鹭水芗南-闽南语部落

當然，即本冊siōng-kài互我憶著的所在，呣是講冊底有介紹偌儕拄偌儕漢字的智識（即本冊主要是面對普通的讀者，所以文字論述真正淺白。佫再講，介紹漢字學的冊，咱國裡在本著有夠儕囉），正正是因為即本冊會當互咱瞭解講，日本儂是安怎來看待近代史上發生的幾落擺佮漢字有治代的運動。講著這，真容易互儂想著往早發生佇日本國裡的hit段無成功的廢漢字的歷史。日本儂對著漢字的感情，著親像in的民族情結共款，是hiah-nī多元又佫矛盾。日本儂開始對漢字提出堯疑，上早hoān-sè會當追遘德川時代。hit當陣，日本儂頭一擺通過荷蘭儂認捌著歐洲，in發覺講西洋文明是hian-nī-á澎湃，iah荷蘭語的記音系統hian-nī-á簡便……實在講，in是有夠欣羨的。In 開始懷疑漢字的複雜佮不表音的特性，將這看做是阻礙民族進步的擋路石。明治維新hit暫仔，日本有捌認真檢討過家己的民族文化，主張廢除漢字的儂不止儕。西元一八八三年，日本皇族的栖山宮威王出來chhōa頭，招募著五千外个主張完全用假名的人士，成立「假名會」，出版全假雜誌，編寫全假辭典，一陣假名風，會使講是吹kah huh-huh-háu。不而過，儂拉丁字母kan-na二十捅个niā，ah假名的數量soah比儂的兩倍佫咔儕。所以，無偌久後，著有bōe少儂講即个假名oân-á是有夠累贅（lûi-tūi），就安呢，全國的頂頂下下，又佫再giâ起一場推捒（thui-sak）羅馬字的運動。Hit 當陣 oân-á有出版一寡全羅的讀物。呣佫，有一點日本儂逐个心裡攏知知咧，放捒（pàng-sak）漢字的日文，變kah躼躼長（lò-lò-tn̂g），無論寫抑是讀，攏真費氣。進前hiah-ê「全假」的冊，著已經互大多數的日本儂看kah頭殼疼孤爿囉，taⁿ 佫再sòa著即攤「全羅的」，汝講會lô 抑是bōe lô？所以，即兩場的運動，最後攏無好結果。Ah...實在講，hit款的結局，儂攏bōe感覺驚奇。

近代的中國，有一暫仔，主張廢除漢字的聲勢嘛不止大。西元一九五〇年代，中國政府捌kā漢字拼音化列入語言規劃的日程，按算beh長期來落實落去。雖然即陣，政府已經無咧餾即碗發無成的「粿」，iah呣佫，佇民間三不五時猶原會得聽著一寡堅持廢漢字的聲說（siaⁿ-seh）。In不時 攏 摕（the̍h）朝鮮語佮越南語來做比論。是啦，代誌是hiah-nī 注死，又佫是必然會來發生。朝鮮語、越南語確實成功脫漢，不而過，儕儕儂佇咧看待即層代誌的時陣，soah往往將安呢的一項事實放bōe記得，逐家攏知影漢字是漢語「胎帶來的」（the tòa--lâi-ê），佇咧中國用四千外外年啊，講起來，漢字真正會當完全兼容的只會當是漢語，iah nā對著朝鮮語佮越南語，伊著無即款才調，總是bōe啥會合拍（ha̍h-phek）。朝鮮語算是阿爾泰語系的一種語言（當然，日語也是），漢字遘kah漢代chiah開始有佇咧朝鮮半島推廣；Ah nā 越南語是屬於南亞語系，越南接受漢字嘛不過是公元後幾世紀chiah 開始的代誌niā-niā。儂講「山可移，性難改」，即兩種語言雖然佇咧漢文化強勢影響之下硬斗（ngē-táu）吸收著儕儕的漢語語詞、語音，不而過，猶原bōe當改變著in的根底，in本底著呣是漢藏語系的語言咯。硬beh用漢字來記錄朝鮮語佮越南語，定著會出現「食bōe消」的情況。西元一四四六年，朝鮮字的開基祖——世宗國王，佇咧《訓民正音》的踏話頭（序言）即段，一開始著寫講：「我國之語言異于中國之語言，故并不適于漢字。所以，即使是最愚魯的人民也應該有表達自我的欲望，而完全無法表達與發展自己思想的人民，必不勝數。我憐憫著這些人民，并于新近創制了二十八個字母」（咱國的語言，佮in中國話無共款，用漢字來寫咱國的語言無合（bô ha̍h）。准講是戇儂抑是野漢，嘛應該有表達自我的願望，不而過，事實上，完全攏無法度表達，也無法發展家己思想的儂，實在儕kah bōe算得。我憐惜又佫同情chiah-ê人民，就佇最近造出二十八个字母。）。所以講，朝鮮佮越南，該然廢除漢字。佮日語來相比，in是hiah-nī-á好運——呣佫這無代表講，in啥物款的代價攏無付出（我本然是beh講，in付出的代價實在足大的）。