堵咧？”

　　“我随來去攑(giâ)。是讲，汝頭拄仔講he…”

　　花蕊赶紧佫再大聲假khām嗽，意思bōe 输是咧讲：好也啦，汝佫呣紧去攢！

　　虽然讲，小王子本然是真心咧佮意即蕊花，呣佫，鬥阵一暂了後，伊soah开始对即蕊花产生僥疑。小王子着是安呢，侬讲一寡仔無要無紧的话，伊soah看真重，结果是害家己咧加烦恼。

　　有一工，小王子共我讲：“我無应该相信伊的话，無应该相信hit蕊花讲过的话……憖看to̍h看、憖鼻to̍h鼻，安呢着好也咯！我迄蕊花虽然是芳嗆嗆(phang-chhèng-chhèng)，呣佫我是bōe 曉通享受。迄擺，伊讲着虎豹，本然我是应该嗳同情伊，呣佫颠倒soah互我感覺诚怨嘆…”

　　不而过，真紧小王子又佫讲：

　　“迄阵仔我逐项呣捌！我實在無应该kan-taⁿ凭伊讲的话着來咧判断伊的好歹，照道理，我是嗳佫看伊作为才着。是伊丰富着我的生活，我實在無應該放捒伊做我一个侬走出來。我kan-taⁿ看着伊的虚華，soah bōe 曉去感受囥伫虚華后壁的温情。花的内心其實是hiah-ni̍h 仔矛盾！怪我当時伤chhóng-pōng，伤过呣捌代誌，bōe 曉通疼惜伊。”

第9部

　　我约(ioh/猜)小王子大概是趁一群候鸟搬岫的時，顺紲走出来的。卜出來的迄日透早，伊共星球顶的大细项的物件拢款kah诚齊整(chôe- cháⁿ)、诚四序(sù-sī)，连活火山嘛拢拼扫kah清氣tak-tak。—— in hia有两座活火山，早起时燃(hiâⁿ)寡仔饮糜(ám-bê)原在真利便。這以外，猶有一座死火山，卜出來進前，伊嘛顺紲去共(kā)清清拼拼咧。伊咧想，無定著死火山日後會佫變活起來嘛無一定！共拼拼扫扫咧，伊自然着会匀匀仔滚绞(kún-ká)，咔bōe 雄雄爆发起來。火山爆发，着若像迄号烟筒(ian-tâng)咧喷火煙共款。是讲，咱地球的人口實在猶無够儕，無法度去拼扫火山，所以咱遮的火山才会hiah-ni̍h 仔"费氣"。

　　小王子共偆的幾欉"猴面包仔树栽"全部拢抠抠起來。伊感覺心肝芛仔(sim-koaⁿ-íⁿ-á)略仔酸酸。伊想講hoān-sè bōe 佫倒轉來也。迄工，伊感覺hiah-ê普通時逐工咧做的工课，taⁿ做著加真親切。小王子最后一擺去沃花，有按算卜共伊藏(chhàng)起來。伊感覺鼻頭酸酸，目屎险险辗(lìn)落來。

　　“Bye...”小王子准备卜佮花蕊讲再會。

　　呣佫花kán-ná無共伊应。

　　“Bye-bye......”小王子又佫讲一遍。

　　"khe̍h...khe̍h...khe̍h..."花蕊ka嗽一辄(tiap)久仔，不而过無成(sêng)染風寒的款。

　　尾仔，花蕊總算开喙讲话：“我頭拄仔實在有够天tho̍h。请汝原谅我。我希望汝会幸福。”

　　花蕊無怨叹，小王子昂愕(gông-ngia̍h)一下，手摕花罩(hoe-tà)，柴柴(chhâ-chhâ)在(chhāi)伫hia，soah呣知卜安怎。伊想無花蕊哪會雄雄變kah chiah-ni̍h tiām、chiah-ni̍h温纯。

　　“無呣着，我爱汝。”花蕊共小王子讲：“Ah呣佫，因为我的懵懂(bóng-tóng)，互汝烦恼，ah汝拢吞忍(thun-lún)落去。這拢無重要啦。不而过，汝soah佮我平(pêⁿ)愚tû(gû-tû/愚蠢)……祝汝幸福。花罩仔汝收起來，我应该呣免佫用着這。”

　　“若起风落雨卜安怎？”

　　“我感冒無kài严重…暗仔時的臭凊風(chhàu-chhìn-hong)颠倒对我有好無bái……我是一蕊花。”

　　“若有蛇抑是蜈蚣趖过來咧?若是野兽咧？…”

　　“這汝放心，我若决心卜佮美蝶仔(bé-ia̍h-á)交陪，我是無可能會驚迄啰(hit-lō)跷痀仔虫(kiau-ku-á-thâng)來车盘。我相信這应该是一段传奇的故事才着(tio̍h)。若無，是啥侬卜來看我？Ah汝嘛卜去真远真远的所在也。汝呣免驚大mau的野兽，我有爪仔 (jiáu-á)，呣免驚。”

　　讲煞，伊佫攑(gia̍h)起迄四欉刺起來展……

　　“Mài 佫拖soa ah啦…哦！汝有够cha̍k--ê neh！汝既然卜走，嗳趁早，紧去啦！”

　　伊是驚小王子看着伊咧哭。伊是一蕊个性儼硬(giám-ngē)的花…

第10部

　　伫附近的宇宙空间内底，猶佫有325、326、327、328、329、330等等的小行星。小王子开始去访问即寡仔星球，伊想卜伫hiah chhōe寡仔工课來做，顺绁学寡仔智識kah经验。

　　第一粒星球顶面tòa 著一个国王。国王穿一领茄花色（紫色）透滥白底烏花毛皮做的大礼服，坐tòa 一隻体形简单呣佫真正英威的宝座顶頭。

　　国王看着小王子的時，喝一声：

　　“哦，来一个臣民。”

　　小王子家己咧想：“伊也呣捌看过我，哪会捌我？”

　　小王子哪知影，伫迄个国王的心目中，世界其實真简单：所有的侬拢是伊的臣民。

　　国王诚氣頭(khùi-thâu)，因为伊總算成做某一个侬的国王。伊对小王子讲：“徛咔过來的，互我斟酌bāi一下。”

　　小王子四界嘪嘪咧，想卜chhōe一个仔所在坐落來，不而过，規粒星球差不多去互国王迄领水噹噹的大禮服勘勘去(khàm-khàm--khì)也。 chhōe無所在通坐，小王子只好徛咧。呣知是呣是徛了伤久伤僐，抑是本成(pún-chiâⁿ)着诚thiám，小王子soah伫hia咧哈耳(hah- hī)。

　　国王对伊讲：“伫一个国王的面頭前哈耳，是無禮體、呣捌禮数。我禁止汝拍哈耳。”

　　小王子感覺诚見笑：“歹勢啦，我實在控制bōe tiâu 才会安呢，我是按真远真远的所在，一路踅(se̍h)來遘恁遮，遘taⁿ 拢猶未睏的neh。”

　　国王应讲：“安呢哦...好啦，我命令汝开始哈耳。我已经幾若年呣捌看儂咧哈耳也。对我来講，拍哈耳，hoān-sè 是一層趣味的代誌。来，汝佫哈耳一下！这是命令。”

　　“安呢哦，這...我soah略仔紧张紧张…我雄雄soah哈耳bōe 出來…”小王子感覺真歹勢。

　　“嗯…嗯…”国王共伊应講：“若安呢，我…命令汝liâm-mi哈耳，liâm-mi…”

　　国王家己咧嘀嘀嘟嘟、踅踅念(se̍h-se̍h-liām)，好親像略仔有咧受氣的款。

　　国王一心想卜展伊的英威，噯儂尊敬伊。伊無法度吞忍臣民呣聽伊的命令。伊是一个正港的君王。不而过，他嘛真善良，伊的命令透底有一定的道理。

　　伊定定安呢讲：“假使我命令一位将军变做一只海鸟，呣佫将军無服从我的命令，安呢，這bōe 當算是将军的过错，有过错的侬是我。”

　　小王子诚细腻(sòe-jī)來咧問伊：“我敢会使坐落來 ？”

　　“我命令汝坐落來。”国王那(ná)吩咐(hoan-hù)，那(ná)徙动伊迄领大禮服。

　　是讲，小王子實在感覺诚奇怪，行星chiah-ni̍h仔细，国王是咧统治啥货？

　　伊对国王讲：“万岁爷…请汝原谅，我想卜请教汝…”

　　国王赶紧抢伊的话尾讲遘：“我命令汝问我。”

　　“万岁爷…汝拢咧统治啥？”

　　国王简單共伊应讲：“我统治一切。”

　　“一切？”

　　国王轻轻仔用指頭仔(chéng-thâu-á)指著——伊tòa 的行星、别粒行星、佮所有的星。

　　小王子讲：“统治这一切？”

　　“统治这一切。”

　　路尾，小王子才知影，伊不但是一个真真正正的君王，而且佫是整個(chéng-kô)宇宙的君王。

　　“若安呢，chiah-ê星，敢拢服從汝？”

　　“He定著的！”国王共伊讲，“in 随時拢嗳服从。我是呣允凖無纪律的。”

　　即款的權力,實在互小王子感覺真驚惶(kiaⁿ-hiâⁿ)。设使真正掌握着即款的權力，安呢，国王一工着呣若(m̄-nā)看会著四十三擺日落山niā，伊聽好看七十二擺，一百擺，二百擺，横直爱幾擺着有法度看幾擺！嘛呣免捷捷(chia̍p-chia̍p)來咧chhiâu椅頭仔！想着安呢，小王子又佫想起互伊

放捒的小星球，雄雄心肝頭感覺真艰苦。伊大胆对国王提出一个请求：

　　“萬嵗爺，我想卜看日落山，拜托汝…命令日頭落山好無…”

　　国王共伊应讲：“汝想看māi，假使我命令一位将军，叫伊嗳親像一隻美蝶仔(bóe-ia̍h-á)安呢飞來飞去，抑是讲命令伊写一出悲情的剧本，抑是讲叫伊着嗳变做一只海鸟，呣佫即个将军伊無爱执行，安呢，汝讲是伊呣着(m̄-to̍h)，抑是我呣着？”

　　“安呢当然是汝呣着。”小王子真肯定來回答伊。

　　“無呣着，”国王讲，“共别侬提出要求，着嗳看侬做会遘抑是做bōe 遘。若讲權威，代先应该是建立伫咧理性的基础上。假使咱若命令百姓去跳海，in 一定会攑刀攑枪(gia̍h-chhiuⁿ)來佮汝車拚。我的命令是合理的，所以我有权要求别儂服从。”

　　“若安呢，我头拄仔讲的日落山，這...”小王子見若(kiàn-nā)提出问题，無问透機是bōe 凖煞。

　　“‘日落山’呣，汝看会着啦。我定著嗳吩咐(hoan-hù)日頭落山，不而过按照我的科学统治，這一定嗳等候条件成熟。”

　　小王子问讲：“若安呢，嗳等遘底噹時(tī-tang-sî)咧？”

　　国王未应進前，先hiau出一本厚phiang-phiang的暦日佇咧反(péng)，那掀(hian)那咧唸：“嗯…嗯…這日落山，量其约伫咧…伫咧...下暗(e-àm)七點八字的檻站！迄陣，汝着会当看着日頭落山，遘kah迄阵，伊自然會执行我的命令。”

　　小王子又佫开始哈耳。Bōe 當看着日落山，他感覺诚遗憾。伊感覺诚無議量(bô-gī-niū)，chôan对国王讲：“我無必要佫留坫遮。我卜來走也。”

　　因为拄拄chiah有一个臣民，国王加真氣頭(khùi-thâu)，伊用命令的口氣对小王子讲：

　　“呣好(m̄-hó·ⁿ)走，呣好走。我任命汝做大臣。”

　　“啥物大臣？”

　　“嗯…司法大臣！”

　　“不而过，汝遮kán-ná也無啥物仔儂通审判断咯。”

　　“He無的确啦”，国王讲，“我老也，我即个所在又佫细，拢無位通排我的銮驾。我若行路，着诚thiám，遘taⁿ 我猶呣别巡視过我的王国lio·h！”

　　“噢！hia我拢去看过也。”小王子那讲，那越頭去看星球的另外一角勢，"是讲，hia嘛共款無半个儂哩..."

