鹭水芗南-闽南语部落

頂幾日，講起「POJ / TLPA khioh-hô」啲代誌，探聽著一寡消息，已經攏有登出來互儂看啊（猶無瞭解啲，請看）。不而過，照看這應該只是一个初稿nā-niā。今仔日，又佫佇kāng一个「放送頭」，聽著佫咔詳細、佫咔具體啲結論。猶原是報互逐家進一步來瞭解，原文如下——

台灣羅馬拼音方案 (教羅, TLPA, TLPA改良式的整合式)

1. 原以ch, chh 或 c, ch 標記之塞擦音/ts/、/tsh/ 分別改以 ts、tsh符號代替。
2. 鼻音主要用superscript " ⁿ " ，①若無相關軟體支援之下用變通版 “nn”。舉例： " aⁿ " kap " ann " 並存選用。
3. 中後元音 (mid back vowel) /ɔ/主要用" o· "標記，若無相關軟體支援之下用變通版 "oo"。
4. 傳統白話字oa、oe、eng、ek分別改用ua、ue、ing、ik 。
5. 增加地方腔的標記ir、er、irn、eng、ek、ee、ere、irm、irng ②。
6. 聲調標記一律標本調、外來詞不標調。
7. 聲調調符以「白話字傳統調符」為主, 若無相關軟體支援之下用變通使用「TLPA數字表示方式」(Alternative)。
8. 輕聲調符維持使用"--"③，數字表示法用" 0 "。
9. 「高升調」，像講紅紅紅的第1個紅，訂做第9聲④。調符的部分無另外koh設計。
10. 保留鹿港等海口腔的陽上調為第6調⑤標示法。

P.S.

頂面啲「10點共識」，照看是已經定案啲款。當中有寡「專用名詞」，可能有儂無啥清楚，站長我加婆，小可解說(kái-soeh)一下。

① " ⁿ "，表示「鼻化韻」，國際音標一般是采用"~"來表示。比論 aⁿ, eⁿ, iⁿ, iuⁿ...國際音標分別寫做： /ã/ , /ẽ/ , / ĩ / , / iũ /...
②「增加地方腔標記」，即內底所講啲「地方腔口」，意思是講一寡所在啲腔口當中，存在「hām『優勢腔』有所分別」啲漳音、泉音。具體是：

• ir，泉州音，國際音標/ɯ/ （有啲台灣學者認為講是 / ɨ / ，以下同理）, 例字「魚、豬、鼠、書、虛」。對應廈門音啲 /u/ （個別是/ i / ），漳州音啲 / i / 。


• er，泉州音，國際音標/ə/ （實際上應該是/ɣ/，總是，暫時先記做/ə/，以下同理）, 例字「過、火、歲、螺」。對應廈門音啲 /e/ ，漳州音啲 /ue/ （個別是/e/ ）。


• irn，泉州音，國際音標/ɯn/, 例字「斤、勤、均、勳」。對應廈門音啲 un （國際音標/un/ ），漳州音啲 in （國際音標/in/ ） 。


• eng, 平和音（屬漳州轄區內啲一个縣），國際音標/eŋ/ （ 或者/ɛŋ/ ），例字「成、經、清、靈、形」。對應廈門音啲 ing （國際音標 /iŋ/ ）。


• ek, 平和音（屬漳州轄區內啲一个縣），國際音標/ek/ （ 或者/ɛk/ ），例字「益、竹、激、迫」。對應廈門音啲 ik （國際音標 /ik/ ）。


• ee, 漳州音，國際音標/ɛ/ ，例字「啞、家、馬、紗、蝦、茶、牙、罵」。對應廈門音啲 e （國際音標/e/ ） 。


• ere，泉州音，國際音標/əe/, 例字「雞、挨、街」。對應廈門音啲 ue （國際音標/ue/ ），漳州音啲 e （國際音標/e/ ）。


• irm，泉州音，國際音標/əm/, 例字「蔘、森」。對應廈門音啲 im （國際音標/im/ ），漳州音啲 om （國際音標/ɔm / ）。


• irng，泉州音，國際音標/əŋ/, 例字「生、登、爭、稱、更、蒸、烹」。對應廈門音、漳州音啲 ing （國際音標 /iŋ/ ） 。

③雙短横（“--”），用來標記輕聲。比論講： góa--ê （我啲）；Tiuⁿ--sian-siⁿ（張先生）。
④「高升調」，是一種特殊變調，用第9聲標記，請參考《閩南語啲第9聲》。
⑤「海口腔」著是「泉州腔」。泉州腔佮漳州腔、廈門腔、同安腔，佇聲調啲「調類」即方面，有一个真大啲無共款，著是講，泉州腔 佇咧讀變調啲時，會當明顯感受著第6聲「陽上」調啲存在。Ah若是漳州、廈門、同安即个所在，第6聲已經完全退化，濫濫佇第7聲「陽去」調內底。