鹭水芗南-闽南语部落

楊麗花，生成端麗、大才（tāi-châi），好枝骨，面肉 幼秀 白抛抛，互伊來搬小生，真正有合。伊所扮演的角色，大多數攏是hit-lō 飄撇的緣投仔兄，清飄的阿舍哥，或者斯文的公子爺。伊的戲路，呣管是風流多情的唐伯虎、孽khia̍t 樂暢 的賈寶玉，飄撇的劍客，威風的大將軍，或者壓霸 嚴gâi的皇帝爺，淒慘落魄的和尚、乞食，伊攏有法度演kah徛真徛現，活跳跳，著nā 親像hit-lō飛天鑽地、飛簷走壁（hui-liâm cháu-phiah），有七十二般武藝的猴齊天，規身全本事，互觀眾佩服kah無話通講。楊大俠，伊千變萬化的戲路，嘛向hit當時的觀眾展出著歌仔戲藝術的內涵kah活力。

民國七十二年，楊麗花佮戀愛已經成十年的諸夫朋友（cha-po· pêng-iú）——洪文棟結做連理，牽手行入愛的禮堂，享受平凡又佫安靜的家庭生活。洪文棟是楊麗花目睭裡的如意郎君、好翁婿，是一家之主；iah 楊麗花嘛一直是洪文棟心中 賢惠、善良的家后，伊全權負責厝裡囡仔序細的教育。

Chêng伐出藝界了後，楊麗花to̍h過著佮普通儂共款的生活，佇夏威夷的「忘憂居」度過一工又一工，無煩無惱、輕鬆自在的日子。伊的生活，有一套家己的哲學，號做「四呣哲學」：煩惱，呣囥過暝；好食的物件，食巧 呣 食遘飽；肥，呣驚汝笑；shopping，驚錢 扎 無夠，呣驚物件仔貴。

鄉土戲曲的守護神

有一个十足合意（kah-ì）歌仔戲，是楊麗花小姐死忠的戲迷，名號做「郭惠芯」的小姐，佇咧《楊麗花全球資訊網》頂面貼一篇號做《我愛楊麗花》的文章，將伊心中的「戲神」呵咾（o-ló）kah 會 tak舌。伊寫講：「……伊搬戲的功夫 熟làu-làu，是幾落十冬來 kut力磨練的福報；伊唱戲的時 全精神的屈勢，這著是伊的真功夫；一目nih變換幾落个角色，著親像伊做儂頂真又佫自在。我愛楊麗花，伊總是掌握家己的命運，經驗著每一个普通儂對個人理想的追求佮ǹg望。我愛楊麗花，是因為我合意做一个肯拍拼、意志堅定，擔會起放會落、自在的儂。（……她爐火純青的戲曲功夫，是數十年不斷精進的結晶，唱戲時全神專注是提得起的真功夫，演畢時瞬即轉換角色是放得下的磊落自在。我愛楊麗花，她轉動著自己的命運，實踐了每個平凡人對自己的理想期許。我愛楊麗花，也投射出我愛那個肯努力吃苦、意志堅定、提起放下自在的自己。）」

佫紲落來，是楊麗花小姐，佇咧接受專訪的時，所講著的內容。佇chia，用楊小姐上第一熟似的閩南語，以第一人稱的形式來講互逐家聽。

心海羅盤·楊麗花·結緣

「舊年，『心海羅盤』六周年的演唱會，我有去現場聽葉教授講演，後來我請葉教授去阮厝食飯。佇即擺進前，約略差不多五冬前，有一工，我拄仔好佇電視頂看著伊佇咧講演，chiah知講有即个儂。逐家攏呣知伊叫啥名，kan-na知影儂攏叫伊『葉教授』安呢。伊的底細我oân-á無清楚，kan-na知講伊代表一種哲學。我感覺伊咧講話、講道理、哲學，攏足讚的，喙水嘛真讚，佫 好鬥陣；伊講國語啦、台語啦，攏誠清楚，互儂聽著誠明；伊講話真正足有說服力的，聽伊講話攏感覺 足 輕鬆的 安呢，互汝感覺講，分析kah真分明，真貼心，有時著ná親像互儂感覺頭殼拄著厝頂，規个腦筋攏chiâu 開智慧 起來，bē互真儕有困擾的物件kā汝 縛tiâu-tiâu。Hit當陣，聽電視頂咧講演，我問阮翁講『葉教授』是啥儂？後來chiah知影葉教授佇《中國時報》有規套的作品佇咧，當時著有買寡 錄影帶 轉來 看。葉教授誠細心，佫直直kā即份感激囥佇心肝裡。阮聽過錄音帶了後，嘛感覺講真有必要佫介紹互朋友聽，kāi當做是真好的教育 安呢。」