　　“若安呢，汝着审判汝家己咯！”国王应讲，“这有影咔oh啦，审家己定著嗳比审别侬咔oh！汝若有法度好好仔审判汝家己，汝着是一个真正有才情佫有智慧的儂。”

　　“我喺(hehⁿ)，凊采啥物時陣拢有法度审判家己，無一定嗳坫遮审。”

　　国王佫讲：“嗯…嗯…我本然是想讲...我遮有一隻老鳥鼠，下昏時定定安呢喌喌叫(chiu̍h-chiu̍h-kiò)，吵kah我拢bōe睏咧。汝会当來审判伊，会当捷捷(chia̍p-chia̍p)判伊死刑。所以，伊的生死完全teⁿ伫汝的手頭。呣佫，汝嗳撙節用汝的權力，汝逐擺判伊死刑了後，著嗳随赦免伊，因为即搭kan-taⁿ一隻鳥鼠niā。”

　　“呣佫，我呣爱判儂死刑，我看我猶是來走咔好。”小王子讲安呢。

　　“Bōe-ēng--ê。”国王小可咧起狂。

　　不而过，小王子已经款好勢也。为着無卜互老君王感覺伤过悲伤，小王子共伊讲：

　　“假使万岁爷只是想卜得着一个實實在在的服从，汝会當互我一个合理的命令啊。比論講，汝會當命令我，伫一分钟内离開。我认为即个条件已经成熟也…”

　　国王啥物拢無应。頭起先，小王子佫頓蹬頓蹬(tùn-tiⁿ)，尾仔，伊咽一口氣，着做伊行囉…

　　“我派汝做我的大使(tāi-sài)。”国王赶紧佫喝(hoah)一聲。

　　小王子越頭，看著hit-ê国王又佫激一个真英威的甫士……

　　小王子伫旅途当中，家己咧想：chiah-ê大儂實在有够奇怪。

第11部

　　第二粒行星顶面tòa 一个爱風龟的儂，咱暂時著叫伊"風龟神兮"、抑是"謗風水鷄"着好也。

　　“哎哟！汝共(kā)看！一个欣慕我的儂來也！”即个爱虚華的儂远远仔看着小王子行过來，着 thiòng kah 、哀kah大聲细聲。

　　对hiah-ê爱風龟的儂來講，其他儂拢是伊的崇拜者。

　　“汝好！”小王子对伊讲，“汝的帽仔足奇怪的。”

　　“哦，这是共(kâng)接禮的時卜用的。”風龟神兮应讲，“若有儂对我表示歡迎佮尊敬的時，我着噯褪帽仔共in 接禮。不而过，遘taⁿ 拢無儂來行踏(kiâⁿ-ta̍h)。”

　　小王子無理解，chôaⁿ問伊講：“hâⁿ？敢有影？”

　　風龟神兮chôaⁿ共小王子提一个建议：“汝用倒手拍正手看māi 咧。”

　　小王子chôaⁿ聽伊的話，伫hia咧拍撲仔(phah-pho̍K-á)。Ah迄个風龟神兮，嘛随褪帽來答禮，看伊是假kah 赫呢仔谦卑，又佫有風度。

　　小王子心肝内咧想：“这比访问迄个国王咔趣味。”伊感覺诚好sńg，chôaⁿ直透咧拍撲仔。風龟神兮看伊佫咧拍撲仔，赶紧佫溜(liù)帽仔來答禮。

　　小王子chhit-thô差不多成字久(chiâⁿ-jī-kú)了後，soah感覺親像诚無義量、诚無趣味。伊对風龟神兮讲：

　　“有啥物好步数，会当互汝的帽仔落落來(lak--lo̍h-lâi)？”

　　風龟神兮假意無聽見，凡若(hōan-nā)爱展風神的儂，透底憖(giàn)儂呵咾，無噯儂嫌。

　　伊问小王子：“汝敢正實有钦佩我？”

　　“钦佩是啥物意思？”

　　“钦佩哦，著是講，承認我是即粒星顶...上巧的、上缘投的、上好額的、穿插上排祉(pâi-chí)的儂。”

　　“呣佫，即粒星顶頭嘛才kan-taⁿ汝一个儂niā！”

　　“為着我會當快活(khòaⁿ-oa̍h)，费神汝紧來钦佩我啦！”

　　小王子聽了後，肩胛頭giauh咧giauh咧，共伊应講：“好，我钦佩汝，是講，安呢汝是咧歡喜安怎？”

　　實在诚無議量，小王子看破做伊离开。

　　小王子一路行，一路咧想：“chiah-ê大儂，實在有奇怪。”

第12部

　　小王子紲落來访问的迄个星球，顶頭tòa 一个酒鬼仔。访问时间虽然真短，呣佫soah互小王子感觉加真伤悲。

　　“喂，汝咧創啥？”小王子问迄个(hit-ê)酒鬼仔。酒鬼恬恬(tiām-tiām)坐伫hia，面頭前一堆酒矸，空的、無開封的，满四界(sì-kòe)、茹苍苍(jû-chhiáng-chhiáng)。

　　“我咧食酒。”酒鬼仔看勢真鬰悴的款。

　　“你乜代(mih-tāi)卜食酒？”小王子佫问伊。

　　“为卜...放互bōe 记。”酒鬼回答。

　　小王子感覺伊诚可憐：“卜共啥代誌放互bōe 記？”

　　酒鬼仔頭壳勾勾，坦白共小王子講：“為了卜共我的見笑代放bōe 記。”

　　“汝有啥物見笑代？”小王子有心想卜共伊鬥相共。

　　“我興食酒，這着是我的見笑代。”酒鬼仔講煞，做伊激恬恬，無佫講话。
　　
　　小王子感覺無法度理解。看破佫行。

　　一路行，一路那咧想：chiah-ê大儂确确實實是诚奇怪。

第13部

　　第四粒行星是一个實业家(大生理侬)的地盤。即个大生理侬規工無閒chhih-chhih，小王子來遘了後，對方拢無眈(taⁿ)頭看伊。

　　小王子先佮伊相借問：“汝好。汝的薰支(hun-ki)熄去也。”

　　“三加两等于五。五加七等于十二。十二加三等于十五...汝好。十五加七，二十二。二十二加六，二十八...無閒工通点啦。咔停才來点。二

十六加五，三十一。哎哟！拢總五亿一百六十二万二千七百三十一。”

　　“五亿啥？”

　　“嗯？汝佫伫咧哦？五亿一百万…我嘛记bōe 清是啥货。我的工课(khang-khòe)诚儕…我做代誌一贯拢诚點陳，無迄个閒工佮汝練仙！二加五得着七…”

　　“五亿一百万啥貨啦？”小王子佫再問一擺。一旦有疑问，無問kah有一支柄通攑(gia̍h)，伊是bōe 煞尾。

　　大生理侬眈頭看著小王子，应讲：

　　“我tòa 伫即个星球顶五十四年也，kan-taⁿ捌互侬扰吵过三擺。第一擺是二十二年前，呣知按叨位仔趖來一隻金龟，共(kā)我扰吵着。金龟仔的叫声“啁啁叫”，實在歹聽kah會驚死侬，害我一條数目(siàu-ba̍k)算kah重tâⁿ三四擺。第二擺，是十一年前，迄陣拄好風濕病夯(giâ)起來疼， he是我普通時欠锻炼引起的。我實在無hia儕美國時间佮汝咧喝仙(hoah-sian)。我是个诚正經、诚严gâi的侬。即擺…這是第三擺！我计算的结果是五亿一百万…”

　　“幾百万啥？”

　　Taⁿ即位大生理侬知影講即擺稳当無法度静心囉，伊看破佫共(kā)小王子应講：

　　“幾百萬个kài细kài细的物件，chiah-ê物仔有時会出現伫汝的頭壳顶。”

　　“是胡蝇呣？”

　　“無nò·，是一寡會艶艶爍(iām-iām-sihⁿ)的物件。”

　　“是蜜蜂仔呣？”

　　“呣是啦，是迄款黄黄、又佫金金的物件仔，即款物件仔不時引起一寡仔贫憚侬(pîn-tōaⁿ-lâng)伫hia咧烏白想。我是一个真严肃的侬。我無迄个閒工想東想西。”

　　“啊，敢講是天顶的星？”

　　“着啦，to̍h是天顶星啦。”

　　“汝卜用即五亿粒星创啥？”

　　“是五亿一百六十二万七百三十一粒。我是一个严肃的侬，我做代誌一贯拢真點陳。”

　　“你按算卜用chiah-ê星创啥？”

　　“啥创？”

　　“是啦，卜啥创？”

　　“無卜创啥。遮拢我的。”

　　“星拢汝的？”

　　“拢我的。”

　　“呣佫我捌拄着一个國王，伊…”

　　“国王無占有權，in 只不过是咧‘统治’niā。這是两回事。”

　　“你beh 挃(ti̍h) hiah儕星有啥路用？”

　　“咱若好額起來，咱着会當去買别位的星，假使有侬chhōe著新的星。”

　　小王子心内咧想：“即个侬考慮问题若像有淡薄仔siâng進前迄个酒鬼仔。”

　　不而过，小王子真緊又佫问伊一寡仔问题：

　　“汝敢有才调共(kā) hiah-ê星拢占tiâu-tiâu？”

　　“Ah無....汝講hiah-ê星是啥儂的？”大生理儂真bōe 爽，共小王子拄一句。

　　“我呣知，不而过，應该是無儂的。”

　　“若安呢，hia拢嘛算我的，因为我是頭一个考慮即層代誌的儂。”

　　“kan-taⁿ凭安呢呣？”

　　“He當然的。假使汝抾(khioh)着一粒無主侬的钻石，若安呢即粒钻仔着是汝的；凖講汝发現一座無侬知影的岛屿，安呢即座岛屿着是汝的；佫比論讲，汝若比儂咔代先想著一个好步数，安呢汝着会當去申请一个专利，即个专利著是汝的。既然進前拢無侬想卜去占hiah-ê星，安呢hiah-ê星着是我的。”

　　“安呢講嘛有理啦。是講，汝挃(ti̍h) he卜创啥？”小王子佫問伊。

　　“我咧经营佮管理chiah-ê星咯。我一遍佫一遍來咧计算in 的数量。這是一项無简单的代誌。不而过，我是一个严肃佫骨力(kut-la̍t)的儂！”

　　小王子原在猶未满足，伊佫講：

　　“对我来講，我若有一條颔巾(ām-kin )，我着会当共(kā)摕起來围，嗳卜扎去叨，着扎去叨；我若有一蕊花來讲，准讲想卜挽(bán)，我着共伊挽落來。Ah汝咧，汝敢有法度将星挽落來？！”

　　“我無法度，呣佫我会当共(kā)寄伫银行。”

　　“汝是咧讲？？....”

