鹭水芗南-闽南语部落

Mô·-hōe ā-sī pak-ē chi̍t-ē chhùi, in-hô i káⁿ bōe kiò-koa ?
毛蟹也是腹下一个喙，因何伊敢bōe 叫歌？

Mô·-hōe i sī chúi-lāi phû, chúi-lāi tîm, i chiah bōe kiò-koa.
毛蟹伊是水裡浮，水裡沉，伊才bōe 叫歌。

Chhân-kap-á iā-sī chúi-lāi phû, chúi-lāi tîm, in-hô i káⁿ ē kiò-koa ?
田蛤仔⁵也是水裡浮，水裡沉，因何伊敢會叫歌。

Chhân-kap-á i sī chhùi khoah si̍t-táu tōa, i chiah ē kiò-koa.
田蛤仔伊是喙闊食斗⁶大，伊才會叫歌。

Chúi-kng iā-sī chhùi khoah si̍t-táu tōa, in-hô i káⁿ bōe kiò-koa ?
水缸也是喙闊食斗大，因何伊敢bōe 叫歌？

Chúi-kng i sī thô· lâi chòe, hóe-lāi sio, i chiah bōe kiò-koa.
水缸伊是土來做，火裡燒，伊才bōe 叫歌。

Thô·-pi-á iā-sī thô· lâi chòe, hé-lāi sio, in-hô i káⁿ ē kiò-koa ?
土嗶仔⁷也是土來做，火裡燒，因何伊敢會叫歌？

Thô·-pi-á i sī nn̄g-khang sio-lāng-thang, i chiah ē kiò-koa.
土嗶仔伊是兩空相弄通⁸，伊才會叫歌。

Tek-hé-kńg iā-sī nn̄g-khang sio-lāng-thang, in-hô i káⁿ bōe kiò-koa ?
竹火管⁹也是兩空相弄通，因何伊敢bōe 叫歌？

Tek-hé-kńg i sī tek lâi chòe, chàu-tóe pûn, i chiah bōe kiò-koa.
竹火管伊是竹來做，灶底pûn，伊才bōe 叫歌。

Phín-á iā-sī tek lâi chòe, lâng lâi pûn, in-hô i káⁿ ē kiò-koa ?
品仔¹⁰也是竹來做，儂來pûn，因何伊敢會叫歌？

Phín-á i sī ti̍t-liu-liu, ū chǹg-khang, i chiah ē kiò-koa.
品仔伊是直溜溜，有鑽空，伊才會叫歌。

Tâng-hoe-chiam iā-sī ti̍t-liu-liu, ū chǹg-khang, in-hô i káⁿ bōe kiò-koa ?
銅花針也是直溜溜，有鑽空，因何伊敢bōe 叫歌？

Tâng-hoe-chiam i sī tâng lâi chòe, bô khang sio-lāng-thang, i chiah bōe kiò-koa.
銅花針伊是銅來做，無空相弄通，伊才bōe 叫歌。

Tâng-tōa-lô ā-sī tâng lâi chòe, in-hô i káⁿ ē kiò-koa ?
銅大鑼也是銅來做，因何伊敢會叫歌？

Tâng-tōa-lô i sī lâng lâi kng, lâng lâi khà, i chiah ē kiò-koa.
銅大鑼伊是儂來扛，儂來撽¹¹，伊才會叫歌。

Nńg-chóa-chîⁿ iā-sī lâng lâi kng, lâng lâi khà, i káⁿ bōe kiò-koa ?
軟紙錢¹²也是儂來扛，儂來撽，伊敢bōe 叫歌？

Nńg-chóe-chîⁿ i sī chóa chòe--ê, lâng kô·--ê, i chiah bōe kiò-koa.
軟紙錢伊是紙做的，儂糊的，伊才bōe 叫歌。

Hong-chhe-lián iā-sī chóa chòe--ê, lâng kô·--ê, in-hô i káⁿ ē kiò-koa ?
風吹輾¹³也是紙做的，儂糊的，因何伊敢會叫歌？

Hong-chhe-lián i chia̍h poàⁿ-thiⁿ-hong, i chiah ē kiò-koa.
風吹輾伊食半天風¹⁴，伊才會叫歌。

Tang-sai-thah ā chia̍h poàⁿ-thiⁿ-hong, in-hô i káⁿ bōe kiò-koa ?
東西塔¹⁵也食半天風，因何伊敢bōe 叫歌？