葉教授的講演互儂感覺足親切的，真正拄著問題的時，聽聽咧著感覺頭腦加真清楚，儂著bōe感覺 ná像 去 互 啥物貨 kā 咱 硩tiâu-tiâu 安呢。普通時仔 我 攏 足 無閒的，閒chiah有看liâm-mi-á電視。新聞互儂看著 頭誠眩，所以會想卜佫轉葉教授的節目來聽，聽伊的聲，著加真快活，安呢頭腦著會加真清楚啊。聽教授咧解答別儂的問題的時陣，夫妻啦、家庭啦、股票啦……攏講kah足好的。儂講「一儂苦一項，無儂苦相共」，每一儂攏有家己的煩惱，教授的作品ná親像攏會當解答所有chiah-ê問題，聽聽咧 心情自然著會加足快活的。

我一直攏感覺教授 伊是一个真無普通的儂，歷史上嘛攏無出過像伊即款的人才。本身我家己有演過真儕忠孝節義的故事，歷史故事瞭解足儕的，我感覺葉教授的理念kài有新意，有合（ū-ha̍h）即mài的社會的骹步，講kah真透白，真明，攏bōe「鴨仔聽雷」。伊講話佫定定足笑詼的，汝會感覺誠輕鬆，又佫自在。我捌hām汝滾sńg笑，問伊講： ah汝 hiah gâu 講話，是安怎無愛出來競選。葉教授伊捌的物件，呣是講有真儕儂知道，佫咔呣是凊采互汝學會著的，逐條to是道理，伊真正足無簡單的，是一个人才，我是有夠佩服伊的。

自細漢盡捌忠孝節義

我自細漢，磨練上儕的，著是演戲，直透咧搬演歷史戲，攏總有搬過三百外部。師傅教師仔，呣kan-na是教技巧，連做儂做代誌、規矩、禮數，攏噯教，nā無安呢，是哪會kā he 忠孝節義的故事演kah會活？講話噯斯文、雅氣，搬戲著是噯有教育意義佇咧……汝看即mái的囡仔，無大無細 五倫不分啦……

葉教授有捌講過：古意的chiah會久長，戇戇食天公；有一句俗語話，講號做「越奸越巧越貧窮，奸奸巧巧天不從（oa̍t-kan oa̍t-khiáu oa̍t pîn-khiông, kan-kan khiáu-khiáu thiⁿ put-chiông）。」

汝即个儂 真精（chiⁿ）真奸巧，天哪會從？Ah nā 戇戇做的，戇戇bóng過日，咔幸福啦。我食苦 食 上thiám的，是做囡仔hit陣仔，tòe阮父母佇戲班，生活攏無固定，ah呣佫，阮戲班 食 八方的，四界演戲討生活。Hit陣仔，阮攏佇戲院演出，戲院著親像即擺的電影館。Kan-na 台北 著有幾落十間戲台。舊早 無 hit-lō 電影館，有戲團，歌仔戲、新劇團、平劇嘛有。往早kā平劇當做是「國粹」（國寶級的），正經講，歌仔戲chiah是正港的地方戲。因為歌仔戲是ùi臺灣湠根（thoàⁿ-kin）、大叢（tōa-châng）起來的，hit 陣，hām大陸開始有teh來去（來往），有的走去大陸chhōe根。我講 汝去大陸chhōe歌仔戲的根，是卜chhē 啥物 番薯「根」啦？即个「根」，著是 ùi 咱臺灣 puh-íⁿ 的，大陸的歌仔戲是咱臺灣傳過去的，佫講，in做了嘛無kài專。