　　“我意思是講，我會使将星的数量寫伫一张纸條仔顶，了後才佫摕去锁伫桌屉(toh-thòa)内。”

　　“安呢着好勢呣？”

　　“安呢着会使得。”

　　小王子心肝内咧想：诚好sńg。看起來佫不止仔趣味，是讲，這敢有算真了不起的正經代誌？”

　　若講起啥物號做“正經代誌”，小王子的看法佮hiah-ê大儂真無共款。紲落來，小王子佫讲：

　　“我有一蕊花，我逐工共(kāi)沃水。我佫有三座火山，我逐禮拜去共拼扫一擺。连死火山嘛做一下拼，無儂知影伊啥物時陣会佫复活(ho̍k- oa̍h)起來。我有火山、有花，因为有我，对我的火山佮我的花來讲，绝对有好無bái。不而过，汝本身，对著hiah-ê天星，soah無啥作用…”

　　大生理儂聽kah戇戇(gāng-gāng)，应bōe 出來。小王子只好佫行。

　　小王子一路行，一路那咧想：hiah-ê大儂實在足奇怪、足奇怪的。”

第14部

　　第五颗行星上kài奇怪，嘛上kài细粒。细kah kan-taⁿ会當khè一葩路灯、tòa 一个顾灯的侬。小王子實在想無：chiah-ni̍h细的星，又佫chiah-ni̍h仔偏挹(phian-iap)，顶頭也無厝仔也無tòa (tòa )其他侬，呣知点迄葩燈有啥路用？Ah迄个侬是安怎卜伫hia顾燈？


　　小王子家己咧臭giâu疑：“kiám-chhái即个儂有淡薄仔無正常，呣佫伊稳当(ún-tàng)会比国王、風龟神兮、生理侬佮酒鬼仔咔好一寡仔，上無，伊的工课(khang-khòe)嘛咔有意義。伊若点燈，着若像是加添一粒星，抑是一蕊花；燈若禁熄，就代表星抑是花卜來歇睏囉。即项工课有影值得呵咾(o-ló)，嘛不止仔有出脱。”

　　小王子來遘，見面着诚有禮貌來佮点路灯的侬相借問：

　　“Gâu早。——汝頭拄仔是安怎卜共(kā)路燈禁熄咧？”

　　“Gâu早。——这是命令。”顾燈兮应话。

　　“命令啥？”

　　“命令我嗳熄灯。——哦...暗安。”

　　一目匿(nih)，伊又佫點着(to̍h)迄葩路燈。

　　“若安呢，是安怎汝又佫卜共伊點着(to̍h)？”

　　“这是命令。”顾燈兮照原安呢讲。

　　“我聽無。”小王子讲遘。

　　“無啥通好解説的。命令着是命令。”顾燈兮ná講ná咧做伊的工课，“敖早。”

　　话講拄煞niā ，燈佫再禁熄去。

　　小王子看伊按lak袋内iam出一條手巾來咧拭頭额(thâu-hia̍h)。

　　“我做即款頭路(thâu-lō·)，實在真thiám頭。往过(éng-kòe)猶佫泛泛代(hàm-hàm-tāi)，透早熄灯，下昏(e-hng)点灯，偆的時间，日時仔歇工，暝時仔睏ka睡(khùn-ka-chōe)…”

　　“照安呢讲，是路尾有儂改變命令呣？”

　　顾燈的应讲：“命令是無改啦，呣佫，會害嘛是為著這！即粒星咧踅(se̍k)，一年比一年咔緊，呣佫命令soah拢無改。”

　　“路尾咧？”小王子问伊。

　　“路尾着是像即陣安呢，一分钟伊着踅一環，我连一秒钟着無通歇。見若(kiàn-nā)过一分钟我着嗳点一擺，佫禁一擺！”

　　“诚趣味，敢講汝即个所在，一日kan-taⁿ 一分钟久niā？”

　　“實在有够無聊，”顾燈的讲，“從(chêng)頭拄仔咱开講遘taⁿ ，已經过去個外月也。”

　　“個外月？”

　　“無呣着，拢總半点钟久。三十工！——哦...暗安。”

　　话讲拄煞，燈火佫着(to̍h)起來也。

　　小王子金金共伊相，讲實的，伊诚钦佩顾燈侬chiah-ni̍h仔死忠(sí-tiong)來咧遵守命令。伊想起咔早家己嘛定定chhiâu椅頭仔來咧看日頭落山。伊真想卜帮助即个朋友。

　　“我共汝讲一个撇步，会当互汝偸歇睏一下，汝憖(giàn)卜啥物时陣歇睏拢会使得"。
　　
　　“我定定嘛咧想卜歇睏。”顾燈兮应话。

　　有的侬虽然一贯真踏實(ta̍h-si̍t)、真照起工，呣佫有時oân仔會想卜小可踉港(làng-káng)一下。

　　小王子佫讲紲落去：“即粒星遮细，汝行三伐(ho̍ah)着聽好(thèng-hó)踅一辗(se̍h-chi̍t-lìn)。汝只卜匀匀仔行，不管时拢嘛会当看着日頭光，凖讲汝想卜歇工，汝着会使照安呢去做...汝卜嗳日偌(lōa)长，伊着有偌长。”

　　“汝即个撇步，对我來講应该無咔cho̍ah，其實我上希望的，是會當倒落去眠床顶的睏ka睡。”顾燈兮應伊。

　　“噢，安呢呣soah诚無拄好。”小王子咧咽氣。

　　“诚無拄好。”顾燈兮绁一句，“哦，gâu早。”

　　就安呢，路燈佫再禁熄......

　　小王子佫再继续伊的旅行，即擺，伊心肝内咧想：

　　“即个顾燈兮，定著会互hiah-ê 国王啦、風龟神兮啦、酒鬼猶佫大生理侬看無目地。呣佫，kan-taⁿ伊bōe 互我感覺可笑。這hoān-sè 是因为伊所关心的呣是伊家己。

　　小王子又佫嚥一口氣，伊对家己讲：

　　“本然，伊应該是我唯一会当做伙交陪的朋友。可惜，伊迄粒星球實在伤过细，两个儂根本tòa bōe 落…”

　　實际小王子是無勇气來承认：伊是咧留恋迄粒"儕侬呵咾(o-ló)少儂嫌"的星，特别是伫hia，二十四点钟著有法度看着一千四百四十擺日落山!

第15部

　　第六粒行星，看勢嗳比第五粒咔大成十倍。顶面tòa 一个老先生，他綿精(mî-chiⁿ)咧寫一抱(chi̍t-phō)册，一抱大部頭的册。

　　“喲(iŏh)！一個探险家來也(a)。”老先生看著小王子來遘，見面(kìⁿ-bīn/即時)着來咧相借问。

　　小王子揀一垛(tè)椅頭仔，坐tòa 桌仔邊，那咧喘大氣。伊已經行真久真久也！

　　“汝tùi叨位來的？”老先生问小王子。

　　“即本册hia大本，是啥货？汝咧創啥？”小王子倒問伊。

　　“我是地理学家。”老先生先應(ìn)伊。

　　“啥物號做地理学家？”

　　“地理学家，着是一种学者，伊瞭解叨位仔有海，叨位仔有溪、有城市、大山，抑是講沙漠。”

　　“這佫是不止仔趣味neh！”小王子講，“像這呣才有算正經頭路！”伊那講那越頭(oa̍t-thâu)四界bāi、四界看。伊從來呣捌看过chiah-ni̍h仔大的行星。

　　“汝即个所在诚súi neh！遮有海無？”

　　“这我無了解。”地理学家讲遘。

　　“喲！”小王子诚失望。“Ah無...有大山無？”

　　“这，我無了解。”

　　“若安呢，遮有城市、溪仔、抑是沙漠無？”

　　“这，我照原無了解。”

　　“無..汝佫講汝是地理學家？！”

　　“規欉好好——無错(剉)，”地理学家应讲，“不而过我呣是探察家，ah我暫時嘛無即款骹数(kha-siàu)。地理学家是無咧计算hit- lō城市、江河、大山、海洋抑是沙漠。地理学家诚重要，呣好四界抛抛走。伊bōe 使(bōe-sái)离开伊的办公室。不而过伊聽好(thèng-hó)伫办公室接見探察家。伊聽好斟酌询问hiah-ê探察家，共in 的回憶记载落下。假使伊認為某物侬的回忆有价值，安呢伊着會想卜调查对方的德行(tek-hēng)。”

　　“这是為啥物？”

　　“设使探察家若講白贼，寫出來的地理册定着会造成严重的後果，有可能是災难！佫有，爱食酒的探察家嘛共款嗳共(kā)調查。”

　　“这是為啥物？”

　　“酒醉误大事啊，本然是一个儂，互伊看做两个儂。遘尾仔，明明kan-taⁿ是一座山，soah變記做两座山。”

　　“我有熟似(se̍k-sāi)一个侬，若是叫伊做探察，伊稳当無够格。”小王子讲。

　　“有可能。所以讲，假使汝感覺一个探察家德行bōe 歹，安呢汝着会使去调查伊发現着的物件。”

　　“汝是讲，叫伊chhōa汝去看呣？”