Tang-sai-thah i sī chio̍h chòe--ê, i chiah bōe kiò-koa.
東西塔伊是石做的，伊才bōe 叫歌。

Chio̍h-cheng-khū ā-sī chio̍h chòe--ê, i káⁿ ē kiò-koa ?
石舂臼也是石做的，伊敢會叫歌？

Chio̍h-cheng-khū i sī kun ta̍h niû chhio̍k, i chiah ē kiò-koa.
石舂臼伊是 君踏 娘chhio̍k¹⁶，伊才會叫歌。

Chhâ-lâu-thui iā-sī kun ta̍h niû chhio̍k, in-hô i káⁿ bōe kiò-koa ?
柴樓梯也是君踏 娘chhio̍k，因何伊敢bōe 叫歌？

Chhâ-lâu-thui sī chhâ chòe--ê, i chiah bōe kiò-koa.
柴樓梯是柴做的，伊才bōe 叫歌。

Chhâ-bîn-chhn̂g iā-sī chhâ chòe--ê, i káⁿ ē i̍h-oa̍ihⁿ-si̍h-soa̍ihⁿ leh kiò-koa ?
柴眠床¹⁷也是柴做的，伊敢會 i̍h-oa̍ihⁿ-si̍h-soa̍ihⁿ ¹⁸咧叫歌？

Chhâ-bîn-chhn̂g i ū kun lám niû, niû lám kun, tī-leh i̍h-oa̍ihⁿ-si̍h-soa̍ihⁿ, m̄ chiah-ē kiò-koa !
柴眠床伊有君攬娘，娘攬君，佇咧 i̍h-oa̍ihⁿ-si̍h-soa̍ihⁿ，呣才會叫歌！



〖注解〗（普通話）

1、杜蚓：/tɔ²² un⁵³/，蚯蚓。
2、敢會：/kã⁵³ e²²/，怎麽能。敢bōe：/kã⁵³ bue²²/，怎不能。
3、田蛉：/tsʰan²⁴ ni⁴⁴/，蜻蜓。
4、庵蜅蠐：/am⁴⁴ po⁵³ tse²⁴/，蟬。龍海腔讀為/am⁴⁴ po⁵³ tsɛ²⁴/，其中「庵」，一般寫為「虫+奄」；「蠐」實際也非本字，因為龍海腔（漳州話）讀/ tsɛ²⁴/，可見「蠐」並非本字，該字疑為擬聲詞，即蟬的叫聲「/ tsɛ²⁴/」，漢字無妨寫為「喳」。
5、田蛤仔：/tsʰan²⁴ kap³² a⁵³/，青蛙。
6、食斗：/sit⁴ tau⁵³/下巴，一般用於動物。
7、土嗶仔：/tʰɔ²⁴ pi⁴⁴ a⁵³/，陶笛。
8、相弄通：/sio⁴⁴ laŋ²² tʰaŋ⁴⁴/，相通。
9、竹火管：/tik³² he⁵³ kŋ⁵³/，竹制火管，舊時伙房燒飯時用來吹旺爐火的工具。
10、品仔：/pʰin⁵³ a⁵³/，笛子。
11、撽：/kʰa²¹/，敲、打。
12、紙錢：/tsua⁵³ tsĩ²⁴/，紙錢、冥紙。
13、風吹輾：/hɔŋ⁴⁴ tsʰe⁴⁴ lien⁵³/，一種仿小風車的玩偶。
14、半天風：/pũã²¹ tʰĩ⁴⁴ hɔŋ⁴⁴/，半空中刮過的風。
15、東西塔：/taŋ⁴⁴ sai⁴⁴ tʰaʔ³²/，泉州【開元寺】，寺中有兩座世界最大的石塔，一東一西，當地稱為「東西塔」，建於宋代。
16、chhio̍k：/tsʰiɔk⁴/，踩踏。
17、眠床：/bin²⁴ tsʰŋ²⁴/，床。
18、i̍h-oa̍ihⁿ-si̍h-soa̍ihⁿ ： /iʔ⁴ ũãĩʔ⁴ siʔ⁴ sũãĩʔ⁴/，擬聲詞，指物件拼接不牢靠，發生吱哩呱啦的聲響。