阮阿公 佮 阮阿母，攏是趁食即途出來的，真瞭解歌仔戲是佇咱宜蘭chia湠根、 puh-íⁿ 的，遘taⁿ 已經百外年啊。宜蘭，自早 無 歌仔戲，是子弟戲。歌仔戲是子弟戲 佮 四平戲去改的，古早的歌仔戲是用唸的，無 戲服仔，坐咧唱；子弟戲 直直改，改七字仔調，七字仔調chiah是伊的本調，其它 有的 小調 攏 外來的。後來平劇來啊，平劇有chhēng戲服仔，in chiah tòe儂學chhēng衫、學化裝……像即種文化的物件，是「伊抾伊、伊抾伊」，七鬥八鬥綜合起來的。

子弟戲世家，成養（chhiâⁿ-iúⁿ）歌仔戲將才

子弟戲 呣是 四界 去 演出，演員 透底（thàu-tóe）攏是 有錢儂 的 後生。往過，好額儂 的 囝 攏無咧趁錢，食飽傷閒 著去 學唱。子弟戲 無 諸姥（cha-bó·），攏 諸夫的（cha-po·--ê）咧唱，呣chiah叫「子弟戲」。阮阿公是子弟戲的頭家，伊嘛是儂兜的子弟去咧學，有的學員娶姥生囝to̍h無佫出來唱。阮老父嘛有去學，學遘尾仔，時機愈來愈bái，諸夫囡仔攏著做工，chhōe無團員，阿公choăⁿ kā 六个 諸姥囝 叫叫落去學（阮老母排第六，煞尾仔），阮老父 著是安呢chiah佮阮老母熟似的。Hit 陣仔，歌仔戲團開始chhèng，阮老父老母去參加儂的戲團，一團仔一團 直直做，做遘我出世，我嘛是tòe阮老母佇咧戲班大漢的。有儂講我是出世卜來做戲的。阮老母生我的hit一暗 猶佫佇咧做戲。伊揹（phāiⁿ）一粒大腹肚做小生。因为武生、文生攏是孤生孤旦，別儂嘛無法通替汝。我是安怎攏無讀啥物冊咧？我做囡仔攏佇戲班，足愛chhit-thô的，攏bōe想講聽候（thèng-hāu）冊讀煞chiah來做戲。Hit當時戲團佇台北抑是新竹演，卜讀冊著噯滯宜蘭阮阿舅in兜。暑假tòe父母佇戲班，時間遘，老父送我去坐火車。伊一越頭（oa̍t-thâu），我著隨跳落車，走轉去戲團kā伊哭講我無愛轉去。所以，我kan-na讀一兩年冊niā-niā。

阮阿公嘛做子弟戲，伊攏是搬「阿姐旦」。古早的戲台足大間的，像國家劇院hit款舞臺hiah大，但是一定噯有後臺，後臺噯著真大。戲班一團攏有六、七十个儂，像一个大家族。後台無隨便互儂出入，hia是規个團的家。一个家族舖一張床，用戲箱仔、番仔衫櫥仔 來做隔間（服裝攏著家己做，呣是戲頭家做互汝的），食、chhēng、滯，攏佇hia。每一个所在，攏著演十工，觀眾nā咔儕，抑是講咔好趁，著加演幾工仔；假使nā咔無觀眾，著噯搬，搬台中、高雄……我講阮食八方，逐工攏噯演，班主噯煮互儂食，戲文攏共款，一套戲文四界搬kah thàng，全省巡完了後chiah佫換新戲文。戲團的團員，攏各地來鬥的，有的滯高雄，愛看歌仔戲 著來學，hit 時，真儕儂 choăⁿ 入鄉tòe俗，就近做親，結婚生囝，直直傳(thn̂g)落去。

親身行過歌仔戲的鹹酸甜

阮老母講我細漢的時陣，歌仔戲班，上少嘛有三十團，歌舞團有兩團，新劇團嘛有兩團，咔早也有 客儂仔戲（客家戲）。客儂仔戲 嘛 上 舞臺，台北儂咔bē曉聽客儂仔話，in攏佇新竹、桃園 chit 搭。日本管的時陣，呣准 歌仔戲chhēng戲服仔，噯汝chhēng se-bí-loh （西裝），後來，蔣兮 來臺灣chiah改變。