　　“無no·h，安呢伤费氣。不而过汝会使叫探察家提供证据。比論講，设使伊发现一座大山，汝着嗳交代伊扎(chah)一寡仔石頭轉來。”……

　　……地理学家雄雄soah伫hia咧車東車西，呣知咧無閒啥。

　　“拄仔好，汝敢呣是拄拄按真遠真遠的所在來的！你着是探察家！來，汝紧共(kā)恁星球的情形介紹互我聽！”地理學家卜请小王子鬥相共(tàu-saⁿ-kāng)。

　　就安呢，地理学家chhiau出伊的笔记簿，又佫來咧削铅笔。伊定定先用铅笔记录一个初胚(chho·-phoe)，等待探察家提供证据了後，才佫用烏墨水正式共记录起來。

　　“啥物情形？”地理学家开始來咧问。

　　“Hăⁿ！阮hia噢...”小王子讲遘，“嘛無算啥啦，阮hia，所在诚细。我有三座火山，两座活的，一座死的。不而过，喙講‘死的’，其實嘛無一定啦。”

　　“無呣著。”地理学家oân仔同意小王子的看法。

　　“我佫有一蕊花。”

　　“噢，阮是無咧记录花草的。”地理学家共伊讲。

　　“這是為啥物？敢讲汝呣知影花是hiah-ni̍h 仔súi。”

　　“因为花真紧着會lian去，花的生命真短暂。”

　　“啥物號做短暂？”

　　“地理册是通世间所有的册本当中，上kài严肃的一种。”地理学家讲，“这款册是永遠bōe 过时的。真少有山咧徙位(sóa-ūi)，嘛真少有海水會凋(ta)去。阮咧寫的是一款永遠的物件。”

　　“是讲，死火山嘛有可能佫再复活。”小王子抵(tú)伊一句，又佫继續咧問：“啥物是‘短暂’？”

　　“火山有咧振動、無咧振動，对阮來讲拢共款。”地理学家讲，“阮关心的是有山無山。山的位置bōe 变。”

　　“呣佫...‘短暂’是啥物意思咧？”小王子问第三擺，伊若提出一个問題，着硬卜問kah清楚。

　　“意思是講：有可能真紧着會消失去。”

　　“汝是講我的花真紧着會lian去呣？”

　　“当然的。”

　　小王子自言自语來咧念讲：“我的花是短暂的，并且伊kan-taⁿ靠四欉刺咧防身！Ah我佫共(kā)伊孤一个hìⁿ tòa hia！”

　　这是小王子頭一擺感覺後悔，呣佫伊真紧又佫振作起来：

　　“汝敢是卜建议我四界去探察？”小王子問伊。

　　“無呣著，有一个所在，叫做地球，伊是一粒行星，”地理学家应讲，“伊真有名声…”

　　就安呢，小王子离开地理学家，一路行一路那咧数念(siàu-liām)伊的花。

第16部

　　第七粒行星，着是地球。

　　地球實在呣是一粒普通的行星！即搭有一百一十一个国王（烏侬国王定著嗳算在内），七千个地理学家，九十万个实业家，七百五十万个酒鬼仔，三亿一千一百万个"謗風水鷄"……安呢加加算算咧，地球顶上起碼有二十亿个大侬。

　　為卜互恁逐个对地球的大細有一个基本的概念，我想卜先安呢來共(kā)恁报告一下：人類猶未發明电以前，伫咧地球的六大洲，世间儂為卜点路灯，拢總需要一陣由四十六万二千五百一十一侬组成的队伍。

　　遠遠仔看去，實在不止仔壯觀。即支隊伍若咧行动，是可比歌剧園咧演芭蕾，是舞kah诚四序。上代先出现的是紐西蘭(新西兰)佮澳大利亚迄搭(hit- tah)的点燈侬。燈若点着(to̍h)了後，in 着随去睏。绁落來，輪着(lîn-kàu)中国佮西伯利亚的点燈侬peh上舞台。了後，in 嘛随覕 (bih)入去幕後。佫來，着輪遘(lîn-kàu)盧西亚(俄罗斯)掺印度国的点燈侬。了後，輪着非洲、欧洲迄角勢的侬。佫紲落去是南美洲，了後輪着北美洲。橫直，逐个拢照顺序來，骹步手路，實在真了不起。

　　北极hia kan-taⁿ一葩燈niā，南极迄爿嘛是共款；呣过，只有即两个所在的点灯侬，生活上kài轻松、快活：in 一年kan-taⁿ工作两擺。

第17部

　　有時仔，咱若咧讲笑、讲笑詼古的時，講过的話著咔無凖算。頭拄仔共恁讲点燈侬的故事，實在讲，是有咔譀(hàm)淡薄啦，若自底無了解地球的侬聽了hoān-sè 会产生一寡仔误会。坫咧地球顶，侬所占的空间其實诚细。设使地球顶即二十亿的居民全部拢集合做一下，安呢來講，只卜一tè 横、khiā各二十海里闊的大操场著有够排也。也就是讲相当於将全地球的人口拢总集合伫太平洋当中一粒上细的岛屿顶面。

　　是讲，恁若讲這互大侬聽，in 是無可能相信的。in 認為in 一定嗳占足大片、足大片的所在，in 定定想讲家己真了不起，親像猴面包樹hiah-ni̍h 仔大、hiah-ni̍h 仔了不起。恁聽好(thèng-hó)建议in 去计算一下。安呢，in 一定会真欢喜，因为in 真爱讲数字。不而过，恁無必要浪费时间去算即款無意義数字，完全無必要。恁嗳相信我。

　　小王子拄拄來到地球的時，伊著感覺诚奇怪，伊無看著半个侬，伊僥疑讲是呣是行呣着所在（星球）。迄个时阵，伊kan-taⁿ看著沙地顶面有一个银白色的圓箍仔咧趖。

　　小王子實在捎無he是啥，伊想卜先佮对方相借问看māi咧：“暗安。”

　　“暗安。”hit个會趖的物件，事實是一尾蛇。

　　“遮是叨一粒行星？”小王子问道。

　　“地球啊，遮是非洲。”蛇咧应话。

　　“啊！…哪會...敢讲地球拢無侬呣？”

　　“遮是沙漠，沙漠無咧徛侬。地球真大片。”蛇解説(kái-soeh)互伊聽。

　　小王子坐tòa 一tè石頭顶，taⁿ頭看天，伊讲：

　　“我ioh天顶的星，in 會一直透咧爍(sihⁿ)，是因為in 驚出外的侬chhōe無路通轉去in 家己的星球。汝看，我迄粒星，伊拄仔好伫咱的頭壳顶…呣佫，伊离咱足遠的！”

　　“真súi咯！”蛇嘛來咧呵咾(o-ló)。蛇佫問小王子，“汝來遮創啥？”

　　“我hām一蕊花咧激氣。”

　　“啊！”

　　一阵仔恬恬(tiām-tiām)，無侬讲话。

　　“侬tòa 伫叨位？”小王子代先开喙，“坫即片大沙漠，實在有淡薄仔孤單…”

　　“去遘有侬的所在，嘛是共款会孤單，”蛇安呢讲。

　　小王子雙目金金相著瘟伫塗骹兜的hit尾蛇。

　　“汝是诚奇怪的动物，hiah-ni̍h 细管(sòe-kóng)，细kah bōe 输若手指頭仔…”小王子久久仔才讲一句。

　　“呣佫我比国王的指仔頭咔有威力。”

　　小王子笑笑仔讲：

　　“你敢正實hiah-ni̍h 有够力……汝連骹也無……連卜出去外口踅chhit-thô嘛拢無法度…”

　　蛇诤(chèⁿ)讲：“我会當chhōa汝去真遠的所在，比讑讲，篷船有法度行偌遠，我着有法度行比伊佫咔遠。”

　　蛇讲煞，chôaⁿ趖(sô)來 soan(盤結) tòa 小王子的骹盤兮，若像是一tè骹環。

　　“互我bak著的侬，我会送伊去苏州賣鸭卵。”蛇佫讲，“呣佫汝是hiah-ni̍h 仔纯真，莫講(bo̍h-kóng)汝佫是按另外一个星球来的…”

　　小王子無应。

　　……

　　“伫即粒花岗石的地球顶，汝是hiah-ni̍h 仔软chiáⁿ，hiah-ni̍h 仔可怜。设使汝真正数念(siàu-liām)汝的星球，时遘我会當共汝鬥相共(tàu-saⁿ-kāng)，我会當…”

　　“嗯！我真了解汝的意思。”小王子講，“呣过，是安怎汝讲的话soah定定像若谜猜？”

　　“chiah-ê谜猜我拢會當來kā開拆。”蛇講遘。

　　紲落來，又佫静chiauh-chiauh。

第18部

　　小王子行过沙漠。伊一路kan-taⁿ有看著一蕊花，he是一蕊kan-taⁿ结三个花瓣，诚细蕊、诚 呣上目 的 花…

　　“汝好。”小王子佮花相借問。

　　“汝好。”花嘛接禮問好。

　　“汝敢知影地球侬tòa 伫叨位？”小王子真有礼貌咧问伊。

　　往过，花捌看一陣骑骆驼的生理侬tùi遮經过：

　　“侬喺(hehⁿ)？量其约仔六七个侬，幾若年前，我捌看过in 。呣佫，呣知卜去叨位chhōe in 。in 若親像水流破布，無固定的所在，in 安呢實在诚無利便。”

　　“再见。”小王子向路邊花说(seh)告别。

　　“再见。”

第19部

　　小王子peh上一座懸山。以早，伊看过的山，是迄三座咔無遘in kha-thâu-u懸的火山，迄阵仔，伊不管時共(kā)迄座死火山當椅頭仔。小王子家己咧唸：“徛tòa chiah-ni̍h-á懸的山，我一目着會當共規个地球看thàng-thàng，會當看著任何侬。”不而过，實際上伊kan-taⁿ是看著一寡仔利剑剑的石壁，佮深oang-oang的山崁。

　　“喂，汝好。”小王子大聲來咧喝，想卜看有侬應抑無。

　　“汝好…汝好…汝好…”山谷伫咧回音。

　　“恁是啥物侬？”小王子问。

　　“恁是啥物侬…恁是啥物侬…恁是啥物侬…”山谷直透咧回音。

　　“恁來佮我做朋友好無，我足無伴的。”小王子讲遘。

　　“我足無伴的…我足無伴的…我足無伴的…”猶原是山谷的回音。

　　小王子咧想：“即地球嘛有够奇怪！四界拢全山佮石頭，tēng-khok-khok、佫烏臭臭。即搭的侬頭脑嘛kài简单，in kan-taⁿ会曉學侬的讲话…侬阮hia，我有一蕊花，伊定定代先开喙共侬讲话…”

