闽南语的“喙choâⁿ”本字是「喙涎」

講著「chhùi-nōa」，儕儕儂攏知影用漢字寫做「喙瀾」。以早，捌有儂teh堯疑「瀾」呣是"nōa" 的「本字」，不而過，堯疑bóng堯疑，soah直直無法度摕出（the̍h-chhut）互儂完全信服的理由，所以，照原是寫做「喙瀾」的 咔占贏面。

“Chhùi-nōa” 逐个攏知影，呣佫，" nōa-choâⁿ "、"chhùi-choâⁿ "，hoān-sè 儕儕的儂攏無啥瞭解。

" Nōa-choâⁿ "，意思是「喙瀾」。臺灣《台文／華文線頂辭典》寫做：

台語羅馬字漢羅華文英文1nōa-chôaⁿ瀾泉唾液腺2nōa-chôaⁿ瀾殘唾液

關係即个" choâⁿ "字，伊的本字，到底是啥咧？咱會當tùi現時的一寡辭典佮資料去chhiau-chhōe佮稽考（khe-khó）。Tùi頂面即个表格，咱看著兩種寫法，一種寫做「泉」，佫一種寫做「殘」。即本《台／華線頂辭典》上主要的功能是：第一，查讀音；第二，翻譯／解說（kái-soeh）。所以，對著閩南語的用字、本字校對來講，攏呣是真嚴格，不而過，猶原有一定的參考價值佇咧。就事論事啦，咱發現講，無論是「泉」、抑是「殘」，白話音攏會當讀做" choâⁿ "，所以，噯佫比較in的涵義，看叨一字咔有合（ha̍h），抑是講兩字攏無合（只不過是借音niā-niā）。

頭拄仔，咱佫有講著" chhùi-choâⁿ "即个詞。佮頂面的" nōa-choâⁿ "一下排比，平平攏有帶" choâⁿ "。Ah 即个" chhùi-choâⁿ "是啥物意思咧？台灣林俊育先生新編的線頂《摘譯台日大辭典》，寫做「嘴（喙）殘」，解說講：

食chhun落來ê物件，人（儂）食過，留嘴（喙）瀾ê物件。［舉例］食人（儂）ê 嘴殘。

可見，即本《臺日辭典》的理解是「食chhun--ê，有bak喙瀾的物件」，重點詞是「物件」，呣是「喙瀾」。真明顯，伊是按「殘」字去理解的，理解做「殘留下來的東西」（華語）。

《廈門方言詞典》（作者：周長楫，廈門大學教授），共款是注明「喙殘」，不而過，伊的解說，佮《摘譯台日大辭典》無共款。《廈門方言詞典》解說講：

吃东西后残留在碗筷或食物上的涎沫。（華語）

所以，伊是理解成「喙瀾」，無強調講是「物件」。也著是講，《廈方典》事實是將「choâⁿ」當做是「喙瀾」，認為本字是「殘」。即點，拄好佮《台/華線頂辭典》的「瀾殘」對會得起來。所以，咱基本會當確定「喙殘」、「殘」，本意著是「喙瀾」。是講，哪會《摘譯台日大辭典》soah講「喙殘」是「食chhun--ê，（有bak喙瀾）的物件」咧？即个問題，真容易來拆解。咱來看《摘譯台日大辭典》的舉例：食人（儂）ê 嘴（喙）殘。即句話，普通時咱定定有咧講，嘛會使講「食儂的喙瀾」、「食儂的喙尾仔」。所以，理解成「食『儂食chhun--ê 的』物件」完全會通，只不過是算是一種詞性本義的延伸。也著是講，「喙殘」佇chia會當表示「儂食chhun ê物件」，呣佫，伊的本義是「喙瀾」。

講規晡，不管是「瀾choâⁿ」、「喙choâⁿ」，到底即个「choâⁿ」 的本字，是呣是 hiah-ê 辭典所講的「殘」咧？敢有叨一本古冊，寫講「殘」會當表示「喙瀾」（或者「hām喙瀾意思相倚近的」嘛好）？即個疑問猶未破解進前，咱暫時先kā放一邊，佫來看下底另外一个「字音」。

「涎」字，中古音：邪母平声仙韵开口三等；《集韻》：徐連切。《說文》：慕也、欲也、口液也。現代辭典的解說是：唾液、口水。如：「垂涎三尺」。宋．陸游．記夢詩：「君知夢覺本無異，勿為畫餅流饞涎。」

所以，按頂面即段話，咱會當知影講，「涎」字，佇古漢文裡底，其中有一个意思是「喙瀾」，閩南語的讀冊音是" siân "。這，咱會當tùi閩南語的生活口語當中chhōe著根據。

漳州話，有一句話叫做「流瀾siân」，比論講「即个囡仔，愛流瀾siân」。意思是「囡仔流瀾流滴」。

閩南語有咧講「吐龍siân」，本義是講「儂吐出『龍喙瀾』」，用即句話來比論做「烏白講，講一寡無影無蹟的話，造謠」。佮即句意思相親像的，佫有「seⁿ-siân」（生siân）。

所以，真明顯，閩南語的「siân」，正正著「喙瀾」，呣管是涵義，抑是讀音，攏總hām古漢語相siâng。

話講遘chia，咱佫再越頭來看上頭提起的「瀾choâⁿ」、「喙choâⁿ」。我 teh 想，即个「siân」佮「choâⁿ」 ，敢會 拄好 是「文白對應」的共一个字。為著beh求證即个「假設」的想法，咱著噯 tùi「涎」字的聲母佮韻母來稽考，假使聲、韻攏有合（ha̍h），即个「假設」著有可能成立。代先，咱噯會記得，佇中古音，「涎」字是屬於「邪母仙韻开口三等」的字。咱會當做以下的比較：

• 「邪母」字，讀冊音的聲母是"s"。白話音來講，有真儕的字，攏會使讀做"chh" / "ch"，比論講：徐（sû / chhî）、斜（siâ / chhiâ）、象（siōng / chhiūⁿ）、松（siông / chêng, chhêng）、旋（soân / chn̂g；soān / chn̄g : 生佇頭殼頂的「 chn̄g 」）……所以，「涎」字白話音的聲母，讀做"ch"，無問題。
• 「涎」字，中古音的韻母是「仙韻」，又佫算是「山攝三等」的字。即款「仙韻山攝三等」的字，比論講：煎（chian / choaⁿ ）、濺（chiān / choāⁿ）、賤（chiān / choāⁿ）、線（siàn / soàⁿ）……即組的字，讀冊音佮白話音拄好是"ian / oaⁿ "的對應關係。因此，「涎」字白話音的韻母，嘛會當讀做"oaⁿ "。

所以，安呢著證明咱的假設是成立的。也著是講，徛在語音的角度，「涎」字，讀冊音是"siân"，白話音是"choâⁿ "。佫因為「涎」本然著有「喙瀾」的涵義，因此，咱講，閩南語的「chhùi-choâⁿ」是「喙涎」。