歌仔戲班kan-na 滯 戲台teh演，呣是 路邊戲。後來電影出來囉，儂攏時行看電影，一寡戲台soah攏改做電影院。舞臺 無啊，歌舞團散去，新劇團嘛散散去囉；客家團、南音、福州戲、歌仔戲 嘛攏 差真儕。舞臺戲 落衰（lak-sui）了後，有的走去「路邊戲」，有的去電臺，阮父母hit 陣 著 收起來囉。Hit 時，我差不多十九歲，我去參加一團去菲律賓的，唐儂（tn̂g-lâng：華僑）真合意歌仔戲。因為講話會通，hit 時菲律賓景氣真好，in十箍等於咱的百外元；hit个所在的儂攏真闊手、真血漢（hiat-hàn），戲看煞 攏有紅包通好摕，半年著趁差不多十四萬，三十幾冬前，聽好（thèng-hó）買頂下層的樓仔厝啊！轉來了後 即班儂 散陣啊，各儂 倒轉去 士農工商 食家己（當時我hām小明明、柯玉枝攏有結拜，佇電視台猶有鬥陣。）Hit 時，我買厝買佇迪化街hia。迪化街 大龍峒 正聲廣播電臺 拄好 有 一个 天馬歌劇團，廣播一、兩年，電視著有啊。Hit 時無彩色的，全台灣kan-na「台視」一台，開台的第四年，阮考入去臺視演歌仔戲。我二十一歲，全省愛看歌仔戲的儂真儕，拄好tn̄g著 hit个時陣吧，自安呢 我規个攏chhèng起來。

我頭一擺登台表演是七歲，hit 時 戲團 欠 囡仔，我演hit 齣《安安趕雞》hit 个 安安。即齣戲真出名，我搬囡仔 上台唱兩葩niâ，大漢著換別儂演啊。我攏總演出三百六十外齣戲，合意的劇本真儕。我真合意宋朝楊家將的戲，佮王寶釧與薛平貴，chiah-ê故事攏足súi的。做kah上風流的是唐伯虎點秋香；創作的劇本有 王文英、竹籚馬、朱洪武……我16歲頭一擺搬男主角，演《陸文龍》，佇 台仔頂 弄 雙槍，足厲害的是呣！我呣是kan-na演hit款風流飄撇的，我 本身 有 足儕 種 戲路，獨獨 著是 演 諸姥兮 無伊法。演小旦抑是男扮女裝的，准講 汝 裝 佫咔 súi，儂觀眾早著已經咬定啊，攏講無好看。電視、舞臺、電影、電臺，我攏經驗過。我咔愛演舞臺戲。舞台是佮觀眾上倚近的，我哭，觀眾嘛哭，愈演愈真，kan-na聽 pho̍k仔聲，咔辛苦嘛無要緊。電臺kan-na有放送聲音，kan-na一粒話筒，一个儂唱幾落个角色，我攏禁bōe-tiâu 足愛比動作，定定去互同事笑kah……電臺聽眾比電視台的觀眾佫咔熱，聽眾直直噯阮出來公演。後來佇大橋頭hia公演，規个所在khoeh kah強強卜煏破（pak--phòa）！我的運途真正bē歹，定定真受歡迎，有的儂 chhèng，kan-na chhèng 兩齣戲，無儂像我chhèng chiah久，這著是我的根本。Ah呣佫，我咧chhèng的時陣，攏罕得做秀，因為he舞臺呣是阮的舞臺，假使nā卜公演，我一定噯chhōe hit-lō有夠大佫闊的舞臺。為咱的歌仔戲出去公演，鬧熱滾滾，逐个攏愛看。

自來攏嘛搬小生

我身懸一百六十四公分，我演的，攏小生的 咔儕。因為演戲的關係，我的個性有咔偏 諸夫的。佇舞臺頂 上歹演的是hit款「也著哭，也著笑」的戲，尤其是《呂布與貂嬋》，驚講哭了無聲，唱腔誠懸，佫噯演苦味的，實在是佇咧考驗演技。