第20部

　　行过沙漠、盤过大石、蹽过雪地，小王子行真久真久，尾仔，伊總算发現一条大路。大路透底拢thàng去遘有徛侬的所在。

　　“逐家好。”小王子讲遘 。

　　目睭前是一片花園，内底的玫瑰花開kah红phà-phà。

　　“汝好。”玫瑰花應禮問好。

　　小王子看著hiah-ê 玫瑰花，发現講hiah-ê 花，其實hām家己的迄(hit)蕊花，完全拢共款生做，一絲絲仔著無精差。

　　“恁是啥物花？”小王子感覺诚驚惶(kiaⁿ-hiâⁿ)。

　　“阮是玫瑰花啊。”

　　“啊！”小王子一時soah神神、戆戆(gāng-gāng)……

　　伊雄雄感覺家己真不幸。以前伊迄蕊花定定家己咧臭弹讲是即个宇宙當中独一无二的一种花。不而过，伫即片花園内，上無着有5000蕊佮伊生做共模共様的花！

　　小王子咧自言自语：“假使伊看著這，一定會lia̍h狂…伊一定会假iàⁿ嗽kah真厉害，無的确驚侬笑，soah來張死。安呢，我著嗳佫假呣知，著噯佫去共(kā)看顾，若無，伊稳當會直透佮我激氣，無定著soah真正死死lian-lian去…”

　　紲落去，佫聽伊家己咧唸：“本成(pún-chiâⁿ)，我佫想講我迄蕊是全世界独一无二的，想bōe 遘伊竟然只是一蕊普通的花蕊niā ……

一蕊普通的花，佫加三座矮鑿鑿(oé-chha̍k-chha̍k)的火山……虽然有一座kiám-chhái永遠拢bōe死......呣佫，這一切，已經注定我呣是一个了不起的王子…”小王子愈想愈伤悲，soah nòa佇草埔仔顶哭悲哀。

第21部

　　即个时陣，呣知按叨位走來一隻狐狸。

　　“汝好。”狐狸來咧相借問。

　　“汝好。”小王子诚有禮貌來應一句。伊越頭看，呣佫啥物拢無看見。

　　“我伫遮啦，苹果树骹啦。”

　　“汝是啥侬？”小王子讲，“汝生做真súi。”

　　“我是狐狸啊。”

　　“咱做伙chhit-thô，好無？”小王子姑成(ko·-chiâⁿ)伊，“我家己一个儂niā，實在有够鬰悴的…”

　　“我bōe-ēng共汝鬥陣sńg”, 狐狸應講，“我猶未落性(lo̍h-sèng)的。”

　　“啊！诚歹勢。”小王子讲遘。伊考慮tak-kú-á，又佫問讲：

　　“啥物叫做落性咧？”

　　“汝呣是在地侬的款,” 狐狸问小王子，“汝來即个所在创啥？敢講是leh chhōe啥物件？”

　　“我来chhōe侬。”小王子讲，“啥物叫做落性？”

　　“chhōe'儂'？”狐狸讲，“儂有 chah 銃，in 用 he 來咧拍獵……這實在有咔歹辦！in 自來著無啥物優點，不而过，有一點互我憶著的，in 透底有飼雞仔。汝是beh來遮chhōe雞仔hehⁿ？”

　　“無啦，”小王子讲，“我是来交朋友的。啥物叫做‘落性’？”

　　“這噢…Taⁿ，這早著無咧時行也，”狐狸讲，“意思是讲‘建立联系’。”

　　“建立联系？”

　　“無呣著，”狐狸讲，“对我来讲，汝只是一个查甫囡仔，真普通的查甫囡仔。我無需要汝，汝嘛無欠用我。Ah 对汝來講，我嘛只是一隻狐狸，一隻普通的狐狸niā 。呣佫，假使汝有才调共我压落底，互我甘願服從汝的差教(chhe-kà)，安呢咱两个著互相离 bōe 開也。遘迄陣，对我来講，汝著是我伫世间的唯一；Ah我对汝来講，oân仔是唯一的。”

　　“我略仔聽有也。”小王子講，“有一蕊花…照安呢講，是我共伊tiau落性的囉…”

　　“有即个可能啦。”狐狸讲，“即个世間，啥物代誌拢有可能發生…”

　　“哟，這呣是地球顶的代誌啦。”小王子讲。

　　聽小王子安呢講，狐狸戇(gāng)一下。

　　“呣是地球…無..敢講是伫别个星球？”

　　“是啦。”

　　“伫叨一个星球，有猎侬無？”

　　“無咧。”

　　“真讚！真趣味！Ah...有飼鷄仔無？”

　　“嘛無。”

　　“噢。安呢嘛無十全(cha̍p-chn̂g)。”狐狸诚失望。

　　不而过，狐狸又佫呣甘心：

　　“我的日子嘛过kah诚無趣味。我去lia̍h鷄仔，侬著beh來lia̍h我。鷄仔拢共一个样，侬嘛拢共一个样。所以，我感覺诚僐、诚無聊。不而过，汝若有才调共調教(tiâu-kàu)落性，安呢我著會加真快活。我會聽聲，若聽著别侬的骹步聲，我著覕入去岫的；呣过若是汝的骹步聲，我會共當作是咧欣赏音樂，我會佫ùi岫的钻(nǹg)出來。汝看，hit爿的麦仔田汝有看著無？我呣食面包，麦仔对我来講無路用，當然，我对麦仔田嘛無興趣。這實在誠怨嘆。不而過，汝的頭毛oân仔金金，我咧想，汝若肯共我調教，這一定是一層誠美妙的代誌。汝看hiah-ê麦仔，色緻(sek-tī)共款嘛是金黃色的，我若看著麥仔，我著會想著汝。此去，hoān-sè 我會變kah足想beh聽hit款‘風吹過麥仔田的聲說(siaⁿ-seh)’…”

　　狐狸講煞，恬恬仔(tiām-tiām-á)看著小王子。

　　“拜托汝共我成教(chhiâⁿ-kàu)，好無？”狐狸直透咧姑成(ko·-chiâⁿ)。

　　“我是真愛啦。呣佫，我實在無時間呢(neh)。我噯去chhōe朋友、拜訪朋友，我佫有真儕代誌猶未瞭解。”

　　“凡物(hōan-mi̍h)，汝噯先替伊落性，chiah有法度去瞭解伊。”狐狸講，“hiah-ê‘儂’，in 透底無想beh了解世間的萬物(bān- mi̍h)，in 一貫攏選擇去買現成的物件。不而过，現taⁿ (hiān-taⁿ), 即个世間猶無迄啰(hit-lō)買賣朋友的店頭，所以世間的儂，in 透底攏無朋友。汝若的確想beh交朋友，無汝先試看替我落性，共(kā)我調教 (tiâu-kàu)，互我做汝的朋友。汝看安怎？”

　　“若安呢，我應該安怎做咧？”小王子問伊。

　　“汝噯有耐心。”狐狸共伊應講，“頭起先，汝噯坐tòa 即片草埔仔顶，小可仔離我咔遠淡薄。了後，我先用目尾仔kā汝相(siòng)，汝啥物話攏mài講，因为誤解透底攏是言語引起的。不而過，汝會當一工仔一工，慢慢坐倚(oá)來…”

　　第二工，小王子又佫來遘hit个所在。

　　“上好是照原hit个時陣來。”狐狸講，“比論講，汝若下晡時四點遘tè，安呢，ùi三點開始，我著會當提前感受著汝的幸福。时间愈倚近，感受 to̍h愈深。遘kah正點的時陣，我會激動kah坐攏bōe 稠。我著有法度瞭解講幸福是啥款的代價。不而過，設使汝來去無固定，安呢，我著無法度提前布置我的心情，嘛無法度提前享受hit種幸福的感覺…我看應當噯有一个固定的儀式。”

　　“仪式是啥貨？”小王子问伊。

　　“即mái攏互儂放bōe 記也。”狐狸講，“這大概是講，一个佮普通時仔無共款的日子或者無共款的點聲。比論講，hiah-ê獵儂in 著有家己的儀式——逐禮拜的拜四，in 攏噯摻庄仔頭的súi姑娘仔做伙跳舞。所以，對in 來講，拜四，著呣是一个普通的日子！所以，我嘛聽好(thèng-hó)去葡萄园仔散步。假使獵儂逐工跳舞，安呢我嘛無需要歇假嘍。”

　　自安呢，小王子教服了即隻狐狸。遘kah小王子佫beh離開的時：

　　狐狸真呣甘，伊講，“啊！我足傷心的，我想beh哭。”

　　“這著是汝的呣著(m̄-tio̍h)，”小王子講，“我本然著無想beh共汝增加任何的痛苦，呣佫是汝硬beh叫我替汝落性…”

　　“是啦，話是安呢講..無呣著啦。”狐狸應。

　　“看勢，汝是正實想beh哭的款！”小王子講遘。

　　“hoān-sè hoān-sè 。”

　　“若安呢，汝soah得bōe著啥货。”

　　“其實....自頭起先，我講起麥仔的色緻開始....論真講，我已經得著也。”狐狸说。

　　了後，狐狸佫講紲落去——

　　“咔等的，請汝佫翻頭去看hiah-ê玫瑰花，汝著會發現講，汝hit蕊花chiah是世間一粒一的花。等待汝佫轉來佮我相辭的時陣，我chiah佫送汝另一个秘密。”

　　自安呢，小王子佫來遘hit片玫瑰花園。

　　“恁攏無成(bô-sêng)我hit蕊玫瑰，恁根本無啥物通了不起！”小王子共in 講，“無儂來共恁成(chhiâⁿ)，恁嘛呣捌成(chhiâⁿ) 過恁何儂。恁攏佮我hit隻狐狸的過去相親像，只不過是千万隻狐狸當中，kài普通的一員。不而過，即mái伊已經有我即个的朋友，伊已經是即个世間上kài排祉 (pâi-chí)的狐狸嘍……”

　　滿園的玫瑰花攏chiâu變戇戇(gāng)。

　　“有影啦，恁攏真súi，呣佫，恁嘛攏真空冇(khang-phòaⁿ)”，小王子soah那講那興(hèng)，“無儂肯為恁付出性命。當然，普通儂hoān-sè 無了解，lia̍h准我hit蕊玫瑰花oân仔佮恁共款。不而過，論真講，伊雖然只是孤蕊，soah咔赢过恁一篷(chi̍t- phâng)，因為伊有我成(chhiâⁿ)，有我顧，有我替伊遮風(lia-hong)，有我共伊毒蟲(thāu-thâng)。伊會當共鬰悴(ut- chut)講互我聽，伊beh謗風(phòng-hong)的時，有我佇咧(tī--leh)；伊恬静(tiām-chēng)的時，嘛有我佇咧。因为伊是我的玫瑰。”

　　真緊，小王子又佫轉去狐狸hia。

　　“再见。”小王子共狐狸講再會。

　　“再见。”狐狸應講，“嗯，這著是我講的秘密。真簡單：只有真心去做chiah會當看分明。有噹時仔，属於內在的物件，kan-taⁿ 用雙目去看，是永遠也看bōe透。”

