鹭水芗南-闽南语部落

（看全文，線頂聽錄音~）

咱漳泉儂稱呼家己的父親，當面是叫「阿pā」，跤脊後 是叫「老pē」，即个「pā」佮「pē」，一个是讀冊音，一个是白話音。「pē」字，漳、泉兩个所在，讀音又佫無共款，漳州讀/pɛ/，泉州chiah是讀/pe/。/ɛ/是漳州腔chiah有，泉州、廈門、同安、臺灣攏無即个母音；原底佇漳州讀做/ɛ/的音，佇 長泰、海滄（廈門管轄的一个行政區）、臺灣（無包括偏泉腔） 攏總 變成/e/。

漳州腔分別/ɛ/、/e/，這為咱稽考本字提供真大的利便。佇咧漳州腔裡底，韻母獨獨有帶一个/ɛ/的字，透底是對應著中古音的「假攝麻韻」。可比講：家、紗、馬、罵、茶、假、蝦、查、帕、炸、嫁、罷。為著行文利便，下底nā牽連著漳州腔的/ɛ/，咱攏卜用POJ的"e“來表示。

閩南語的「阿pā」／「老pē」，有的儂直直想講伊的本字（漢字）著是「爸」或者「父」，其實即兩字攏呣是。當然，咱普通時，儕儕儂攏咔愛用「爸」，即裡中是有原因的。「爸」是訓讀字，已經佇民間用幾落世紀啊，逐家攏慣勢啊；佫再講，普通話拄好也是叫做「爸爸」。不而過，事實上，「爸」即个漢字，有可能是近代chiah出現的。《國語辭典》寫講：「對老者的尊稱。明˙張自烈˙正字通˙父部：夷語稱老者曰八八或巴巴，後人因加父作爸字。」

頂幾日，湊拄坎 去看著下底即段文字：

囝生閩方，閩吏得之，乃絕其陽。為臧為獲，致金滿屋。
為髡為鉗，如視草木。天道無知，我罹其毒。神道無知。
彼受其福。郎罷別囝，吾悔生汝。及汝既生，人勸不舉。
不從人言，果獲是苦，囝別郎罷，心摧血下。隔地絕天，
乃至黃泉，不得在郎罷前。

這是《全唐詩》裡底記載的【上古之什補亡訓傳十三章·囝一章】。當中有寫著「郎罷別囝」、「囝別郎罷」、「不得在郎罷前」。「囝」，著是即陣閩南語咧講的「kiáⁿ」；「郎罷」的意思是「老pē」（父親）。當今，佇福州話裡底，嘛猶佫稱呼「老pē」做「郎罷」。

宋代詩人陸游《戲遣老懷詩》：阿囝略如郎罷老，孫能伴太翁嬉。（囝：後生；郎罷：老pē；太翁：阿公）
宋代詩人黃庭堅的詩句：但得新年勝故年，即如長在郎罷前。

「罷」字，有中古音：並母麻韻假攝開口二等上聲，部下切。即句話是安呢來解說的：「罷」字，佇中古的時陣，有一个讀音是——聲母「並」，韻母「麻」，聲調「陽上」，是屬於「開口二等字」；對應現子時閩南語的讀音是：pā（讀冊音）／pē（白話音）。即个讀音，拄好佮漳泉儂咧講的「阿pā」／「老pē」有對同。

ps. 按頂面稽考來看，「罷」chiah是閩南語的「pā（文）／pē（白）」。不而過，即个字，實在傷「老」，現代儂尤其會感覺生份。Nā真正卜將「老pē」寫做「老罷」，hoān-sè有真大的阻礙。

咱逐家攏知影，廣東話有發展出一套統一的白話文書寫系統，所用著的漢字，有儕儕攏呣是「本字」（像講：呢度、邊度、喺、嚟、嗰……）。香港儂將即款「無一定是『本字』的四角字」，號做「正字」。佇咧民間，逐个攏遵守一條不成文的約束：寫正字，呣寫本字。本字，甚物時陣用會著？學術研究。

閩南語無廣東話hit 款的條件，無發展出一套統一的漢字書寫系統。不而過，設使日後條件nā成熟，必然嘛會拄著共款的問題，必然噯有「本字」佮「正字」分開的概念。

(Beh聽聲，佇下底　↓)