鹭水芗南-闽南语部落

無呣著，這著是毛澤東寫佇1935年6月ê《長征》。

即tè詞寫作ê背景，是講遘，第一次國共合作失敗了後，雙方拆破面， 蔣介石（Chiúⁿ Kài-se̍k）咒誓beh滅共産黨。Hit當時共産黨領導ê紅軍，猶佫真chíⁿ，根本無法度 佮 勇衝衝(ióng-chhèng-chhèng) ê 國民黨 對khia̍t。後來，為著beh閃避蔣介石一再追殺，毛澤東決定beh將軍隊ùi南方giú去北頂，目的是保存實力，日後再戰。Tng當時，紅軍ê裝備真正兩光， 三軍按華南遷去遘華北，全部靠步輦(pō·-lián)；因為又佫驚國民黨半路攔閘(nôa-cha̍h)，姑不而將，「有路呣行，行山坪」，受盡千辛萬苦，總算行遘陝北，自頭遘尾，攏總行過十萬八千裏。即tè詞著是描寫紅軍長征路頂所拄著ê艱難；詩人借用安呢，來o-ló三軍呣驚艱苦、呣驚犧牲，立志革命遘底ê堅強意志。儂講「做匏桸(pû-hia)呣驚湯燙；做笠仔(loe̍h-á)呣知日曝」，一時忍氣求生，日後才會當出頭天。

會使講，過去中國共産黨即段艱苦奮鬥、自力更生ê品行(phín-hēng)，是互我佩服kah無話通講，永世永世著kā伊 比大頭拇（華語：豎大拇指）！除了o-ló，猶佫是o-ló.....

好。即mái，佫換一个角度來看問題，做夥來——

共款beh請儂客先來唸一首「詩」。Beh講這是「詩」，不如講是一段「盤喙錦」。請斟酌看：

當 官 不 怕 喝 酒 難 ，
萬 盞 千 杯 只 等 閒 ；
鴛 鴦 火 鍋 騰 細 浪 ，
海 鮮 燒 烤 走 魚 丸 ；
桑 拿 按 摩 周 身 暖 ，
麻 將 桌 前 五 更 寒 ；
更 喜 小 姐 白 如 雪 ，
三 陪 過 後 盡 開 顏 。

安怎，看了感覺啥款，有啥物體會無？…可憐代，當今ê社會啊……He 是啥？是咧「為人民服務」呣？！哪會服務kah去咧「三溫暖」？！

即tè，我kā翻做漳泉語，當中小可(sió-kóa)有保留一寡原封ê氣口，用白話唸來，oân-á真趣味——

做 官 不 驚 食 酒 難 ， 千 杯 萬 杯 只 等 閒 ； 鴛 鴦 火 鍋 鏘 鏘 滾 ， 海 鯧 山 獐 炕 魚 丸 ； 桑 拿 掠 龍 滿 身 暖 ， 繳 桌 面 前 五 更 寒 ； 咔 愛 小 姐 白 雪 雪 ， 三 陪 過 後 盡 開 顏 。

Chò koaⁿ m̄-kiaⁿ chia̍h-chiú lân Chhian-poe bān-poe chí téng-hân Oan-iuⁿ hóe-ko chhiāng-chhiāng-kún Hái-chhiuⁿ soaⁿ-kiuⁿ khòng hî-oân Song-ná lia̍h-lêng móa-sin loán Kiáu-toh bīn-chêng gō·-kiⁿ hân Khah ài sió-chiá pe̍h-seh-seh Sam-pôe kòe-āu chīn khai-gân...

【添注】

① 「掙」：cheng，意思是「摃、拍」。「長期互儂掙」：tn̂g-kî hō· lâng cheng（華語，長期被人揍）。往早(éng-chá)，紅軍長征行過18000裏，參加長征ê阿兵哥，實在攏真了不起！不而過佇即陣ê社會，一寡有權勢ê儂，也著是tng當時hiah-ê紅軍ê後輩、繼承人，怹ê所作所為，實在hām前輩差咧18000裏。平平18000裏，兩款完全無sio-siâng ê人生。前輩是英雄，咱噯kā o-ló；後輩是術仔、了尾囝，真正 著kā拖起來掙。