　　“內在的物件，雙目永遠也看bōe透。”小王子直透重復即句話，伊驚講會bōe 記得。

　　“He是因為汝用心看顧汝的玫瑰花，所以汝chiah會感覺伊的重要。”

　　“用心看顧汝的玫瑰…”小王子又佫重復唸幾若擺。

　　“世間儂已經bōe 記得chiah-ê道理，”狐狸講，“呣佫，汝無應該放互bōe 記。按即陣開始，汝噯對汝調教过、成養(chhiâⁿ-iúⁿ)過的一切負責遘底。汝噯對汝的玫瑰花負責任…”

　　“噯對我的玫瑰花負責任…”小王子一路行一路唸……

第22部

　　“汝好。”小王子伫半路的拄著一个kiāu鐵路的工儂。

　　“汝好。” hit-ê kiāu鐵路的工儂回禮。

　　“汝坫(tiàm)遮咧創啥貨？”小王子問伊。

　　“我咧安排旅客，一千个儂發一班車。”kiāu鐵路的工儂講，“我咧控制火車行駛的路線，比論講，有的噯互in 駛按正手爿；有的噯互in 駛按倒手爿。”

　　一目nih，頭前燈火光艷艷，一班速度誠緊的火車駛過。"khi̍h-khok, khi̍h-khok...", 聲說(siaⁿ-soeh)是大kah若咧彈雷，規座工棚搖kah誠厲害。

　　“看勢，kán-ná真無閒的款，”小王子问kiāu鐵路的工儂，“in 是咧走chhōe啥貨呣？”

　　“這連行車的儂家己嘛呣知影。”kiāu鐵路的工儂應伊。

　　 無liâm-mi-á，佫一班火車按相反的方向緊緊駛過來。

　　“是安怎佫駛倒轉來？”小王子咧問。

　　“He無共啦。”kiāu鐵路的工儂講，“He是兩班對開的火車啦。”

　　“In 是無合意原早徛起的所在呣？無...哪beh安呢搬來搬去？”

　　“從(chêng)古遘taⁿ ，世間的儂，透底攏bōe滿意in tòa 的所在。”kiāu铁路工儂 簡單回答伊。

　　即个時陣，第三班火車又佫khi̍h-khok…khi̍h-khok，真緊駛過。

　　“In 是咧jiok第一批旅客呣？”小王子佫問kiāu鐵路的工儂。

　　“In 無咧jiok啥。”kiāu铁路工儂講，“in 若呣是佇內底咧睏，無著是咧哈耳(hah-hī)。Kan-taⁿ hiah-ê 囡仔兄趴佇玻璃窗仔邊，咧看光景。”

　　“Kan-taⁿ囡仔知影家己beh ti̍h的是啥。”小王子講，“為著beh做一仙布尪仔，囡仔兄噯用去bōe少的時間，對in 來講，布尪仔是誠重要的物件，設使有儂共布尪搶去，in 會诚伤心，诚想beh會吼(háu)…”

　　“In 實在真好運。”kiāu铁路工儂安呢講。

第23部

　　“汝好。”小王子又佫拄著一个生理儂。

　　“汝好。”對方oân仔回禮。

　　即个生理儂專门咧賣一款會當止喙凋(chí-chhùi-ta)的藥丸仔。聽講只beh食一粒，會當擋成禮拜攏bōe感覺喙凋。

　　“汝哪beh賣即款物件？”小王子問伊。

　　“因為這會當幫助儂節約儕儕的時間。”生理儂應講，“根據專家的計算，一禮拜上少聽好(thèng-hó)節約五十三分鍾。”

　　“是講，節約即五十三分鍾又佫會當做啥？”

　　“隨在汝噯，憖(giàn)創啥著創啥。…”

　　小王子家己咧想：“我若會當加儂五十三分钟，安呢我寧好ta̍uh-ta̍uh仔來去四界chhōe水泉…”

第24部

　　拄好是我佇大沙漠頂出状况的第八工，小王子講起hit个生理儂的故事，hit个時陣，我扎的備用水嘛拄好啉了也(a)。

　　“啊！”我共(kā)小王子講，“汝的故事實在足讚的！不而過，我的飛機猶未修好勢。Taⁿ 我無水通啉也，假使我會當呣免煩惱、呣免驚無水通啉，愛beh啉著來去啉，安呢呣知偌好！”

　　聽小王子猶咧講：“我的朋友狐狸…”

　　“拜托的，汝嘛好心好心！遘taⁿ 猶咧講啥狐狸……”

　　“是安怎呣？”

　　“Soah呣知影taⁿ 是喙凋kah強beh無性命。”

　　伊無瞭解我咧講啥，伊照原共我應講：

　　“准講會死啦，呣佫，咱若想著講佇即个世間猶佫有朋友佇咧，安呢嘛是bōe bái！我定定感覺誠歡喜，因為我有一个狐狸朋友…”

　　“伊根底無咧顧目前的危險。”我家己咧想，“伊一貫呣知枵飽(iau-pá)、喙凋(chhùi-ta)。只beh有日頭光，伊著真满足…”

　　伊共我看看咧，bōe輸小可有瞭解，伊講：

　　“我嘛喙凋也…Ah無，咱同齊來去chhōe看有水井無…”

　　講真的，我開始感覺誠煩誠齪(chak)：beh佇即片看無邊看無界的大沙漠內chhōe水井，這哪有可能？雖然诚無望，不而過，嘛是開始去chhōe。

　　自安呢，兩个儂kho̍k-kho̍k行，kho̍k-kho̍k chhōe，chhōe幾若點鍾，一直遘kah日暗，看著天頂的星開始咧閃爍(sihⁿ)。可能是因為傷喙凋，我開始咧起發燒，攑頭看天星，感覺若像佇咧眠夢。頭殼內一直浮著小王子講過的話。

　　“汝會喙凋bōe？”我问伊。

　　他並無回答，只是對我講：

　　“水，對心靈嘛有好處…”

　　我無瞭解伊是啥意思，只是恬恬(kek-tiām-tiām)呣做聲…我知影無應該佫問。

　　伊嘛thiám也，順紲頓(tǹg)佇涂骹兜的。我坐tòa 伊的邊頭，停liâm-mi-á，聽伊講：

　　“天頂的星是hiah-ni̍h súi ，hia有一蕊儂看bōe著的花…”

　　我共應講：“有影”。事實我是頭chhih-chhih咧看涂骹。

　　“沙漠嘛真súi。”小王子講。

　　確實是安呢。我嘛一貫攏真合意沙漠。有時陣仔，徛佇沙漠頂，雖然啥物攏無看見，啥物攏無聽見，呣佫，總是感覺好親像有一種呣知名的物件不時咧發光、咧閃爍(siám-sihⁿ)…

　　“沙漠若beh佫咔súi，應該噯佇某一个角落，注一窟水井…”

　　聽伊安呢講，我家己嘛驚一下，若像雄雄有瞭解——是安怎沙漠内有一项呣知影的物件一直咧發光、一直咧閃爍。會記得我細漢的時陣，tòa 佇一間古厝，聽頂緣的序大儂講，古厝內底有囥一垛(tè)寶貝。不而過，從來無儂知影寶貝囥佇叨，hoān-sè 嘛呣捌有儂去chhiau過。呣佫，因為有即个“寶貝”的“存在”， soah互古厝變kah真神！這著是古厝永久的秘密…

　　我對小王子講：“是啦，呣管是厝仔、天星、抑是沙漠……使in 變得佫咔美麗的物件是看bōe著的！”

　　“誠好！汝佮我的狐狸，看法攏共款。”小王子對我講。

　　小王子睏去也，我将伊抱伫手弯，又佫繼續行。我誠激动，感覺bōe輸是咧抱一tè幼秀的寶貝。月光chhiō tòa 小王子白蒼蒼的面chiáⁿ；看伊目睭kheh-kheh睏kah誠四序、诚落眠；khiû-khiû佫長長的頭鬃被風吹振動......我心內咧想：我看有的只是外表niā，上要緊的物件，我看bōe著…”

　　看小王子喙仔小可開開，不時若咧微微仔笑。我雄雄有一款感覺：即个睏kah誠四序的小王子，上kài感動我的，是伊對迄蕊玫瑰花的忠誠；是玫瑰花佇伊內心閃爍的形影。即蕊玫瑰花，准講小王子睏去的時陣，嘛會親像hit-lō燈仔火的火舌共款，一直透咧閃爍，佇伊主儂的身軀頂閃爍…”。臨當時 (liâm-tong-sî)，我soah感覺小王子比晉前佫咔軟chiáⁿ，我感覺我應該噯好好仔看顧即葩“燈仔火”，呣好互風吹熄去…

　　自安呢，我抱著小王子一直行一直行。天拍殕光的時，阮chhōe著水井。

第25部

　　“Hiah-ê旅客，in 逐个硬死 kheh 上去快車顶，不而过in 拢呣知影家己的目标的是啥。in 總是安呢無閒chhih-chhih，踅來踅去踅玲瓏…”小王子講，“這是何必咧…”

　　阮chhōe著的hit窟水井，佮撒哈拉hit搭傳統的古井真無共款。撒哈拉hit搭的井仔，講咔歹聽的，根本著是當地儂伫沙漠内底凊采ó·的水窟仔niā。Iah阮chhōe著的hit窟井，拄好親像儂鄉社內底開的古井，诚深，诚gâu出泉。呣佫，因為tit-ê所在根本嘛無鄉社，所以拄 chhōe著古井的時，我佫lia̍h准是咧陷眠哩。

　　“哇！誠奇怪，”我kā小王子講：“佫攏chhoân kah 便便。汝看，這加辘(ka-lak)、這水桶、佫有索仔…”

　　小王子咧笑，伊嘛感覺誠奇怪。伊一手捎(sa)桶索仔，一手kò hit-ê加辘。加辘吼kah ki̍k-ki̍h-kiu̍h-kiu̍h，若像真久真久呣捌有儂來kò的款。

　　“汝kā聽，”小王子讲：“是咱kā古井仔叫精神的，汝看伊即陣開始咧叫歌…”

　　我驚伊thiám，叫伊換互我kò：

　　“換我啦。即款工課(khang-khòe)汝bōe勘得啦。”

　　我勻仔摇，勻仔kò，無liâm-mi-á著上(chhiūⁿ)一桶水起來也。水上起來了後，水桶順紲khè tòa 邊頭，耳空內若像猶佫有聽著加轆的叫聲。桶底的水，直透咧溢來溢去，水面已經有看著透早日頭的倒照影佇咧chùn--leh chùn--leh。