即陣逐齣戲，我攏會勻勻仔（ûn-ûn-á）揀，kā過去hiah-ê超工「揀kah仁仁」的服裝攏換tàn掉，專工佫來chhoân一寡咔有合 即mái 社會時行的。Chhun--ê，比論講 唱腔、調仔、配樂，攏無變。將伊根本的物件保留；劇本噯寫新的，nā無，新一代的觀眾in bōe接受汝。古早的哭調仔，約略攏是四遘五段，nā 攏唱遘煞，ah 戲著攏免搬啊！一个鏡頭翕遘底，hit款的模式佮現在 無共款。即mái 噯 節奏 緊，nā無，觀眾會攏睏去。

即幾年歌仔戲開始有teh國家劇院演出，感覺誠好，呣佫，國家劇院辦的演出真少有滿座的。我的舞臺經驗咔儕，常在（chhiâng-chāi）有出國看一寡藝術表演，所以我認為歌仔戲一定噯加新的物件落去，舞臺的佈景，bē使 佫像 往早 安呢 一幕遘底。所以，我一定噯做一个舞臺互儂看。頭一个佇國家劇院的戲文是《呂佈與貂嬋》，呣免 話筒，攏用 肉聲（自然聲），劇院噯 規間 關bā-bā，演出hit場戲了後，戲界透底攏學我的型。

歌仔戲對我來講，著親像人生的戲文，生命的代表。因為自細漢演出 遘taⁿ 猶原 放bōe離，我有半世儂攏佇電視台，我感覺歌仔戲nā佇電視頂無去 安呢 足 無彩的。我 即款 年歲 咔無愛出場演出，taⁿ 我是咔 致重 做 幕後 推捒（tu-sak）的工課（khang-khè），以教學為主，chiah bōe互文化來斷層去。陳亞蘭是我第一合意的學生。我咔瞭解著安怎做 chiah通互觀眾對歌仔戲有興趣，所以，我一直佫咧拍拼，卜利用的我名聲，佫佇電視台恢復（khoe-ho̍k）歌仔戲的風采，互新的學生有表演的機會。

華人文化的重要資産

郭惠芯認為講楊麗花「m̄ kan-na是活佇所有戲迷 個人的『人生戲場』裡底，伊不斷出來咧演，攏無倒勼（tò-kiu）。楊麗花，伊是安怎會當佮即个社會文化保持無脫鉤咧？He全部是因為伊有堅強的意志，會當接載（chih-chài）佮排解來自各種傳播媒體的壓力，幫助歌仔戲mài互 一刮（chi̍t-koah）又一刮的 外來文化 拆食落腹。楊麗花著是安呢chiah 成做 基層百姓心肝裡的大明星，嘛 成做 鄉土戲曲藝術的 守護神 佮 成養者。」（不僅活在所有戲迷的個人歷史扉頁裡，她頻頻出場演出，不曾缺席。楊麗花最能夠與社群文化交融結合的，其實是她意志堅毅地度過各種傳播媒介勢力的消長，讓歌仔戲不在快速淹來的外來文化中湮滅。楊麗花於焉成為廣大基層民眾心中的天王巨星，也成為地方戲曲藝術的守護者和開創者。）

Nā講遘 歌仔戲發展佮改革，楊麗花有伊家己的意見，有家己的堅持。伊真看重保留歌仔戲的元神 佮 有特色的部分。為著歌仔戲會當成做一種 全社會 通儂 攏 聽好（thèng-hó） 觀賞的表演藝術，只卜 是 做 主腳 演出 的 戲齣，一定會結合現代劇場、電視、hām佮舞臺效果的表現形式。佇舞臺頂，伊扮演的角色自來攏是主裁；歌仔戲的劇目嘛因為有楊麗花即个儂 chiah變kah加真精彩、膨湃；歌仔戲佇伊的推捒之下，成做臺灣佮世界華人文化的一筆大資産。Nā講 「楊麗花 一个儂 關係著整個（chéng-kô）歌仔戲的命運」，安呢 嘛 無過份。

ps. 本文是根據《歌仔戲泰斗楊麗花的傳奇形象》（文／ 蕭嘉慶．林秋芬）所來編譯的。

(Beh聽聲，佇下底→)