2006年03月25日

諸姥囝卜chhōe劉德華,無所費,老父卜賣腎

劉德華先生,親愛的「華仔」:

  汝好!勞煩汝撥工一下,冗早(liōng-chá)佮 阮 諸姥囝(cha-bó·-iáⁿ)——林鵑見一下仔面,好無,拜託汝救伊啦!伊對汝siat-thái 合意,汝是伊的追求,因為安呢,伊已經付出了青春的代價。伊對汝癡心、對汝的堅持,已經有12年啊。伊自1994年遘taⁿ,每天攏會夢著汝,每天攏徛佇尪仔圖面頭前,tiām-tiām-á看著汝, 佮汝開講。阮諸姥囝 伊上kài ǹg望的,是即世儂會當佮汝見一面,對伊來講,汝可比是伊的性命。

  阮即个囡仔 伊一直透相信講 佮汝一定有緣見面。呣nā安呢niâ,伊佫講汝一定會知影伊的心情(sim-chiâⁿ),一定會佮伊見面。假使nā見bōe著汝,伊甘願無愛佫活落去,阮做儂父母的,心teh痛thiàⁿ,像針teh畫(ūi)……kan-na汝會當救伊一命!

  阮即个囝仔 按1994年遘taⁿ,夢著真儕真儕佮汝有tī-tāi的,想bē遘 chiah-ê 夢,有真儕soah真正出現佇汝的歌詞裡底。伊m̄-nā kā汝唱的歌全部攏學起來,佫會曉仿汝簽名的筆蹟。伊講,汝的儂,汝的影,時時刻刻攏佇伊的目睭前,佇伊的心肝裡;除了汝以外,伊已經感受bē著父母的愛佮其它好的物件。

  為卜見汝,香港伊去過兩chōa,嘛有去北京,不而過攏無看著汝。為著即層代誌,阮是開kah徹徹(theh-theh),厝裡強卜吊鼎;阮諸姥囝伊家己嘛打擊真大,規个儂 險險 接載bē-tiâu(chih-chàn bē-tiâu)。伊嘛有按拜託文化部佮中央電視臺kā汝寄去伊的批信,是講 遘taⁿ soah攏無收著汝的回音。

  拜託汝佮伊見一下仔面,見一下啦,拜託的!Ah 無,伊真正 接載bē-tiâu啊,好心好心kā救一下啦!

  林鵑in父母 哭chhoeh 敬上

  2006年3月23號

    即張,寫批的儂是「甘肃兰州市一名28岁」,名叫「林鵑」的女子in父母;卜寄互「劉德華」收。即幾日仔,一四界攏咧報即條消息,汝 想卜tìⁿ 呣知, oân-á 真oh。世間之大,無奇不有啦,啥物款的代誌著會發生,儂講「有山著有水」(後壁本然iáu一句「有儂著有鬼」,總是,即句無合,kā 摕掉),真正是安呢。Nā即款代誌,汝講是卜互儂「感動」、卜互儂「可憐」,抑是卜互儂「phì相」?這hoān-sè 各儂各儂 看法無共啦。好啦,別儂是安怎看待,he kiám-chhái攏無牽礙(khan-gāi),但是,有一个儂,汝一定噯聽看māi伊咧講啥。即个儂,講起來,oân-á算半个 事主儂。伊著是劉德華先生。(下面是媒體消息)

報導講,劉德華知影了後,通過伊的中儂(经纪人)批評講這是「不正確、不正常、不健康、不孝」,伊絕對bē去插(chhap)林鵑的要求,並且 呼籲 林鵑 趕緊來停止即款懵懂的行為,呣通佫舞落去啊。

  「中央社」報導講,劉德華交代伊的中儂,向香港報社表示講,伊本儂並無收著林鵑in老父寫的批,臨當時(liâm-tong-sî)嘛無法度證實代誌到底是真是假。

不而過,劉德華有講,假使伊的歌迷nā用hit-lō無正確、無正常、無健康的撇步想卜hām伊見面,伊絕對bē chhap。

  劉德華並且強調講,伊「上 討ià」不孝的歌迷,歌迷的家長嘛無應該théng-sēng序細做出不當或者過分的行為;伊呼籲林鵑趕緊收煞,其他的歌迷嘛呣通有樣看樣。

  劉德華的中儂強調講,大陸(中國)的歌迷,只卜 有 加入 歌迷會 來講,逐年攏有三擺機會hām劉德華見面,歌迷呣好做戇代誌,嘛 呣通 烏白 浪了錢。

  另外,根據報導,蘭州市的醫生儂 oân-á 有kā 林老先生講,個人買賣人體器官是犯法的。老大儂 局不局 ài 放棄 出賣 腰子 的 想法。因為 所費 khêng bē遘,林鵑 看破 to̍h 取消 去香港 的 計劃。


同じカテゴリー(笑稽譀古)の記事
用刀等刣汝
用刀等刣汝(2006-01-16 22:11)

尪仔某代
尪仔某代(2006-01-03 22:55)

便所文學
便所文學(2005-09-20 23:50)

蘋果 & kha-chhng...
蘋果 & kha-chhng...(2005-09-20 23:49)

討契兄
討契兄(2005-09-20 23:48)


Posted by limkianhui at 21:38│Comments(0)笑稽譀古
この記事へのトラックバック
劉德華先生,親愛的「華仔」:

  汝好!勞煩汝撥工一下,冗早(liōng-chá)佮 阮 諸姥囝(cha-bó·-iáⁿ)——林鵑見一下仔面,好無,拜託汝救伊啦!伊對汝十
為著諸姥囝卜去chhōe劉德華,無所費,老父卜賣腎【鹭水芗南-闽南语部落】at 2006年03月25日 21:42
※会員のみコメントを受け付けております、ログインが必要です。
 
<ご注意>
書き込まれた内容は公開され、ブログの持ち主だけが削除できます。