　　“我拄好想beh啉即款水。”小王子叫我著噯先舀一寡仔互伊啉。

　　遘kah hit个時陣，我chiah瞭解小王子beh ti̍h的是啥！

　　我chôan規桶chang 起來互伊啉。伊目睭放kheh-kheh，啉kah誠爽神、诚满足。這水呣是普通的飲料通比並(pí-pēng)，噯知影，he是阮透暝一路 chhōe, chhōe誠久chiah chhōe著的；是佇咧加轆叫歌聲中，通過家己雙手的得來的，可比是天公伯仔專工beh賜互艱苦儂一份安搭心靈的大禮。這引我想起細漢的時陣，聖誕樹閃爍的光線，暗暝時迷儂的音樂聲佮甜蜜的笑聲......這一切攏互我的聖誕禮物充滿著幸福的光彩。

　　“恁即搭，有儂tòa 一坵花園內底栽五千蕊的玫瑰花，”小王子講：“呣佫，in soah無法度伫即内底chhōe著in 家己想beh ti̍h的物件…”

　　“in 永遠著chhōe無。”我安呢kā小王子講。

　　“其實，in 聽好(thèng-hó) ùi一蕊玫瑰，甚至是一滴水內底得著in 想beh ti̍h的…”

　　“無呣著。”我表示同意。

　　小王子佫講：

　　“咱儂目睭看著的真有限，咱噯用“心”去看、去chhōe，chiah chhōe會著beh ti̍h的物件。”

　　水啉落去了後，感覺空氣是hiah-ni̍h 清爽，儂嘛加真爽神。透早時的日頭光chhiō佇沙漠頂，迄款(hit-khóan)色緻拄好親像黃黃、佫略仔(lio̍h-á)醪醪(lô-lô)的蜂蜜共款。我雄雄有一款幸福的感覺。是啦，咱何必著來痛苦咧…

　　小王子佫行倚(oá)來坐tòa 我的身邊，伊輕聲細說(khin-siaⁿ sè-soeh)共我講：“汝噯會記得汝講過的話，呣好講話呣算数哦。”

　　“講過啥？”

　　“汝講…汝beh共羊仔囝鬥一个喙笼(chhùi-láng)仔…安呢我才有法度對我的花負責任啊。”

　　我按lak袋底iam出圖稿。小王子看kah笑hai-hai：

　　“汝畫he猴面包仔樹，畫kah bōe輸若白菜…”

　　“哦？！”

　　我佫想講(siūⁿ-kóng / 以為)我畫了真讚、真了不起咧！

　　“猶佫hit隻狐狸…汝hit對耳仔kâng畫了siuⁿ 徛(khiā)啦… bōe輸若鹿仔角…亦(iah)嘛傷長！”

　　講了，伊soah伫hia咧笑bōe煞。

　　“猴囡仔！汝安呢傷無公平啦。儂我往過嘛chiah畫過hit號破腹kah無破腹的蛇niā!”

　　“是啦是啦！安呢著誠súi氣也。”小王講：“橫直hiah-ê囡仔兄若看有著好也。”

　　我chôan用铅笔紲手(sòa-chhiú)箍一个箍仔，表示羊喙籠。了後，tu互伊。即个时陣，我soah感覺心肝頭一陣的艱苦：

　　“汝有即款拍算，亦我soah完全攏呣知影…”

　　呣佫，伊並無回答我，只是對我講：

　　“汝敢知影，遘kah眠仔再，我來地球著滿一年也…”

　　停liâm-mi-á，伊佫講：

　　“拄來的時，我著是降落佇即搭(chit-tah)附近…”

　　伊講煞(soah)，面仔soah變kah紅記記。

　　呣知啥原因，我又佫感覺一陣的心酸。即个時陣，我想著一个問題。我問小王子：

　　“一礼拜前，咱拄见面的hit日早起，汝一个儂佇遮咧lo̍ah-lo̍ah趖，敢講，汝是咧beh chhōe往時降落的所在呣？！”

　　小王子的面仔又佫轉红起來。

　　看伊無應，我家己佫唸一句：

　　“Kiám-chhái 是leh記念一周年to̍h無？…”

　　小王子soah愈歹勢，面仔愈紅。伊一貫呣噯回答即款問題。亦呣佫，伊面仔紅代表我講了有對同(tùi-tâng)！敢呣是咧？

　　“喲！”我對伊講：“其實我是小可有咧煩惱這…”

　　伊soah抢我的話頭：

　　“汝即陣會使繼續做汝的工課(khang-khòe)嘍。汝噯趕緊轉去修理機器。我坫遮等汝，汝眠仔再暗chiah佫來…”

　　不而過，我soah放bōe落心。我想著狐狸講過的話：若是捌受儂調教，kiám-chhái 會想beh吼(háu)…

第26部

　　井邊仔有一排缺角的石仔牆。第二工暗時，我轉來的時，遠遠著看著小王子坐佇hit排石牆仔頂。有聽著伊咧講話：

　　“汝哪會記講汝bōe清楚？我敢保證呣是佇即个所在。”

　　看笵勢(pān-sè)是有儂佇咧的款。紲落去，佫聽小王子講：

　　“喺啦(hēⁿ--la)喺啦，日仔是無呣著啦，不而過確實呣是遮啦…”

　　我直直行倚(oá)去。猶原無看著啥物仔儂，嘛無聽著别儂的聲。呣佫小王子soah直透咧講：

　　“…He當然的。汝聽好(thèng-hó) ùi沙地頂的骹印瞭解以早我是ùi是叨位过來的……汝佇hia聽候(thèng-hāu)我著好--a，下昏暗我會去hia。”

　　我愈行愈近倚(kūn-oá), 遘kah離石牆仔差不多有二十米遠的時猶原無看著是啥儂。

　　小王子停liâm-mi-á，又佫講：

　　“汝he毒液敢有效？汝敢有法度保證時遘(sî--kàu)我bōe艱苦傷久？”

　　我愈聽愈僥疑，煩惱是呣是出啥物代誌也。我三步做两行，想beh咔紧知影到底是乜代(mih-tāi)。

　　“安呢汝會使去--a，我嘛beh落去--a！…”小王子咧講。

　　我順伊的視線看去，哎喲喂啊！牆仔骹一尾黃蛇仔瘟佇hia，蛇頭nâ懸懸，惡鑿鑿(ok-chha̍k-chha̍k)面對著小王子。即種黃蛇仔有夠毒，免半分鍾久著聽好(thèng-hó) ti̍h儂的性命。 我看一下chhoah chi̍t-tiô，褲頭的手銃趕緊拔(pu̍ih / pe̍h)出來，順紲佫衝倚(oá)去。毒蛇現聽著骹步聲，著若像落土的水共款，慢慢仔勼ùi入去沙空的内底。照講，蛇見儂著驚了後，一定會紧狂走beh 去覕。亦眼前即尾蛇，雖然oân仔有覕，呣佫，看伊咧趖嘛無呣是講偌青狂的款。只是看伊佇石頭縫内愈鑽愈深，聽會著一陣唦唦唦，若像銅鐵仔的聲音。

　　我行倚去共小王子攬起來。伊的面地白kah會驚死儂，親像若白紙。

　　“汝是咧創啥！連蛇汝也佮伊咧交陪！”我将伊hâ伫颔管的頷圍仔tháu--落來，先用水略仔(lio̍h-á)揾澹(tâm)，了後替伊chhoeh鬢邊，順紲佫舀(iúⁿ / ió)寡仔水互啉。看伊安呢，我本然想beh問伊的話只好佫再吞落。伊共我kho̍k-kho̍k相，雙手勾佇我頷kún仔。我感覺伊的心肝phi̍h- pho̍k-chháiⁿ，好親像是一隻中銃、強強beh khiau去的鳥仔。伊開喙對我講：

　　“我替汝歡喜，汝總算chhōe著汝beh ti̍h的機件。無偌久了後汝著會當轉厝嘍…”

　　“汝哪會知？”

　　我著是beh來kā伊講，飛機我已經修理好a，是我家己一个儂修理的...

　　伊無回答我。伊講：

　　“我嘛共款，今仔日我著beh轉去a…”

　　了後，伊變kah誠傷心：

　　“我beh轉厝的路，加真遠…加真thiám…”

　　我心內真清楚紲落來beh發生的代誌呣是kài普通。我kā伊攬tiâu-tiâu，親像咧攬幼囝(iù-kiáⁿ)安呢攬tiâu-tiâu。呣佫，我 soah感覺伊直直beh沈落去，ùi無底深坑直直沈落去，佫那沈那深，我想beh伸手kā伊揪(giú)，soah任揪也揪bōe著…

　　伊目睭攏無轉仁，看著遠遠仔的所在，看kah神神。

　　“我有汝畫beh互我的羊仔、箱仔，猶佫羊喙籠仔…”

　　伊kán-ná咧微微笑，笑kah真悲。

　　真久真久，伊的身軀chiah慢慢仔燒lō起來。

　　“夭壽哦，汝穩當是著青驚也(a)…”

　　講伊青驚，確實有影。呣佫，伊猶原真镇静对我讲：

　　“E暗（eng-àm)，我會佫咔驚…”

　　我soah愈感覺hit層(chân) teh-beh發生的代誌一旦發生是永遠無法度挽回。想著安呢，我的心頭攏焦冷。即个時陣我chiah知影講：我離bōe開小王子的笑聲；我無法度放伊去。伊的笑聲對我來講，著若像沙漠內的水泉。

　　“安細兮(án-sè--ê)，我的好兄弟，來啦，佫笑一下啦，汝敢知影，我真想beh佫聽汝的笑聲…”

　　不而過，伊soah對我講：

　　“遘E-hng半暝，著整整一年嘍。我hit粒星嘛拄好踅(se̍h)遘原底hit个所在，伊的正對中，嘛是舊年我頭一擺踏著地球的所在…”

　　“安細兮，汝是呣是感覺讲汝所經过的代誌，比論“蛇的故事啦、約會的代誌啦、天頂的星啦……”，這一切攏親像是咧陷眠？”

　　伊照原無回答我的問題。伊只是对我講：

　　“真正要緊的代誌，是互汝看bōe著的…”

　　“He當然…”

　　“可比講有一蕊花，汝真愛，不而过伊生长佇另外一粒星球頂。遘kah暗暝時，汝若攑頭看天，汝著會感覺誠歡喜、誠快活，bōe輸所有的星，頂懸攏有花，攏咧開花。”

　　“He當然…”

　　“嘛可比是水。因為有加轆，有索仔，汝咧kò水的時，著若像咧奏樂…汝佫會記得bōe？…這水實在誠甜、誠好啉…”

　　“He當然…”

　　“暗時仔，汝攑頭看天，hoān-sè 看無我hit粒星，因為伊傷細，我嘛無法度指互汝看。是講，安呢嘛好，只beh汝認為講hiah-ê密密啁啁的天星當中有伊的存在，安呢著好a。hiah-ni̍h 儕的星，汝會那來那合意in ...in 攏是汝的朋友。噢, tio̍h--a，我佫beh送汝一項禮物…”

