鹭水芗南-闽南语部落

《厦门日报》（2005-07-04）啲消息——

根據中新社啲报道，由台盟福建省委、福建省政府台辦、漳州市政協協助中國出版科學研究所卟來編寫啲《闽南话漳州腔词典》（下底簡稱"《词典》"），目前已經被列入2005年度中國國家出版總署啲一項重點科研課題。現子時，《词典》已經開始編寫，按算卟佇2006年啲年底，由國家出版社正式來出版。

《閩南話漳州腔詞典》啲主要編寫人、廈門大學啲周長楫教授介紹講，閩南語是古代中原語言啲“活化石”。目前，整個閩南語系（筆者添注：包括漳泉語、潮州話、浙南閩語、閩西龍巖話、海南話等等）啲總人口超過八千萬儂，其中包括中國大陸、香港、澳門佮台灣在内，拢總有五千外萬儂；這以外，佇東南亞佮其它番邦所在，嘛佔三千外萬儂。

根據資料啲記載，現子時台灣啲漢族，量其約有三分之二啲儂，祖家佇閩南，其中漳州府啲著佔了一半咔加（筆者添注：偆另外一半算泉州府啲）。周长楫教授長期咧調查佮研究台灣閩南語，伊講，即陣台灣咧講啲閩南語，大多數啲語詞，根頭是漳州腔。

另外，根據瞭解，目前組織方已經聘請著一寡長期來咧研究漳州話啲學者，請怹做伙來編寫即本《词典》，預計全册總字數大概會當逹遘二百五十萬字。這以外，全册佫卟采用現代啲音像技術，制作录音材料通好來配套出版。录音啲取材，主要分做两大類，頭一款是中華古經古典啲吟誦，比論講有《詩經》、《離騷》、《唐詩三百首》等等；佫另一款是收录一寡漳州在地啲唸唱藝術，比論講"歌仔"（華語：錦歌）啦、“tak喙鼓”啦，等等chiah-ê咔有鄉土味啲唸唱。收录即寡音像資料，目的是卟添補一寡用文字咔歹表達、咔歹記录啲部分。時遘，一寡原本分散佇民間、吤toaⁿ-tiah、吤雅氣，呣佫已經強強卟失傳去啲在地語詞語音，攏會收录踮《詞典》内底。會使講，這本身嘛是一種挽救佮保护。

即本《漳州腔詞典》編寫了後，只卟佫完成“泉州腔”佮“潮汕腔”即两部分，著 thèng好 合做(kap-chòe) 一抱《闽南语大词典》。