鹭水芗南-闽南语部落

女：歡喜船入港，隔日隨開航。 Hoaⁿ-hí chhûn ji̍p-káng, keh-ji̍t sûi khui-hâng.
共君來相送，我君行船儂。 Kāng kun lâi saⁿ-sàng, góa-kun kiâⁿ-chhûn-lâng.
男：行船看水時，時遘bōe延遲。 Kiâⁿ-chûn khòaⁿ chúi-sî, sî--kàu bōe iân-tî.
為著度三頓，咱今著分離。 Ūi-tio̍h tō· saⁿ-tǹg, lán taⁿ to̍h hun-lî.

女：一位過一位，何日再做堆？ Chi̍t-ūi kè chi̍t-ūi, hô-ji̍t chài chòe-tui?
目睭看江水，看君船行開。 Ba̍k-chiu khòaⁿ kang-chúi, khòaⁿ kun chûn kiâⁿ-khui.
男：行船真艱苦，無風著搖櫓。 Kiâⁿ-chûn chin kan-khó·, bô-hong to̍h iô-ló·.
海水闊莽莽，何時轉故土？ Hái-chúi khoah-báng-báng, hô-sî tńg kò·-thó· ?
女：一路船順風，我君好開帆。 Chi̍t-lō· chûn sūn-hoang, góa kun hó khui-phâng.
君恁若有力，妹阮心輕鬆。 Kun lín nā-ū la̍t, bē gún sim khin-sang.
男：風吹共水走，bōe得通出頭。 Hong chhe kāng chúi cháu, bōe-tit-thang chhut-thâu.
有命轉回鄉，無命綴水流。 Ū miā tńg-hôe hiuⁿ, bô miā tè chúi-lâu.
女：聽君只言語，妹阮心傷悲。 Thiaⁿ kun chí giân-gú, bē gún sim siong-pi.
佛祖相保庇，平安無代誌。 Pu̍t-chó· saⁿ pó·-pì, pêng-an bô tāi-chì.
男：此去遠千里，呣知轉底時。 Chhú-khù hng chhian-lí, m̄-chai tńg tī-sî.
離別惡相見，想著喉就滇。 Lī-pia̍t oh saⁿ-kìⁿ, siūⁿ-tio̍h âu chiū tīⁿ.
女：一山過一山，無儂通做伴。 Chi̍t-soaⁿ kè chi̍t-soaⁿ, bô lâng thang chòe-phōaⁿ.
哥恁海口滯，妹阮心頭掛。 Ko lín hái-kháu tòa, bē gún sim-thâu kòa.
男：行船儂拖磨，無時通快活。 Kiâⁿ-chûn lâng thoa-bôa, bô-sî thang khòaⁿ-oa̍h (khùiⁿ-oa̍h).
風雨無遮閘，規日走著外。 Hong-ú bô lia-cha̍h, kui-ji̍t cháu tī gōa.

合：行船無奈何，翁姥（夫妻）常拆散。 Kiâⁿ-chûn bô-ta-oâ, ang-bó· siông thiah-sòaⁿ.
離別目屎流，一曲行船歌。 Lī-pia̍t ba̍k-sái lâu, chi̍t-khek kiâⁿ-chûn-koa.