　　伊佫開始咧笑。

　　“啊！安細的，誠好诚好，我著是合意聽汝即款笑聲咯！”

　　“這著是我beh互汝的禮物，…佮hit窟古井水共款。”

　　“汝是講？”

　　“每一个儂對天星的看法攏無共款。對旅行者來講，星是in 的chhōa路客；對普通儂來講，星只不過是一種艷艷爍(iām-iām-sihⁿ)的物件；對學者來講，星是in beh研究的學問；亦若對我進前拄著的hit个大生理儂來講，星著是財寶。不而過，所有的星攏bōe曉講話。若汝咧，汝心中hiah- ê星，佮任何儂的星攏無共款…”

　　“汝意思是？”

　　“暗時，汝若攑頭看天，汝著噯會記咧我tòa 佇其中的一粒星，汝若想著我咧笑，he著表示講所有的星嘛攏咧笑，安呢汝看著的星，著攏總是會笑的星！”

　　講煞，伊佫開始咧笑。

　　“安呢，在汝感覺安慰了後(做儂，有時總是會自我安慰)，汝著會因為熟似我即个朋友感觉歡喜。汝是我永遠的朋友，汝若想起我咧笑的情形，汝稳当會來笑鬥陣。有時仔，汝為著beh互家己會當快樂soah來拍開窗仔門。朋友看汝不管時眈頭(taⁿ-thâu)看天kho̍k-kho̍k笑，in 著會感覺真奇怪。Ah汝若共in 講，見擺看天星汝著想beh笑，安呢，儂穩當會共汝當痟兮。汝噯知影，這攏是我咧kā汝創治，互汝teh漏氣…”

　　小王子咧笑，一直咧笑。

　　“歹勢啦，是我無才調kā天星扒落來送互汝，才會互汝一大堆會笑、佫會叫的“玲瓏仔”(lîn-long-á)佮“銀鏹仔”(gîn-giāng-á)…”

　　小王子那讲那笑。尾仔，伊雄雄變kah真嚴肅：

　　“E-hng，汝應該有了解…汝呣免佫來也。”

　　“我呣走，我beh tiàm遮陪伴汝。”

　　“我穩當會誠艱苦…艰苦kah若像強beh khiau去的款。著是安呢，汝呣免來，無必要。”

　　“我呣走。”

　　伊開始咧煩惱。

　　“我kā汝講kah chiah儕…攏是因為蛇的干係。汝呣好去互蛇咬著…蛇實在真惡質，咬儂拢無分好歹…”

　　“我呣離開汝。”

　　伊kán-ná小可有咔放心，伊講：

　　“險bōe記得，蛇若咬第二下，已經無毒a…”

　　Hit日暗暝，伊無kā我講伊tī時beh行。伊無講無呾(tàⁿ)，做伊踉蹽。我强beh jiok(追)著伊的時陣，伊猶佫咧拼命走。伊只是對我講：

　　“啊，汝哪會佇遮…”

　　伊來牽著我的手。我感覺伊是hiah-ni̍h 仔苦惱。

　　“汝呣好安呢啦。無汝會真艱苦。汝著kā我當做死去著好a，雖然這呣是真的…”

　　我恬恬講bōe出聲。

　　“路真遠，這汝知影。呣佫，我bōe當拖著即个身命離開，安呢傷過頭重。”

　　我已經應bōe出喙。

　　“是講，這只不過是親像儂咧扒樹皮，kā 粗的树皮扒捒(pak-sak)，普通kah bōe當佫普通，實在無啥通悲傷的。”

　　我照原無做聲。

　　伊略仔(lio̍h-á)僐僐、無意無意。不過，真緊又佫振作起來。伊講：

　　“He穩當誠趣味，汝應該瞭解。我嘛會佫去看天頂的星。所有的星，攏是一窟一窟有配加轆的古井；所有的星攏會thîn水互我啉…”

　　我已經無法度講話。

　　“這有影kài好sńg！汝想看māi，汝有五億粒玲瓏仔，亦我有五億窟井仔…”

　　講煞，伊oân仔停誠久無出聲。伊咧吼(háu)。

　　“遘遮著好a，互我家己一个儂走，好無？”

　　講是安呢講，伊soah坐落去，伊嘛咧驚。呣過伊猶原是hiah-ni̍h 屈強：

　　“汝知影…我hit蕊花…我噯對伊負責！莫講(bo̍h-kóng)伊猶佫hiah-ni̍h 軟chiáⁿ，hiah-ni̍h 懵懂！伊身邊只有四支軟弱(nńg-jio̍h)的刺仔，想beh靠這來對抗敵人、保護家己…”

　　我徛kah 擋bōe-tiâu，只好坐落去。伊佫講：

　　“好也，著是安呢也…Beh交代的攏交代了也…”

　　伊小可考慮liâm-mi-á，了後，雄雄徛起來。我看著伊雙骹伐出去，亦我家己soah無法度振動。

　　佇伊骹盤的邊頭，我看著一sut黃色的光，緊緊爍(sihⁿ)一下。雄雄，伊soah變定定，bōe振bōe動。伊無哀，也無吼(háu)，親像一叢樹仔栽慢慢仔車倒佇塗骹底，呣知是呣是沙地自本有咔軟勢，伊倒落去的時soah無聲無說(bô-siaⁿ bô-seh)。

第27部

　　遘即陣，無呣著，已經六年a…亦我嘛攏呣捌講起即个故事。同事朋友看著我平安倒轉來，攏替我咧歡喜。亦呣佫我soah真傷心、真郁悴。我kā in 解說(kái-soeh)講：“是儂傷過疲勞ià僐…”

　　一直遘kah現此時，chiah真正有咔平靜淡薄，不而過，嘛呣是完全平靜落來。我知影伊(小王子)穩當轉去遘tè--a，因為hit日透早，天拍殕光的時，我著無看見伊的儂a…此去，便若遘kah暗時，我會定定一个儂來咧欣賞天頂hiah-ê星，著若像是咧欣賞五億粒玲瓏仔咧叫歌…

　　不而過，即陣我soah佫咧煩惱一層(chân)要緊的代誌——當初時畫羊喙籠仔的時，我bōe記畫縛帶！小王子穩當無法度kā羊仔鬥喙籠仔。我煩惱呣知會發生什麼意外bōe ? Hit蕊花呣知有去互羊仔孝孤(hàu-ko·)去無？…”

　　有時仔我佫想倒轉來，“bōe啦！小王子逐工攏嘛摕(the̍h)花罩(hoe-tà)kā 花 khàm-tiâu 咧，佫咔講，伊嘛會kā hit隻羊仔顧死死…”若安呢想，我著會咔安慰。我會感覺天頂的星攏咧微微仔笑。

　　呣佫越頭(oa̍t-thâu)若佫想著講，儂無可能一世儂攏無出差錯，准若講有一工小王子伊bōe記khàm玻璃罩，抑是講半暝羊仔偷soan出來，安呢呣to̍h…”，想著這，我又佫開始操煩，hiah-ê小玲瓏仔嘛soah攏化做一滴一滴的目屎！

　　這真正是一个誠神奇的秘決。對恁chiah-ê合意小王子的儂來講，比論我嘛共款，無論佇啥物所在，假使hia有一隻羊仔，雖莽咱攏呣知是啥物羊仔，亦伊食去一蕊玫瑰花，抑是講伊無，結果對整个(chéng-kô)宇宙來講是完全無共款的。

　　恁各儂攑頭看天，斟酌想看māi咧：羊仔到底有食花抑無？安呢恁著會發覺一切攏變kah無相共…

　　任何一个大儂，永遠攏想無這是一个真正重要的問題！

　　對我來講，he是世間上讚，嘛是上悲的所在。這佮頭前畫的是共一个所在。我beh佫kā畫一遍，通互恁看咔分明。著是佇即个所在，小王子來遘地球，尾仔，嘛是按即个所在消失去。請恁逐个斟酌看詳細、記清楚，日後恁若去非洲大沙漠chhit-thô，恁著會當認出即个所在。假使恁有機會行過即个所在，我拜托恁呣好行傷緊，噯小停liâm-mi ，無呣著，佇hit粒星的下骹小停liâm-mi ！准講恁有看著一个囝仔儂行倚來，伊頭毛金金，笑面笑面，亦汝問伊問題伊無回答，安呢恁著噯想著講he是啥物儂。准講精實有即款代誌，拜托恁呣通互我佫再悲傷，噯趕緊寫批來報，互我知影伊佫倒轉來嘍，亦我嘛會誠歡喜…

　　「全文完」

　　[煞尾話]

講起《小王子》原作者

　　聖·德克旭貝里（antoin edesaiot-exupery），西元1900年出世佇法國里昂，1921-1923年佇法國空軍做兵，代先做過後備飛行員，後來成做民用航空駕駛員，參加過开辟法國——非洲——南美國際航線的工作，hit時伊嘛做一寡文學寫作，代表作品有《南線班機》（1930），《夜航》（1931）等等。

　　1939年德国納綷法西斯侵犯法國，聖·德克旭貝里幾若擺攏著中傷，醫生呣准伊佫隨軍作戰；不而過伊堅決佫倒轉去前線，最後安排佇2/33 空軍偵大隊。1940年法國輸真thiám，亦伊所在的部隊嘛受到真大的傷亡。部隊奉命調往阿爾及爾了後，真緊伊又佫復員，並且流亡佇美國。Tiàm美國期間，伊繼續來咧寫作。1940年發表《戰鬥飛行員》，1943年發表《寫互一个人質的批信》佮《小王子》。

　　1943年，伊堅持倒轉遘法國設佇北非的抗戰基地阿爾及爾。頂司慮著伊的身體佮年歲，kan-na允許伊會使執行五擺的飛行任務，呣佫伊soah堅持遘第八擺。1944年7月31號頂晡，伊出機執行第八擺任務了後，著永遠無佫轉來。過身的時，kan-na四十四歲。

『ps.原翻譯者(已經無法度確定是叨一種語言版本的譯者)佇1993年出版的一份參考消息有看著安呢的一條簡訊，講佇歐洲某一个河譚仔，發現著聖·德克旭貝里的飛機殘骸。Hit擺的調查考察是經過對聖·德克旭貝里最後一擺出航的路線，以及 tng當時德國兵仔的空軍記錄進行研究了後chiah進行的，經過比認，確定著是hit頂失蹤規半世紀久的飛行偵察機。為著beh紀念即位偉大的戰士佮文學家，當地政府決定起一座博物館來收藏即頂偵察機的殘骸，並且用 “聖·德克旭貝里”來kā博物館號名，siâng時又佫收藏著伊在生時的作品佮一寡遺物。』